«تاڭەرتەڭ ەدى, مەن ۇيىقتاپ جاتقانمىن. كەنەتتەن سەلەكتوردان بوسانايىن دەپ جاتقان ايەلگە كومەك قاجەتتىگىن حابارلادى. مەن باسقا ۆاگوندا بولاتىنمىن, حابارلاندىرۋدى ەستىپ, ايەل جاتقان ۆاگونعا جۇگىردىم», دەيدى ۇلىتاۋ وبلىستىق دەنساۋلىق ساقتاۋ باسقارماسى وبلىستىق جەدەل مەديتسينالىق جاردەم ستانتسياسىنىڭ ساتباەۆ قالاسى بويىنشا بولىمشەسىنىڭ فەلدشەرى ايدانا سمايىلوۆا.
فەلدشەر ايدانانىڭ كاسىبي جانە جەدەل ارەكەتتەرىنىڭ ارقاسىندا ايەل بالانى تابيعي جولمەن, اسقىنۋسىز جانە پاتولوگياسىز دۇنيەگە اكەلدى. تالاپتارعا سايكەس جەدەل مەديتسينالىق جاردەم كارەتاسى شاقىرتىلىپ, «جەڭىس» ستانتسياسىنان ايەل مەن ءسابي جايرەم كەنتى اۋرۋحاناسىنا جەتكىزىلدى. سونداي-اق, بوسانۋ كەزىندە ساتباەۆ قالاسىنداعى «بالدىرعان» بالاباقشاسىنىڭ مەيىرگەرى قارلىعاش اليەۆا مەن «قازاقمىس» كورپوراتسياسى» جشس ينجەنەر-ەكولوگى جاقىپبەك زارينا بارىنشا كومەك كورسەتكەن.
قازىرگى ۋاقىتتا اناسى مەن اسىلىم ەسىمدى نارەستەنىڭ جاعدايلارى جاقسى جانە وزدەرىنىڭ قۇتقارۋشىلارىنا العىس ايتتى.
ايدانا سمايىلوۆا جەزقازعان قالاسىنىڭ جوعارى وبلىستىق مەديتسينالىق كوللەدجىنىڭ تۇلەگى. 2018 جىلدان باستاپ وبلىستىق جەدەل مەديتسينالىق جاردەم ستانتسياسىندا ەڭبەك ەتەدى, ەرەكشە بالانىڭ اناسى. ول مۇنداي جاعدايعا ءبىرىنشى رەت تاپ بولعان ەمەس, كاسىبي مىندەتىن ورىنداۋ بابىندا بىرنەشە رەت ايەلدەردى بوساندىرىپ العان.
ۇلىتاۋ وبلىسى
