سۋرەتتى تۇسىرگەن – يگور بۋرگاندينوۆ
جاڭا مادەني نىسان – ەكى ەل اراسىنداعى كوپجىلدىق ىنتىماقتاستىق پەن سەنىمنىڭ, سونداي-اق ەكى ەل باسشىلارى اراسىنداعى دوستىق قارىم-قاتىناس پەن ءوزارا قۇرمەتتىڭ ءبىر كورىنىسى ىسپەتتەس.
اللەيانىڭ اشىلۋ راسىمىنە ەلىمىزدىڭ مادەنيەت جانە اقپارات ءمينيسترى ايدا بالاەۆا مەن رەسەي فەدەراتسياسىنىڭ مادەنيەت ءمينيسترى ولگا ليۋبيموۆا باستاعان رەسەيلىك دەلەگاتسيا مەن استانا قالاسىنىڭ اكىمى جەڭىس قاسىمبەك قاتىستى.
ءىس-شارا بارىسىندا ايدا بالاەۆا ەكى ەل اراسىنداعى قارىم-قاتىناستا مادەني ىنتىماقتاستىقتىڭ ورنى ەرەكشە ەكەنىن اتاپ ءوتتى. ونىڭ ايتۋىنشا, قوس تاراپ بىرلەسكەن كورمەلەر ۇيىمداستىرىپ, شىعارماشىلىق ۇجىمداردىڭ گاسترولدەرىن, كينوفەستيۆالدەر وتكىزىپ جاتىر. ودان بولەك, مادەني-گۋمانيتارلىق ىنتىماقتاستىق جونىندەگى كىشى كوميسسيا جەمىستى جۇمىس ىستەپ جاتقانىن دا تىلگە تيەك ەتتى. اتاپ ايتساق, ەكى ەلدىڭ مادەني كۇندەرى, قازاقستاندا «ورىس ماۋسىمدارى» مادەني-گۋمانيتارلىق جوباسى جانە «اۋقىمدى گاسترولدەر» باعدارلاماسى ءساتتى جۇزەگە اسىپ كەلەدى.
«مادەنيەت ارقاشان حالىقتاردى جاقىنداستىراتىن كوپىر بولىپ كەلەدى. ونەر, ءتىل, ءداستۇر مەن مۋزىكا ارقىلى ءبىز ءبىر-ءبىرىمىزدى تەرەڭىرەك تانيمىز, ەرەكشەلىگىمىزدى تۇسىنۋگە ءارى قۇرمەتتەۋگە ۇيرەنەمىز, ورتاق قۇندىلىقتاردى تابامىز. سوندىقتان دا ماڭگىلىك دوستىق اللەياسى – حالىقتارىمىزدىڭ رۋحاني بىرلىگىنىڭ, ورتاق تاريح پەن كەلەشەككە باعىتتالعان ىنتىماقتاستىقتىڭ ايقىن بەلگىسى. بۇل ورىن بولاشاقتا بىرلەسكەن مادەني جوبالار جۇزەگە اساتىن, سۋرەتشىلەر, مۋزىكانتتار, اكتەرلەر, تاريحشىلار مەن جاس تالانتتار باس قوساتىن الاڭعا اينالارىنا سەنەمىن. اللەيا – ۇرپاقتان-ۇرپاققا جالعاسار سەنىم مەن قۇرمەت, ورتاق قۇندىلىقتاردى ساقتاۋ قاجەتتىگىن ەسكە سالىپ تۇراتىن ءرامىز», دەدى ا.بالاەۆا.
رەسەي مادەنيەت ءمينيسترى ولگا ليۋبيموۆا ەكى ەل اراسىنداعى مادەني بايلانىستاردى نىعايتۋعا نيەتتى ەكەنىن ايتتى.
«دوستىق اللەياسىن اشۋ قۇرمەتى ەكى ەلدىڭ مادەنيەت مينيسترلىگىنە بەرىلىپ وتىر. مادەني بايلانىستار, ورتاق قۇندىلىقتار مەن تاريح حالىقتار دوستىعىنىڭ بەرىك تىرەگى ەكەنى ءسوزسىز», دەپ اتاپ ءوتتى و.ليۋبيموۆا.
اللەيادا 200-دەن اسا ەمەن اعاشى مەن 50 مىڭنان اسا كوپجىلدىق ساندىك بۇتا بار. سونداي-اق ەكى ەل اراسىنداعى مادەني-گۋمانيتارلىق بايلانىستاردى نىعايتۋعا ارنالعان ءىس-شارالار اياسىندا «مادەني ديالوگ: قازاقستان – رەسەي» اتتى دوڭگەلەك ۇستەل ءوتتى. القالى جيىنعا قوس ەلدىڭ شىعارماشىلىق جانە عىلىمي زيالى قاۋىمى قاتىستى. جيىن بارىسىندا تەاتر ونەرى, مۋزەي ءىسى, كىتاپحانا سالاسى, كينەماتوگرافيا جانە مادەني ءبىلىم بەرۋ باعىتتارىنداعى بىرلەسكەن جوبالاردى دامىتۋ كەلەشەگى تالقىلاندى.
ەلىمىزدىڭ مادەنيەت جانە اقپارات ءمينيسترى بۇگىندە مادەنيەت كۇندەرىن وتكىزۋگە دايىندىق جۇمىستارى ءجۇرىپ جاتقانىن اتاپ ءوتتى.
«اتالعان ءىس-شارالار اياسىندا ءا.قاستەەۆ اتىنداعى ۇلتتىق ونەر مۋزەيىنىڭ جاۋھار تۋىندىلارىن ۇسىناتىن كورمە وتكىزۋ, وتاندىق بالەت شەبەرلەرىن شاقىرۋ جانە قازاق كينوسىنىڭ كۇندەرىن ۇيىمداستىرۋ جوسپارلانىپ وتىر. بۇل ءىس-شارالار رەسەيدىڭ جەتەكشى ساحنالارىندا – سونىڭ ىشىندە ۇلكەن تەاتردا, ۆاحتانگوۆ تەاترىندا جانە وزگە دە بەدەلدى مادەنيەت وشاقتارىندا وتكىزىلەدى دەپ ۇمىتتەنەمىز. بۇل وقيعالار حالىقتارىمىز اراسىنداعى دوستىق پەن ءوزارا تۇسىنىستىكتىڭ جارقىن بەلگىسىنە اينالادى دەپ سەنەمىز», دەدى مينيستر.
وسى ورايدا رەسەي مادەنيەت ءمينيسترى ولگا ليۋبيموۆا ءار ەلدىڭ مادەني قۇندىلىقتارى وزىندىك ماڭىزعا يە ەكەنىن ايتتى.
«رەسەيدى جانە قازاقستاندى ورتاق تاريح, داستۇرلەر جانە جاي عانا جىلى ادامي قاتىناستار بايلانىستىرادى. ءدال وسى جايت ەكى ەل اراسىنداعى, سونىڭ ىشىندە مادەني ىنتىماقتاستىقتىڭ دا ودان ءارى دامۋىنا قولايلى جاعداي جاسايدى. بۇل ىنتىماقتاستىقتىڭ نەگىزىندە ارقاشان ءبىر-ءبىرىنىڭ مۇددەلەرىنە قۇرمەتپەن قاراۋ جاتادى», دەدى ول.
جيىن بارىسىندا ەكى ەلدىڭ مادەني سالاداعى وكىلدەرى بايانداما وقىدى. سونداي-اق ەكى ەل مينيسترلەرى تۇركى تايپالارىنىڭ ماتەريالدىق جانە رۋحاني مادەنيەتى ۇسىنىلعان كورمەنى تاماشالادى. قولا داۋىرىنەن ورتا عاسىرعا دەيىنگى كەزەڭدى قامتيتىن زەرگەرلىك ونەردىڭ وزىق ۇلگىلەرىنە كۋا بولدى.
اتالعان مادەني ءىس-شارالار ەكى ەل ونەرپازدارى قويعان مۋزىكالىق كەشپەن تۇيىندەلدى. «استانا وپەرا» ساحناسىندا قازاقستان مەن رەسەيدىڭ مادەنيەت قايراتكەرلەرى, حالىقارالىق بايقاۋلاردىڭ لاۋرەاتتارى, اكادەميالىق ونەر جۇلدىزدارى ونەر كورسەتتى.
