14 مامىردا تۇركىستان قالاسىندا سايلاۋ ورگاندارىنىڭ دۇنيەجۇزىلىك قاۋىمداستىعىنىڭ (A-WEB) باس حاتشىسى تۇركى مەملەكەتتەرى ۇيىمىنا (تمۇ) مۇشە مەملەكەتتەردىڭ ورتالىق سايلاۋ ورگاندارىنىڭ كونسۋلتاتيۆتىك پلاتفورماسى (وسو كپ) تۋرالى ەرەجەگە قول قويۋ راسىمىنە جانە «تۇركى الەمى: سايلاۋ جۇيەلەرىنىڭ ءداستۇرى, تاجىريبەسى جانە دامۋ بولاشاعى» اتتى حالىقارالىق عىلىمي-پراكتيكالىق كونفەرەنتسياسىنا قاتىسىپ, ءسوز سويلەدى.
16 مامىردا استانا قالاسىندا ورتسايلاۋكومنىڭ كەڭسەسىندە ا-WEB باس حاتشىسى ين-شيك چجانگ قازاقستان ورتالىق سايلاۋ كوميسسياسىنىڭ توراعاسى نۇرلان ابدىروۆپەن كەزدەستى. كەزدەسۋگە وسك مۇشەلەرى, كوميسسيا اپپاراتىنىڭ جانە «قر وسك ينجەنەرلىك-تەحنيكالىق ورتالىعى» رمك قىزمەتكەرلەرى, استانا قالاسى مەن ەلوردالىق اۋدانداردىڭ اۋماقتىق سايلاۋ كوميسسيالارىنىڭ مۇشەلەرى قاتىستى.
كەزدەسۋ بارىسىندا تاراپتار ىنتىماقتاستىقتىڭ نەگىزگى باعىتتارىن تالقىلادى, سايلاۋ وتكىزۋ, سايلاۋ ۇدەرىستەرىندە تسيفرلىق تەحنولوگيالاردى قولدانۋ, سونداي-اق سايلاۋشىلاردى اقپاراتتاندىرۋ جانە سايلاۋ كەزەڭىندە جالعان اقپاراتتىڭ تارالۋ قاۋپى ماسەلەلەرى بويىنشا اقپارات پەن تاجىريبە الماستى.
ورتالىق سايلاۋ كوميسسياسىنىڭ توراعاسى شاقىرتۋدى قابىل العانى ءۇشىن ين-شيك چجانگقا العىس ايتىپ, قاۋىمداستىقپەن جەمىستى ىنتىماقتاستىقتى اتاپ ءوتتى. سونداي-اق باسقا مەملەكەتتەردىڭ سايلاۋ ورگاندارىمەن جانە حالىقارالىق ۇيىمدارمەن ىنتىماقتاستىقتى ودان ءارى كەڭەيتۋگە مۇددەلىلىگى راستالدى.
ءوز كەزەگىندە چجانگ مىرزا قازاقستاننىڭ وسك-سىنە سىندارلى ىنتىماقتاستىق پەن سايلاۋ سالاسىنداعى حالىقارالىق ارىپتەستىكتى دامىتۋعا قوسقان ۇلەسى جانە قازاقستاننىڭ قاۋىمداستىق جۇمىسىنداعى بەلسەندى ءرولى ءۇشىن العىسىن ءبىلدىرىپ, ەلىمىزدىڭ سايلاۋدى وتكىزۋدەگى اشىقتىق پەن ينكليۋزيۆتىلىك قاعيداتتارىن ۇستاناتىنىن باسا ايتتى. ول سونداي-اق قازاقستان پرەزيدەنتى قاسىم-جومارت توقاەۆتىڭ جەتەكشىلىگىمەن سايلاۋ جۇيەسىن جانە دە جالپى ەلدى دامىتۋداعى قازاقستاننىڭ كۇش-جىگەرىن جوعارى باعالادى.
«قازاقستاننىڭ ورتالىق سايلاۋ كوميسسياسىن ءبىز ءۇشىن تۇركى الەمىنە قاقپا دەپ سانايمىز. تابىستى ىنتىماقتاستىق ءۇشىن ءبىرىنشى كەزەكتە تەحنولوگيالارمەن الماسۋىمىز كەرەك. تۇركى مەملەكەتتەرى ۇيىمىنىڭ سايلاۋ ورگاندارىنىڭ كونسۋلتاتيۆتىك پلاتفورماسى ءبىزدىڭ ۇرپاق ءۇشىن عانا ەمەس, كەلەسى ۇرپاق ءۇشىن دە جاقسى تەتىك بولادى دەپ سەنەمىن. بۇل پلاتفورما قازاقستانمەن, ونىڭ ىشىندە تۇركى الەمى ەلدەرىمەن ىنتىماقتاستىعىمىزدى جۇيەلەيدى. سوندىقتان ءبىز تىعىز ءوزارا ءىس-قيمىل ءۇشىن جاقسى تەتىك قۇرعانىمىزعا وتە ريزامىز», دەدى Cايلاۋ ورگاندارىنىڭ دۇنيەجۇزىلىك قاۋىمداستىعىنىڭ باسشىسى.
سونىمەن قاتار چجانگ مىرزا سايلاۋ سالاسىنداعى جاھاندىق ترەندتەر, سايلاۋ ۇدەرىسىن تسيفرلاندىرۋ تۋرالى ايتا كەلە, بۇل ماسەلە بويىنشا قوعامدا كونسەنسۋستىڭ بولماۋىنا جانە سايلاۋشىلاردىڭ تسيفرلىق سايلاۋ تەحنولوگيالارىنا سەنىمسىزدىگىنە بايلانىستى كورەيانىڭ ەلەكتروندى داۋىس بەرۋ جۇيەلەرىن قولدانبايتىنىنا توقتالدى.
كەزدەسۋ اشىق, دوستىق جانە كاسىبي تۇردە ءوتتى. كەزدەسۋ بارىسىندا تاراپتار ەكىجاقتى ديالوگتى, سايلاۋدى ۇيىمداستىرۋ, وتكىزۋ ماسەلەلەرى بويىنشا اقپارات جانە تاجىريبە الماسۋدى جالعاستىرۋعا نيەتتى ەكەنىن راستادى. سوڭىندا نۇرلان ءابدىروۆ ين-شيك چجانگقا قازاقستان ورتالىق سايلاۋ كوميسسياسىنىڭ 30 جىلدىعىنا ارنالعان «كونستيتۋتسيالىق رەفورما جانە سايلاۋ جۇيەسى» حالىقارالىق كونفەرەنتسياسىنىڭ ماتەريالدار جيناعىن تابىس ەتتى.
