ول «تۇركىستان ساقشىلارى» تۋىندىسىن دايىنداۋ بارىسىندا «ChatGPT», «RunwayML», «Kling Ai», «Hydra AI», «ElevenLabs» سىندى جي باعدارلامالارىنىڭ كومەگىنە جۇگىنگەن. ءمۋلتفيلمنىڭ باستى كەيىپكەرلەرى رەتىندە اقپانتەر – بارىس, التىنقانات – قىران, تاسباتىر اتا – عاسىر جاساعان اقىلگوي تاسباقا بەينەلەرى تاڭدالعان. تولىققاندى 3D فورماتتاعى مۋلتفيلم سيۋجەتى ەلىمىزدىڭ رۋحاني ورداسىن قاساڭ وي, تەرىس ارەكەتتەردەن قورعاۋ توڭىرەگىندە ءوربيدى.
IT ماماننىڭ انيماتسياداعى بۇل ايتۋلى جاڭالىعى – سالا كوكجيەگىن كەڭەيتۋدىڭ تىڭ ءتاسىلى. جالپى, مۋلتفيلم «ينەمەن قۇدىق قازعانداي» ەڭبەكپەن جاسالاتىنى بارشاعا ايان. ال جاساندى ينتەللەكت انيماتسياداعى اۋىردى جەڭىلدەتىپ, ميلليونداعان قارجىنى قالتادا قالدىرۋعا وڭ ۇلەس قوسا الادى. جي-ءدىڭ جەتىلدىرىلگەن نۇسقاسىن كادەگە جاراتقان عاسىر قۇرالباي ۇلى باستامانى جۇزەگە اسىرۋعا تۇرتكى بولعان وي مەن جاساندى زەردەنىڭ قازاق ءتىلىن قانشالىقتى مەڭگەرگەنىن تارقاتا ايتتى.
«ChatGPT»-ءدىڭ كەيىنگى جاڭارتۋىنان سوڭ قالىڭ وي قۇشاعىندا قالدىم. بۇرىن عالىمداردىڭ بولاشاقتا كينوتەاترلاردا جي ارقىلى جاساعان مۋلتفيلم, كينولاردى عانا كورەمىز دەگەنىنە تاڭىرقاي قارايتىنمىن. وسى يدەيانى باسشىلىقتىڭ قاپەرىنە سالىپ, ەلىمىزدە قازاق تىلىندە ءبىرىنشى بولىپ جي ارقىلى مۋلتفيلم جاساپ شىعارۋدى ۇسىندىم. وعان «Turkistan» تەلەارناسىنىڭ باسشىلىعى قولداۋ ءبىلدىرىپ, اقىلى جي جازىلىمدارىنا قارجى ءبولدى. وسىدان كەيىن ىسكە كىرىسىپ, «تۇركىستان ساقشىلارىن» جارىققا شىعاردىق», دەپ اتاپ وتكەن ول ءمۋلتفيلمنىڭ باستى كەيىپكەرلەرى رەتىندە بارىس, قىران تەكتەن-تەك تاڭدالماعانىن ايتتى.
«بارىس پەن قىران ەلىمىزدىڭ «قىزىل كىتابىنا» ەنگەن. سوندىقتان ەرەكشە قاستەرلەيمىز. ءبىر جاعىنان, تۋىمىزدا بەينەلەنگەن قىراندى ناسيحاتتاۋدى دا كوزدەدىك. الداعى ۋاقىتتا شىعارعالى وتىرعان 10 سەريا تۇركىستان ءوڭىرىنىڭ ومىرىمەن تىعىز بايلانىستى كەيىپكەرلەرمەن تولىعادى. مەنىڭشە, بولاشاقتا ميلليونداعان اقشاعا 6–7 ايلاپ مۋلتفيلم جاسايتىن ءداۋىر باستان كوشەدى. جي ارقىلى كەز كەلگەن ۋاقىتتا ءار كەيىپكەردى وزگەرتە الامىز», دەدى مۋلتفيلم اۆتورى.
عاسىر بۇل ءمۋلتفيلمدى جاساۋعا باس-اياعى 10 كۇنىن ارناعان. انيماتسيانىڭ ساۋندترەگىن اقىن قۇرال كومەك جازسا, كەيىپكەرلەردى تۇركىستان تەاترىنىڭ اكتەرلەرى دىبىستاعان. اۆتوردىڭ ايتۋىنشا, جي ارقىلى مۋلتفيلم جاساۋ وتاندىق كونتەنتكە دە سەرپىلىس بەرەدى. ول ءۇشىن جاساندى زەردەدە قازاقتىڭ ءتول ارىپتەرىن ءجيى قولدانىپ, ونى مەڭگەرۋىنە جۇمىلا كىرىسكەن ءجون.
ء«مۋلتفيلمدى جاساۋ بارىسىندا ءتول ارىپتەرىمىزدى بەينەلەۋدە جي ءالى بىردەن تۇسىنە قويمايتىنىن اڭعاردىق. پرومتتى تۇرلەندىرىپ نەمەسە ارنايى ديزاينمەن بۇل كەدەرگىلەردى ەڭسەرۋگە تىرىستىق. كەيدە جي ءوزىڭ قالاعان ارەكەت نەمەسە ميميكانى ءدوپ بەرە الماي جاتتى. سوندا دا بولاشاقتا پرومتتار وڭدەلىپ, قايتا وقىلىپ, ساپالى بەينەلەر شىعاتىنىنا سەنەمىن. سونداي-اق جوبانى «Youtube» پلاتفورماعا اپتا سايىن شىعارىپ, تۇراقتى مونەتيزاتسياعا قوسىلۋ اۆتورعا – پايدا, وقىرمانعا ساپالى كونتەنت بولماق», دەپ اتاپ ءوتتى ول.
«تۇركىستان ساقشىلارى» تۋىندىسىنان كەيىن وقۋشىلار اراسىندا جي ارقىلى مۋلتفيلم جاساۋعا قىزىعۋشىلىق ارتقانىن جەلىدە جازىلعان پىكىرلەردەن بايقادىق. عاسىر وسى باعىتتا جۇمىس ىستەگىسى كەلەتىندەرگە يدەيا تۇرعىسىنان تەرەڭىرەك ىزدەنىپ, الەمدىك, وتاندىق ۇزدىك مۋلتفيلمدەردى كوبىرەك كورۋگە كەڭەس بەردى. ال ەلىمىزدەگى جي ارقىلى جاسالعان تۇڭعىش ءمۋلتفيلمنىڭ اۆتورى مۇنىمەن توقتاپ قالماي, بالالاردىڭ بويىندا ءور رۋحتى وياتىپ, قازاقى ءتالىم-تاربيەنى سىڭىرەتىن بىرقاتار ساپالى مۋلتفيلم شىعارۋدى جوسپارلاپ وتىر. قازىردىڭ وزىندە ءمۋلتفيلمنىڭ 2-سەرياسى 4 مينۋتتان 12 مينۋتقا كوبەيىپ,«تۇركىستانعا تونگەن قاراجەلەڭ» اتاۋىمەن كورەرمەنگە جول تارتىپ ۇلگەردى.
