ءمينيستردىڭ ايتۋىنشا, وتباسى كۇنى – وتىز جىلدان استام ۋاقىت بويى وتباسى ۇعىمىنىڭ قاستەرلىلىگىن ەسكە سالىپ, ونىڭ قوعامداعى ءرولىن دارىپتەپ كەلە جاتقان ەرەكشە مەيرام. بىرىككەن ۇلتتار ۇيىمىنىڭ باستاماسىمەن بەكىتىلگەن بۇل كۇن مەيىرىم, ماحاببات, قامقورلىق سىندى ادامي قۇندىلىقتاردى ۇلىقتاۋعا مۇمكىندىك بەرەدى.
بۇگىندە ەلىمىزدە 6,2 ميلليوننان استام وتباسى بار. ايدا بالاەۆا وتباسى ينستيتۋتىن قولداۋ – قازاقستان ءۇشىن تەك باسىم باعىت ەمەس, سونىمەن قاتار ەلدىڭ تۇراقتى دامۋىنىڭ بەرىك نەگىزى ەكەنىن اتاپ ءوتتى. انا مەن بالانى قورعاۋ ماسەلەسىنە ايرىقشا ءمان بەرىلىپ, وتباسىنىڭ قاۋىپسىز ءارى جايلى ءومىر ءسۇرۋى ءۇشىن بارلىق جاعداي جاسالىپ وتىر.
مينيستر, اسىرەسە, جاس وتباسىلارعا ەرەكشە قولداۋ كورسەتۋدىڭ ماڭىزدىلىعىنا توقتالدى. ايەلدەر مەن بالالاردىڭ قۇقىعىن قورعاۋعا ارنالعان زاڭنامالار تۇراقتى تۇردە جەتىلدىرىلىپ, الەۋمەتتىك جاردەماقىلار مەن بالا كۇتىمىنە ارنالعان تولەمدەر ارقىلى ناقتى قولداۋ كورسەتىلۋدە. قازىرگى ۋاقىتتا ەلىمىزدە 112 وتباسى قولداۋ ورتالىعى جۇمىس ىستەپ تۇر. بۇل ورتالىقتار ازاماتتارعا پسيحولوگيالىق, قۇقىقتىق جانە الەۋمەتتىك كومەك كورسەتىپ, ومىرلىك ماڭىزدى ماسەلەلەردى شەشۋگە كومەكتەسۋدە.
«وتباسى – بۇل تەك قوعامنىڭ ءبىر بولشەگى ەمەس. بۇل – تۇلعانىڭ تاربيەسى مەن قۇندىلىقتارىنىڭ قالىپتاساتىن اياۋلى مەكەنى. وتباسى بەرىك بولسا – مەملەكەت تە مىقتى بولادى», دەدى ايدا بالاەۆا.
مينيستر سونداي-اق ۇرپاعىنا ۇلتتىق تاربيە مەن وتباسى قۇندىلىقتارىن دارىتىپ وتىرعان اتا-انالارعا شىنايى العىسىن ءبىلدىرىپ, ءار شاڭىراققا اماندىق, مولشىلىق پەن بىرلىك تىلەدى.
ايتا كەتەيىك, ءدال وسى كۇنى «مەرەيلى وتباسى» ۇلتتىق بايقاۋىنا ءوتىنىم قابىلداۋ باستالدى. ايدا بالاەۆا بارلىق ءوڭىر تۇرعىندارىن بايقاۋعا بەلسەندى قاتىسۋعا شاقىردى.
«ءبىزدىڭ ەلىمىزدە ونەگەلى ءومىر سالتىن ۇستانىپ, ءوز تاعىلىمى ارقىلى وزگەلەرگە ۇلگى بولا الاتىن وتباسىلار جەتەرلىك. مۇنداي وتباسىلاردىڭ تاجىريبەسى كوپشىلىككە شابىت سىيلايدى», دەدى مينيستر.
سونىمەن قاتار, وتباسى كۇنىنە ارنالعان ونلاين-چەللەندج دە باستاۋ الدى. مينيستر قازاقستاندىقتاردى #وتباسىكۇنى2025 جانە #دەنسەمي2025 حەشتەگتەرىمەن جۇرەككە جىلى ەستەلىكتەر, فوتولار مەن وتباسىلىق داستۇرلەرمەن بولىسۋگە شاقىردى.
