كەشە «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ, «نۇر وتان» پارتياسى جانىنداعى سىبايلاس جەمقورلىققا قارسى ءىس-قيمىل بويىنشا رەسپۋبليكالىق قوعامدىق كەڭەستىڭ توراعاسى قايىربەك سۇلەيمەنوۆتىڭ, الماتى قالالىق پارتيا فيليالىنىڭ توراعاسى, الماتى قالاسىنىڭ اكىمى احمەتجان ەسىموۆتىڭ, جەمقورلىققا قارسى ءىس-قيمىل بويىنشا وڭىرلىك كەڭەستەردىڭ جەتەكشىلەرىنىڭ قاتىسۋىمەن «نۇر وتان» پارتياسىنىڭ 2015-2025 جىلدارعا ارنالعان سىبايلاس جەمقورلىققا قارسى ءىس-قيمىل باعدارلاماسىن ىسكە اسىرۋ بويىنشا وڭىرلىك كەڭەستەردىڭ مىندەتتەرى تۋرالى» رەسپۋبليكالىق سەمينار-كەڭەس ءوتتى.
«نۇر وتان» پارتياسىنىڭ XVI سەزىندە مەملەكەت باسشىسى, پارتيا توراعاسى ن.ءا.نازارباەۆ ەلىمىزدى ءارى قاراي جاڭعىرتۋ ءۇشىن «5 ينستيتۋتتىق رەفورما» ۇسىنعانى ءمالىم. ونى ىسكە اسىرۋ ءۇشىن «100 ناقتى قادام – ۇلت جوسپارى» قابىلداندى, ونى ورىنداۋ قازاقستاننىڭ الەمدەگى ەڭ دامىعان 30 ەلدىڭ قاتارىنا قوسىلۋىنا مۇمكىندىك تۋعىزادى. سونىمەن قاتار, اتالعان رەفورمالاردى ىسكە اسىرۋ مەملەكەتتىك اپپاراتتاعى جانە الەۋمەتتىك سالاداعى سىبايلاس جەمقورلىقتىڭ الدىن الۋسىز مۇمكىن ەمەس.
وسى ورايدا, قوعامدا سىبايلاس جەمقورلىققا اتىمەن توزبەۋشىلىكتى جانە جەمقورلىققا قارسى مادەنيەتتى قالىپتاستىرۋعا عانا ەمەس, سونداي-اق, ازاماتتىق قوعام ينستيتۋتتارىنىڭ سىبايلاس جەمقورلىققا قارسى ءىس-قيمىلعا قاتىسۋىن زاڭنامالىق تۇرعىدا قامتاماسىز ەتۋدى كوزدەيتىن «نۇر وتان» پارتياسىنىڭ 2015-2025 جىلدارعا ارنالعان باعدارلاماسى ەرەكشە ماڭىزعا يە بولا تۇسەدى.
سەمينار-كەڭەسكە قاتىسۋشىلاردىڭ الدىندا ءسوز سويلەگەن «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك قۇرىلعان كەزدەن باستاپ «نۇر وتان» پارتياسىنىڭ سىبايلاس جەمقورلىققا قارسى ماقساتى ايقىن تۇراقتى جۇمىس جۇرگىزىپ كەلە جاتقانىن, ال مەملەكەت باسشىسىنىڭ قاتىسۋىمەن وتكەن پارتيا ساياسي كەڭەسىنىڭ كەڭەيتىلگەن وتىرىسىندا قابىلدانعان 2015-2025 جىلدارعا ارنالعان باعدارلامانىڭ سىبايلاس جەمقورلىققا قارسى مەملەكەتتىك ستراتەگيانىڭ يدەولوگيالىق وزەگىنە اينالعانىن اتاپ ءوتتى.
«5 رەفورمانى ىسكە اسىرۋ قازاقستان مەملەكەتتىلىگىن نىعايتۋ, ليبەرالدىق قوعامدى دامىتۋ, «قازاقستان-2050» ستراتەگياسىن ورىنداۋ, سونداي-اق, جەمقورلىققا جول بەرمەۋ مەن مەملەكەتتىك اپپاراتتىڭ اشىقتىعىن ارتتىرۋ ءۇشىن شىنايى جاعدايلار تۋعىزادى.
سونىمەن بىرگە, قوعامنىڭ بەلسەندى قاتىسۋىنسىز, تەك مەملەكەتتىڭ كۇشىمەن عانا سىبايلاس جەمقورلىقپەن كۇرەسۋ تيەسىلى ناتيجە بەرمەيدى. مەملەكەت پەن قوعام جەمقورلىققا قارسى بىرىڭعاي مايدان بولىپ قارسى شىعۋى ءتيىس», – دەپ اتاپ ءوتتى سويلەگەن سوزىندە ب.بايبەك.
پارتيا توراعاسىنىڭ ءبىرىنشى ورىنباسارى سىبايلاس جەمقورلىققا قارسى ءىس-قيمىل جونىندەگى قوعامدىق كەڭەستىڭ سىبايلاس جەمقورلىق كورىنىستەرىن جويۋ, بارلىق مەملەكەتتىك ورگانداردىڭ قىزمەتىن تەرەڭ تالداۋ جانە قوعامدىق پارتيالىق باقىلاۋدى جۇزەگە اسىرۋ بويىنشا تۇبەگەيلى شارالارعا ارنالعان پارتيانىڭ ارقاۋلىق الاڭى ەكەنىن باسا ايتتى.
سىبايلاس جەمقورلىققا قارسى ءىس-قيمىل جونىندەگى قوعامدىق كەڭەستەردىڭ باسشىلارىنا بپۇ-نىڭ سىبايلاس جەمقورلىققا قارسى قىزمەتىندە تۇراقتى ادىستەمەلىك جانە تاجىريبەلىك كومەكتى ۇيىمداستىرۋ تاپسىرىلدى. جاستاردىڭ «جاس وتان» جاستار قاناتىنىڭ جۇمىسىنا ەرەكشە نازار اۋدارۋ قاجەت, ويتكەنى, جاستار اراسىنداعى ونىڭ بەلسەندىلىگىنەن سىبايلاس جەمقورلىققا قاتىستى ولاردىڭ كوزقاراسىنىڭ قانداي بولاتىنى ايقىندالادى.
پارتيانىڭ جارعىسى مەن دوكتريناسىنا سايكەس, بۇگىنگى كۇنى «نۇر وتان» پارتياسى مۇشەسىنىڭ ادەبى كودەكسىنىڭ جوباسى ازىرلەندى. پارتيا مۇشەسىنىڭ ادەپ كودەكسىنىڭ باستى ماقساتى پارتيا مۇشەسى مىنەز-قۇلقىنىڭ مورالدىق-ادامگەرشىلىك ەتالوندارىن كۇشەيتۋ, قازاقستاندىق ءپاتريوتيزمدى, پارتيالىق ءتارتىپتى نىعايتۋ جانە قوعام تاراپىنان پارتياعا دەگەن سەنىمدى جوعارىلاتۋ بولىپ تابىلادى. پارتيا مۇشەسىنىڭ ادەپ كودەكسى باستاۋىش پارتيا ۇيىمدارىنا تالقىلاۋعا جىبەرىلدى.
سەمينار-كەڭەس بارىسىندا «نۇر وتان» پارتياسى جانىنداعى رەسپۋبليكالىق قوعامدىق كەڭەس توراعاسى قايىربەك سۇلەيمەنوۆ سىبايلاس جەمقورلىققا قارسى ءىس-قيمىل بويىنشا قوعامدىق كەڭەستەردىڭ پارتيانىڭ جەمقورلىققا قارسى باعدارلاماسىنىڭ, سونداي-اق, پارتيا توراعاسىنىڭ «نۇرلى جول – بولاشاققا باستار جول» قازاقستان حالقىنا جولداۋىندا باياندالعان ۇلتتىق قوردان بولىنەتىن قارجىنىڭ جۇمسالۋىن باقىلاۋدى قامتاماسىز ەتۋ بويىنشا تاپسىرماسىنىڭ ىسكە اسىرىلۋىنا قاتاڭ باقىلاۋ جۇرگىزىپ وتىرعانىن اتاپ ءوتتى.
بۇگىنگى كۇنى سىبايلاس جەمقورلىققا قارسى ءىس-قيمىل بويىنشا پارتيانىڭ جۇمىس ىستەيتىن ينستيتۋتتارى پايدا بولدى. سىبايلاس جەمقورلىققا قارسى باعدارلامانى ىسكە اسىرۋدىڭ قادامدىق تەتىكتەرى رەتىندە جول كارتاسى مەن ءىس-شارالار جوسپارى بەكىتىلدى.
باعدارلاما شەڭبەرىندە «جەمقورلىقسىز ەل – ءوسىپ-وركەندەگەن ەل» جوباسى ىسكە اسىرىلۋدا, «قوعامدىق باقىلاۋ تۋرالى», «اقپاراتقا قولجەتىمدىلىك تۋرالى» زاڭ جوبالارىمەن بەلسەندى جۇمىس ءجۇرىپ جاتىر, «سىبايلاس جەمقورلىققا قارسى ءىس-قيمىل تۋرالى» جاڭا زاڭ جوباسىن دايىنداۋعا باستاماشىلىق جاسالدى. سونىمەن بىرگە, تۇڭعىش رەت قازاقستاندا جەمقورلىقتى قابىلداۋدىڭ جىل سايىنعى ۇلتتىق يندەكسىن قالىپتاستىرۋ ءۇشىن ادىستەمەلىك ارقاۋ دايىندالۋدا.
قانات ەسكەندىر,
«ەگەمەن قازاقستان».
الماتى.
