تەمىر مەن بەتون بۇيىمدارىنىڭ 200-دەن استام ءتۇرىن شىعاراتىن سەرىكتەستىك ونىمىنە سۇرانىس قاي كەزدە دە تولاستاعان ەمەس. وندىرىلەتىن ونىمدەر قاتارىندا كوپ ءبولىمدى جابىن جانە تاسپالىق ىرگەتاس تاقتالارى, قابىرعا بلوكتارى, تەمىر-بەتون ماڭدايشالار, دوڭگەلەك شەڭبەرلەر بار.
وڭىردەگى كوپقاباتتى تۇرعىن ۇيلەر مەن كوپىرلەر, ءتۇرلى گيدروتەحنيكالىق نىساندار قۇرىلىسىندا قولتاڭباسى بار كاسىپورىنداعى قۇرىلعىلاردىڭ دەنى رەسەيدەن جەتكىزىلىپتى.
ءبىز ارماتۋرا تسەحىنداعى قىزۋ جۇمىس ۇستىنەن تۇستىك. جۇمىسشىلار توقىلعان تەمىرلەر ۇستىنە تسەمەنت قۇيىپ, قاربالاسقان تىرلىكتەن باس الماي جاتتى. كاسىپورىن بىلتىر 1 ملرد 995 ملن تەڭگەنىڭ ءونىمىن ءوندىرىپتى. بيىلعى مەجە – 2 ملرد 113 ملن تەڭگە.
كاسىپورىن ەڭ الدىمەن شيكىزات ساپاسىنا ءمان بەرەدى. جاڭاقورعاننىڭ تاسى, ىرگەدەگى تاسبوگەتتىڭ قۇمى مەن شيەلىدەن جەتكىزىلەتىن تسەمەنت ساپاسى مۇقيات تەكسەرىلەدى. رەسەيدەن اكەلىنەتىن ارماتۋرا دا سىناقتان وتەدى. ونىڭ مورت سىناتىن تۇرلەرى كادەگە اسپايدى. وسىنداي ىرىكتەۋدەن كەيىن عانا شيكىزاتتار ءونىم شىعارۋعا پايدالانىلادى.
«قازىر ءبىز كۇنىنە 150 تەكشە مەتر تەمىر-بەتون ونىمدەرىن قۇيىپ جاتىرمىز. بىزدەن شىققان ەلەكتر جەلىلەرى باعانالارى اتىراۋ مەن ماڭعىستاۋ وبلىستارىندا سۇرانىسقا يە. كەز كەلگەن تاپسىرىستى ورىنداۋعا دايارمىز. جەكەلەر تاپسىرىس بەرىلسە, قاجەتتى ءپىشىندى ءوزىمىز جاساپ, دەر ۋاقىتىندا دايىنداپ بەرەمىز. شىققان ءونىمدى لابوراتوريامىز بەن تەحنيكالىق باقىلاۋ ءبولىمى قاداعالايدى. تاپسىرىس بەرۋشىگە ءونىمنىڭ سەرتيفيكاتىن دا ۇسىنامىز», دەيدى زاۋىتتاعى ءوندىرىس باسشىسى امانباي جۇمابەكوۆ.
جۇمىسىن بەتونشىدان باستاعان امانباي جۇمابەكوۆ وسى زاۋىتتا 1977 جىلدان بەرى ەڭبەك ەتىپ كەلەدى. 1994–2005 جىلدار ارالىعىندا ءوندىرىس ورنى توقتاپ قالىپ, باسقا سالاعا ويىسقانىمەن زاۋىت اشىلعاندا العاشقىلاردىڭ ءبىرى بولىپ بايىرعى جۇمىسىنا ورالىپتى.
كاسىپورىندا جالاقى تۇراقتى. الەۋمەتتىك جاعداي تولىق جاسالعان. قىس سۋىعىندا جۇمىسىن توقتاتاتىندىقتان جۇمىسشىلارعا ەڭبەك دەمالىسىنان بولەك قاجەتتى ازىق-ت ۇلىك تە جەتكىزىلىپ بەرەدى. تاعى ءبىر ەرەكشەلىك – مۇنداعى 120 جۇمىسشىنىڭ 30%-ى – قىز-كەلىنشەكتەر. تەحنولوگتەن باستاپ ينجەنەرلىك-تەحنيكالىق قۇرامدا قىزمەت ەتەتىن ولاردىڭ اراسىندا كراننىڭ بارلىعىن جەتىك مەڭگەرىپ العاندار كوپ.
ء«وندىرىس اۆتوماتتاندىرىلعانمەن دە قولعا كۇرەك ۇستاماي تۇرا المايمىز. وسىنى اۋىرسىناتىن جاستاردىڭ بۇل جۇمىسقا جولاعىسى جوق. كوبى ماڭداي تەرلەتپەي ميلليونەر بولعىسى كەلەدى. كەيىنگى تولقىن اراسىندا كەڭ كولەمدە ناسيحات جۇرگىزىلۋى كەرەك. قوعامدا ەڭبەكقورلىق, كاسىبيلىك سياقتى قاسيەتتەر وتە جوعارى باعالانۋعا ءتيىس. ءوز كاسىبىن جەتىك مەڭگەرگەن ماماندار ۇلت ساپاسىن ارتتىرادى. سوندىقتان ءبىز ەڭبەك ادامىنىڭ مارتەبەسىن كوتەرىپ جاتىرمىز. بۇل باعىتتاعى جۇمىس توقتامايدى, جالعاسا بەرەدى دەگەن مەملەكەت باسشىسىنىڭ باستاماسى بىزگە كوپ ءۇمىت سىيلاپ وتىر. مامان دايىنداۋدا دا قيىندىقتار جوق ەمەس. مىسالى وسى وندىرىستەگى 12 كراندى ايەلدەر باسقارادى. ولاردىڭ اراسىنداعى ەڭ ۇلكەنى 1975 جىلدان بەرى جۇمىس ىستەپ كەلەدى. ەلۋ جىلعى جۇمىس تا ادامدى قاجىتاتىنى انىق قوي. بىراق ولاردى الماستىراتىن كادر تابۋ قيىن. ءبىزدىڭ وبلىستا كوپ جىلدان بەرى وندىرىسكە قاجەتتى كرانشىلاردى مەڭگەرەتىن مامان دايىنداۋدى جىلى جاۋىپ قويدىق. بۇرىن ولاردى وزىمىزدەگى 3-4 وقۋ ورنى ازىرلەيتىن. وسى ماسەلەنى سان مارتە كوتەردىك. ايماقتاعى 5-6 كاسىپورىن ءۇشىن شاعىن توپ جاساقتاپ, بولاشاق كرانشىلاردى دايىنداۋعا ابدەن بولادى. بىراق وسى جاعى ءالى ەسكەرىلمەي كەلەدى», دەيدى ءوندىرىس باسشىسى.
قىزىلوردا
