سۋرەت: primeminister.kz
باسقوسۋدا وڭىرلىك ساياساتتى ىسكە اسىرۋدىڭ جاڭا تاسىلدەرى جان-جاقتى قاراستىرىلدى. ورتالىق تاراپىنان الەۋمەتتىك جانە باسقا ينفراقۇرىلىمدى باسىم تۇردە قارجىلاندىرۋ نەعۇرلىم دامىعان وبلىستارمەن الشاقتىقتى قىسقارتۋ ءۇشىن ارتتا قالعان وڭىرلەرگە باعىتتالاتىنى اتاپ ءوتىلدى. سونداي-اق بيزنەستى دامىتۋ ءۇشىن «اۋىل اماناتى» باعدارلاماسى جەلىسى بويىنشا قارجىلاندىرۋ وڭىرلەرگە قوسىلعان قۇن تىزبەگىنە قاتىساتىن جانە قاجەتتى شيكىزات الەۋەتى مەن وتكىزۋ نارىقتارى بار ناقتى جوبالارعا بەرىلەدى.
2028 جىلعا دەيىن اتالعان ءۇش وڭىردە اگروونەركاسىپ كەشەنى, تاۋ-كەن مەتاللۋرگيا سالاسى, تۋريزم جانە قايتا وڭدەۋ باعىتىندا 6,5 ترلن تەڭگەگە 102 ينۆەستيتسيالىق جوبانى ىسكە اسىرۋ جوسپارلانىپ وتىر. قايتا وڭدەۋ وندىرىستەرىن, شوب كلاستەرلەرىن جانە كاتونقاراعاي, باياناۋىل, زايسان, الاكول, ءشۇلبى سۋ قويماسى سياقتى تۋريستىك ايماقتاردى دامىتۋ قاجەتتىگى اتالدى.
سونىمەن قاتار ترانسشەكارالىق اعىنداردى ەسكەرە وتىرىپ, رەسەي مەن قىتاي نارىعىنا شىعۋ مۇمكىندىگى بار وڭىرلەردىڭ كولىك-لوگيستيكالىق الەۋەتىن پايدالانۋ ماڭىزدى.
اۋىلدار مەن مونوقالالاردى قولداۋ ماسەلەسىنە ەرەكشە نازار اۋدارىلدى. «اۋىل اماناتى» جوباسى اياسىندا «Amanat» پارتياسى مەن ءوڭىر اكىمدىكتەرى اۋىلداردى سارالاپ, ولاردىڭ ماماندانۋىن ايقىندادى. ۆيتسە-پرەمەر اۋىلشارۋاشىلىق كووپەراتيۆتەرىن قۇرۋدى جانە سكرينينگ ناتيجەسىنە ساي اۋىلداردا شاعىن ونەركاسىپتىك ايماقتار قالىپتاستىرۋدى تاپسىردى.
كەڭەس بارىسىندا اباي وبلىسىنىڭ اكىمى بەرىك ءۋالي, پاۆلودار وبلىسىنىڭ اكىمى اسايىن بايحانوۆ جانە شىعىس قازاقستان وبلىسىنىڭ اكىمى نۇرىمبەت ساقتاعانوۆ ەسەپ بەردى. وتىرىس قورىتىندىسى بويىنشا ءوڭىر اكىمدىكتەرى مەن سالالىق مينيسترلىكتەرگە بىرقاتار تاپسىرما بەرىلدى.
