قازاق-اۋعان تاراپتارى ىنتىماقتاستىقتى ارتتىرۋعا نيەتتى

قازاقستان اۋعانستانعا گۋمانيتارلىق كومەكتىڭ وا-داعى ءىرى جەتكىزۋشىسى

2021 جىلدان بەرى قازاقستان اۋعانستانعا ونداعان مىڭ توننا ۇن, ازىق-ت ۇلىك, ءدارى-دارمەك, تۇرمىستىق زات پەن جىلى كيىم جىبەرگەن. سونىمەن قاتار بيىل ناۋرىز ايىندا الماتىدا ورنىقتى دامۋ ماقساتتارى بويىنشا ورتالىق ازيا مەن اۋعانستان ەلدەرىنە ارنالعان بۇۇ ايماقتىق ورتالىعى اشىلدى. سەرىك جۇمانعارين ابدۋل عاني بارادارمەن كەزدەسۋدە اتاپ وتكەندەي, ايماقتىق ورتالىقتى قۇرۋداعى نەگىزگى ماقسات – وا ەلدەرىنىڭ اۋعانستانمەن الەۋمەتتىك-ەكونوميكالىق جانە ىسكەرلىك ىنتىماقتاستىعىن جانداندىرۋ. ورتالىق ازيا ەلدەرى قازاقستاننىڭ باستاماسىنا قولداۋ ءبىلدىردى.

ءارتاراپتاندىرۋ ەسەبىنەن تاۋار اينالىمى $3 ملرد-تى قۇرادى

قازاقستان اۋعانستاننىڭ نەگىزگى ساۋدا سەرىكتەستەرىنىڭ وندىعىنا كىرەدى. استىق پەن ۇن وتاندىق ءداستۇرلى تاۋارلار سانالادى. 2024 جىلى اۋعانستان نارىعىنا وتاندىق قانت ەكسپورتىنىڭ ايتارلىقتاي ءوسۋى بايقالدى – 143 مىڭ توننا. بۇل 2023 جىلمەن سالىستىرعاندا بىرنەشە ەسە كوپ (19,1 مىڭ توننا). اۋعانستان نارىعىنا كونديتەرلىك جانە ۇن ءونىمىن جەتكىزۋ كورسەتكىشى ارتىپ كەلەدى. قازاقستان سونداي-اق ەرتە پىسەتىن اۋعان كوكونىسىن ەلوردا بازارىنا جەتكىزۋگە مۇددەلى.

وتكەن جىلدىڭ سوڭىندا ەكى ەل تاۋار اينالىمىن $3 ملرد-قا ۇلعايتۋ جونىندەگى جول كارتاسىنا قول قويىلدى. اۋعانستان اۋماعىندا ءتۇرلى پايدالى قازبا ءوندىرۋدىڭ وراسان زور الەۋەتىن ەسكەرە وتىرىپ, ءوزارا ينۆەستيتسيانىڭ مالىمدەلگەن كولەمىنە اۋعانستان كەن ورنىنىڭ رەسۋرسىن بارلاۋ مەن ءوندىرۋ ەسەبىنەن قول جەتكىزۋ جوسپارلانىپ وتىر. وتاندىق بيزنەس جەر قويناۋىنىڭ پەرسپەكتيۆالى ۋچاسكەلەرىن ىزدەۋگە قاراجات سالۋعا ۇلكەن قىزىعۋشىلىق ءبىلدىرىپ وتىر.

14 ساۋىردە اۋعانستانعا قازاقستاننان بارعان گەولوگ-ماماندار, ينجەنەرلەر توبى اۋعانستاننىڭ تاۋ-كەن ونەركاسىبى جانە مۇناي مينيسترلىگىنىڭ قولداۋىمەن بىرقاتار كەن ورنىن ارالادى. قر ونەركاسىپ جانە قۇرىلىس ۆيتسە-ءمينيسترى يران شارحان اتاپ وتكەندەي, ماماندار نۇرستان پروۆينتسياسىندا بەريللي, قورعاسىن, مىرىش تابىلىپ وتىرعان كەن ورىندارىنان 130 كەلى كەن سىناماسىن الدى. ەندى زەرتحانادا نەعۇرلىم ەگجەي-تەگجەيلى تالداۋ ءۇشىن سىنامالار قازاقستانعا جىبەرىلەدى. ناتيجە الىنعاننان كەيىن قازاقستان تاراپى كەن ورنىن ودان ءارى يگەرۋ ءۇشىن نەعۇرلىم اۋقىمدى كەلىسسوز فورماتىنا كىرىسۋگە دايىن.

قازاقستان مەن اۋعانستانداعى جاڭا ساۋدا ۇيلەرى

جول كارتاسىندا بەلگىلەنگەن ءىس-شارالاردى جانداندىرۋ ءۇشىن سەرىك جۇمانعارين اۋعانستان پرەمەر-ءمينيسترىنىڭ ورىنباسارىنا قازاقستاننىڭ كابۋلداعى ساۋدا ءۇيىن اشۋدى ۇسىندى. ابدۋل عاني بارادار بۇل ۇسىنىستى قولداپ, اۋعان تاراپى دا قازاقستاندا ءوزىنىڭ ساۋدا بازارىن اشقىسى كەلەتىنىن اتاپ ءوتتى. سونداي-اق, وتاندىق تاراپتان اۋعان تاراپى مۇددەلى بولعان جاعدايدا «QazTehna» جشس وندىرەتىن قازاقستاننىڭ اۆتوبۋستارىن جەتكىزۋ مۇمكىندىگىن قاراستىرۋ ۇسىنىلدى. جاڭا ساۋدا ۇيلەرى ىنتىماقتاستىقتىڭ ءارتۇرلى باعىتتارى بويىنشا ءوزارا ينۆەستيتسيالاردى جانداندىرۋعا ىقپال ەتەدى.

سونىمەن قاتار سەرىك جۇمانعارين اۋعانستاننىڭ بايلانىس جانە اقپاراتتىق تەحنولوگيالار ءمينيسترى نادجيبۋللا حاككانيمەن كەزدەستى. ول قازاقستان كومپانيالارىنىڭ اۋعانستانداعى ينفراقۇرىلىمدىق جانە تەلەكوممۋنيكاتسيالىق جوبالاردىڭ قۇرىلىسىنا قاتىسۋعا قىزىعۋشىلىق تانىتىپ وتىرعانىن اتاپ ءوتتى. تۋرگۋندي – گەرات جاڭا تەمىرجول تەلىمىن سالۋ كەزىندە وپتيكالىق كابەل توسەۋ جۇمىسىنا بىرلەسىپ قاتىسۋدى ۇسىندى.

ساۋدا جانە ونەركاسىپ ءمينيسترى نۇريددين ازيزيمەن كەزدەسۋدە ەكى ەلدىڭ ءوزارا تاۋار اينالىمىن ءارتاراپتاندىرۋ مۇمكىندىگى تالقىلاندى.