دەنساۋلىق ساقتاۋ مينيسترلىگى ەل تۇرعىندارىنا ەمشارا كابينەتتەرىنەن قىزمەت الۋ بارىسىندا قاۋىپسىزدىك شارالارىن ساقتاۋعا كەڭەس بەرەدى. سەبەبى وسىعان دەيىن تۇسكەن 7 ءوتىنىشتىڭ ارقايسىسى بويىنشا جوسپاردان تىس تەكسەرۋلەر جۇرگىزىلگەن. ناتيجەسىندە ءتيىستى ليتسەنزياسىز مەديتسينالىق قىزمەتتى ىسكە اسىرۋدىڭ 4 فاكتىسى, سەرتيفيكاتتالعان مامانسىز راسىمدىك قىزمەت كورسەتۋدىڭ 3 جاعدايى جانە دارىلىك زاتتاردى ساقتاۋ شارتتارىن بۇزۋدىڭ 2 فاكتىسى تىركەلگەن.
تەكسەرۋ قورىتىندىسى بويىنشا كوميتەتتىڭ اۋماقتىق دەپارتامەنتتەرى اكىمشىلىك جاۋاپكەرشىلىك تۋرالى حاتتامالار تولتىرعان. سالىنعان ايىپپۇلداردىڭ جالپى سوماسى 1 ملن تەڭگەدەن استى. ال سوڭى ولىممەن اياقتالعان جاعداي بويىنشا جامبىل وبلىسىندا قوسىمشا جوسپاردان تىس تەكسەرۋلەر جۇرگىزىلگەن. سايكەسىنشە ءدارى-دارمەكتەر مەن مەديتسينالىق بۇيىمداردى ساقتاۋ قاعيدالارىن ورەسكەل بۇزۋشىلىقتار انىقتالىپتى. انىقتالعان جاعدايلار بويىنشا ماتەريالدار ودان ءارى تەرگەۋ ءۇشىن قۇقىق قورعاۋ ورگاندارىنا بەرىلىپ, وڭىردەگى ەمشارا كابينەتتەرىنىڭ ءبىرى قىزمەتىن رەسمي تۇردە توقتاتقان.
بۇگىندە جامبىل وبلىسىندا 107 ەمشارا كابينەتى جۇمىس ىستەسە, ونىڭ 42-سىندە عانا دارىگەرگە دەيىنگى مەديتسينالىق كومەكتى جۇزەگە اسىرۋعا ليتسەنزياسى بار ەكەن. قولدانىستاعى زاڭناماعا سايكەس ەمشارا كابينەتتەرىن كەز كەلگەن ۋاقىتتا جوسپاردان تىس تەكسەرۋگە مۇمكىندىك جوق. ول ءۇشىن ازاماتتاردىڭ رەسمي وتىنىشتەرى نەمەسە مەملەكەتتىك ورگانداردىڭ سۇراۋ سالۋى قاجەت بولادى. تاعى ءبىر جولى, قۇقىق قورعاۋ ورگاندارىنىڭ تاپسىرمالارى كەزىندە تەكسەرىس جۇرگىزىلۋى مۇمكىن.
دەنساۋلىق ساقتاۋ مينيسترلىگى ەل ازاماتتارىن ەمشارالىق مەديتسينا قىزمەتتەرىنە جۇگىنەردە تەك ليتسەنزيالانعان مەديتسينالىق ۇيىمدارعا حابارلاسۋعا كەڭەس بەرەدى. قىزمەتكەرلەردىڭ ليتسەنزياسى مەن بىلىكتىلىگى بولۋىن ناقتىلاۋدى ەسكەرتەدى.
