فوتو: اشىق دەرەككوز
دۇنيەجۇزىلىك دەنساۋلىق ساقتاۋ ۇيىمىنىڭ باستاماسىمەن جىل سايىن اتالىپ وتەتىن بۇل كۇننىڭ ماقساتى – حالىقتىڭ دەنساۋلىعىن نىعايتۋ جانە سالاۋاتتى ءومىر سالتىن ناسيحاتتاۋ. ەلىمىزدە دە بۇل باعىتتا اۋقىمدى ءىس-شارالار جۇزەگە اسىرىلىپ كەلەدى.
مەملەكەت باسشىسىنىڭ تاپسىرماسىنا سايكەس, رەسپۋبليكا كولەمىندە 500-دەن استام العاشقى مەديتسينالىق-سانيتارلىق كومەك نىساندارى سالىندى. بۇل اۋىلدىق جەرلەردەگى مەديتسينالىق قىزمەتتەردىڭ قولجەتىمدىلىگىن ارتتىرۋعا سەپتىگىن تيگىزەدى.
سونىمەن قاتار, سالاۋاتتى ءومىر سالتىن قالىپتاستىرۋ ماقساتىندا 2023-2025 جىلدارعا ارنالعان ۆەدومستۆوارالىق جول كارتاسى ازىرلەندى. بۇل قۇجات حالىقتىڭ دەنساۋلىق ماسەلەلەرى بويىنشا ساۋاتتىلىعىن ارتتىرۋعا جانە سالاماتتى ءومىر سالتىن ۇستاناتىن ازاماتتاردىڭ ۇلەسىن 30%-عا دەيىن جەتكىزۋگە باعىتتالعان.
ددۇ مالىمەتىنە سايكەس ادام دەنساۋلىعىنىڭ 50%-ى ۇستاناتىن ءومىر سالتىنا بايلانىستى. سوندىقتان زياندى ادەتتەردەن باس تارتىپ, بەلسەندى ءومىر ءسۇرۋ, دۇرىس تاماقتانۋ جانە سترەسستىك جاعدايلاردان اۋلاق بولۋ – ءاربىر ازاماتتىڭ ءوز قولىندا.
