كوللاجدى جاساعان – قونىسباي شەجىمباي, «EQ»
ەسكە الۋ كەشىنە مارقۇمنىڭ تۋىستارى, ۇرپاقتارى, زيالى قاۋىم وكىلدەرى, ولكەتانۋشىلار, تاريحشىلار, ستۋدەنت جاستار, استانا, قوستانايدان ارنايى كەلگەن مەيماندار قاتىستى.
تاعىلىمدى كەشتە قالا اكىمى ءامىرحان اسانوۆ, كونەكوز قاريا تۇرىسبەك ىزتىلەۋوۆ, ءشوپتىباي ءبايدىلدين, بوراش ابەنوۆ, جەرگىلىكتى قازاق جاسوسپىرىمدەر تەاترىنىڭ باس رەجيسسەرى ەربول ءابجالوۆ سىندى زيالى قاۋىم وكىلدەرى ونەر ساڭلاعىنىڭ ءومىرى مەن ادامي بولمىسى جايىندا اڭگىمە ءوربىتتى. تەاتر ءارتىسى, مادەنيەت قايراتكەرى وراز نۇرعالي ايگىلى «گاۋھار تاس» ءانىن ناقىشىنا كەلتىرە ورىنداپ بەردى.
ءانۋار بورانباەۆتىڭ جەكە قۇجاتتارىن كاسىپكەر مارات ياكۋپوۆ مۋزەي باسشىسىنا تابىس ەتتى.
«وسى ۋاقىتقا دەيىن وبلىس مۋزەيلەرىندە ءانۋار اعامىزدىڭ سۋرەتتەرى كورىنىس بەرىپ قالعانىمەن, ەشبىرىندە جەكە زاتتارى جوق ەكەن. سوندىقتان بۇگىندە ءبۇتىن قازاقتىڭ ماقتانىشىنا اينالعان ونەر مايتالمانىنىڭ الاقان ءىزى قالعان قۇندى دۇنيەلەردىڭ مۋزەي قورىنا تاپسىرىلۋىن ءوڭىر رۋحانياتىنداعى ەلەۋلى جاڭالىق دەپ ايتۋعا بولادى. بۇل قۇجاتتار حالىق باتىرى امانگەلدى يمانوۆتىڭ الماس قانجارى, حالىق اقىنى نۇرحان احمەتبەكوۆتىڭ قارا دومبىراسى سياقتى قۇندى مۇرالارمەن بىرگە مۋزەي تورىنەن ورىن الىپ, ۇلتتىق مادەنيەتىمىزدى بايىتىپ تۇراتىن بولادى», دەيدى مۋزەي ديرەكتورى راۋان تەرەك.
قوستاناي وبلىسى
