سۋرەتتەردى تۇسىرگەن نۇربەك يحسان
ۇلىستىڭ ۇلى كۇنى ءاز-ناۋرىز باتىس قازاقستان وبلىسىنىڭ اقجايىق اۋدانىندا بۇكىلحالىقتىق سيپات الدى. اۋدان ورتالىعىندا وتكەن مەرەكەلىك شەرۋگە حالىق كوپ جينالدى.
اۋىلدىڭ ەڭكەيگەن كارىسىنەن ەڭبەكتەگەن بالاسىنا دەيىن ۇلتتىق كيىم كيىپ, مەرەكەنى تويلاۋعا جينالعان ەكەن. اۋىل كوشەلەرىن ارالاپ, سالتاناتپەن ءجۇرىپ وتكەن شەرۋگە اۋدانداعى مەكەمە-ۇيىم ۇجىمدارىمەن بىرگە قاراپايىم اۋىل تۇرعىندارى, نەمەرە-شوبەرەسىن جەتەكتەگەن اتا-اجەلەر دە قاتىستى. ءبىر-بىرىمەن قول الىپ كورىسىپ, « ۇلىس وڭىنان بولسىن! جىلان جىلى تەك جاقسىلىعىمەن كەلسىن!» دەپ اق تىلەگىن اقتارعان حالىقتىڭ پەيىلى اعىل-تەگىل, كول-كوسىر بولدى.
وسى توپتىڭ ىشىندە ءتىلى باسقا بولسا دا تىلەگى ءبىر, ءجۇزى باسقا بولسا دا جۇرەگى ءبىر جەرلەستەرىمىز دە ءجۇر ەكەن.
– وتانىمىز ورتاق, مەرەكە دە بارىمىزگە ورتاق. بۇگىن ناۋرىز-دۋماندى نەمەرەممەن بىرگە تاماشالاۋعا كەلدىم. حالقىمىزدىڭ بىرلىگى مەن بەرەكەسىن ايشىقتايتىن مەرەكە ىزگىلىككە, تاتۋلىققا شاقىرادى دەپ بىلەمىن ءوز باسىم. وكپە-رەنىشتىڭ ءبارى ەسكى جىلدا قالىپ, كەلەر جىل ەلىمىزگە مولشىلىق, بەرەكە, ىرىسىن الىپ كەلسىن, – دەيدى «رادۋگا» سلاۆيان ۇلتتىق-مادەني ورتالىعىنىڭ جەتەكشىسى ۆالەنتينا بوريچەۆسكايا.
سالتاناتتى شەرۋ ناۋرىز-دۋمان وتەتىن ورتالىق الاڭعا «اقجايىق» ءانىن اۋەلەتىپ كىردى. الاڭدا عاسىرلار قويناۋىنان جاڭا شاققىنداي عاجاپ اۋىل جايناپ تۇر. كوپشىلىك بۇل جەردە سان بوياۋلى, سان قىرلى تەاترلاندىرىلعان مەرەكەلىك قويىلىمعا كۋا بولدى. كۇن مەن ءتۇن ءبىر-بىرىمەن ەسەندەسىپ, جەر-انا باۋىرىنداعى بارشا پەرزەنتىنە تەبىرەنە تۇرىپ باق تىلەدى, تىنىشتىقتى, بەيبىتشىلىكتى ايالاۋدى اماناتتادى. ناۋرىزدىڭ قۇدىرەتىن ايشىقتاعان وسى كورىنىسكە قىدىر اتانىڭ «الاش جۇرتىنىڭ ايىن وڭىنان تۋعىز. ءتورت قۇبىلاسىن تەڭ قىلىپ, توبەدەگىسىن كەلتىر. ەسەسىن جىبەرمەيتىن ەڭسەگەي قىل!» دەگەن باتاسى كەرەمەت ۇيلەسىپ, ناۋرىز لەبى الاڭدى جەلپىپ-جەلپىپ ءوتتى.
مەرەكەلىك شارادا «نازقوڭىر» فولكلورلىق ءانسامبلى, اۋداندىق ساز مەكتەبىنىڭ ۇجىمى, «رازدولە» سلاۆيان حورى, ازامات ىزتىلەۋ, ەلميرا ەرمەك, ۆەنەرا نۇرعاليەۆا, ءانۋار نۇرعاليەۆ, ەركە باقتياروۆا, رىسبەك جانايىسوۆ, وزگە دە كوركەمونەرپازدار ءان-بيىمەن كورەرمەندەردىڭ كوڭىل-حوشىن سەرپىلتتى.
باتىس قازاقستان وبلىسى
