فوتو: polisia.kz
شارا بارىسىندا كوشى-قون زاڭناماسىن بۇزۋدىڭ 10 مىڭعا جۋىق فاكتىسى تىركەلدى. ماسەلەن, 4,5 مىڭ شەتەلدىك ازامات ەلدە بولۋ مەرزىمىن بۇزعان. 2,5 مىڭى زاڭسىز ەڭبەك قىزمەتىمەن اينالىسقان. ونىڭ ىشىندە 60 زاڭسىز تاكسي جۇرگىزۋشىسى بار. ءىىم بۇعان دەيىن جۇرگىزىلگەن ارنايى وپەراتسيا كەزىندە 700-گە جۋىق زاڭسىز تاكسي جۇرگىزۋشىسى انىقتالعانىن دا مالىمدەدى. 1240 شەتەلدىك سوت شەشىمىمەن ەلدەن شىعارىلىپ, ولارعا بەس جىلعا قازاقستانعا كىرۋگە تىيىم سالىندى.
«زاڭ بۇزۋشىلاردىڭ باسىم بولىگى جاقىن شەت مەملەكەتتەن كەلگەندەر. بىراق ودان بولەك بانگلادەش, ەگيپەت, يتاليا, نيگەريا جانە ماداگاسكار ازاماتتارى دا انىقتالدى. ىزدەۋدە جۇرگەن 20 شەتەلدىك ۇستالدى», دەدى ءىىم كوشى-قون قىزمەتى كوميتەتىنىڭ توراعاسى اسلان اتالىقوۆ.
ال 2200 تۇلعا شەتەلدىكتەردىڭ كەلگەنىن حابارلاماعانى ۇشىن اكىمشىلىك جاۋاپكەرشىلىككە تارتىلىپ, ولارعا 12 ملن تەڭگە ايىپپۇل سالىندى.
سونداي-اق, 500 قازاقستاندىق جۇمىس بەرۋشى شەتەلدىكتەردى زاڭسىز جۇمىسقا تارتقانى ءۇشىن 33 ملن تەڭگە ايىپپۇل ارقالادى. ولاردىڭ ىشىندە بەس تۇلعا وسىنداي ارەكەتتى بۇرىن دا جاساعانى ءۇشىن, قىلمىستىق جاۋاپكەرشىلىككە تارتىلدى.
«مىسالى, استانا قالاسىندا ءبىر ۋنيۆەرسيتەت جاتاقحاناسىندا كومەندانت 56 ەڭبەك ميگرانتىنا ستۋدەنت رەتىندە ۋاقىتشا تۇرۋعا رۇقسات بەرگەن. الماتى وبلىسىندا نوتاريۋستىڭ كومەكشىسى شەتەلدىكتەردى «جوق» مەكەنجايلارعا تىركەۋ ءۇشىن جالعان سەنىمحاتتار راسىمدەگەن. بارلىق فاكتىلەر بويىنشا سوتقا دەيىنگى تەرگەۋ جۇرگىزىلىپ جاتىر. شەتەلدىكتەردىڭ كەلۋى تۋرالى حابارلاما بەرۋ, جەكە سايكەستەندىرۋ ءنومىرىن الۋ, داكتورەگيستراتسيانى ءوتۋ جانە ۋاقىتشا تۇرۋعا رۇقسات راسىمدەۋ ءۇشىن مەملەكەت تولەم المايتىنىن ايتا كەتكەن ءجون», دەدى اسلان اتالىقوۆ.
