فوتو: اقوردا
جيىندا ءسوز العان پرەزيدەنت كەيىنگى ءۇش جىلدا جەرگىلىكتى بيلىكتىڭ تۇبەگەيلى جاڭعىرعانىن اتاپ ءوتتى.
«جەرگىلىكتى بيلىك تۇبەگەيلى جاڭعىرتىلدى. ءۇش جىلدان استام ۋاقىت ىشىندە اۋىل اكىمدەرىنىڭ 72 پايىزى جاڭاردى. ونىڭ ۇشتەن ءبىرى – بۇرىن مەملەكەتتىك قىزمەتتە بولماعان ازاماتتار. ءبىر سوزبەن ايتساق, ايماقتارداعى اتقارۋشى بيلىككە جاڭا ادامدار كەلىپ جاتىر.
پيلوتتىق جوبا رەتىندە اۋداندار مەن وبلىستىق ماڭىزى بار قالالاردىڭ 45 اكىمى سايلاندى. بيىلدان باستاپ بارلىق اۋدان اكىمدەرىن حالىق تىكەلەي سايلايتىن بولادى. ءتۇرلى دەڭگەيدەگى ءماسليحات سايلاۋى وكىلدى بيلىك ورگاندارىنىڭ جۇمىسىنا تىڭ سەرپىن بەردى. وبلىستىق جانە اۋداندىق ءماسليحات دەپۋتاتتارىنىڭ 90 پايىزى ءبىر مانداتتى وكرۋگتەن, ياعني تىكەلەي داۋىس بەرۋ ارقىلى سايلاندى. بيلىك جۇيەسىندە مۇنداي اۋقىمدى وزگەرىس بۇرىن-سوڭدى بولمادى», دەدى پرەزيدەنت.
مەملەكەت باسشىسى ەل ىشىندەگى وڭ وزگەرىستەرگە ۇلتتىق قۇرىلتاي مۇشەلەرى دە ەلەۋلى ۇلەس قوسىپ جاتقانىنا نازار اۋداردى.
«ەل ىشىندەگى وزگەرىستەرگە ۇلتتىق قۇرىلتاي مۇشەلەرى دە وراسان زور ۇلەس قوستى. جۇرتىمىزدى ورتاق ماقساتقا ۇيىستىرىپ, يگى ىستەرگە جۇمىلدىردى. القالى جيىن العاشقى كۇننەن باستاپ جالپىحالىقتىق جاڭعىرۋدىڭ سيمۆولىنا اينالدى. قوعامدىق ديالوگتىڭ جاڭا ۇلگىسى قالىپتاستى. ءوزارا تۇسىنىستىك پەن قۇرمەت بار جەردە كەلىسىم بولادى. قۇرىلتايدىڭ تۇپكى ماقساتى دا – وسى», دەدى قاسىم-جومارت توقاەۆ.
