ۇلتتىق بايانداما تابىستى قورعالدى

24 ماۋسىمدا ادىلەت مينيسترلىگىندە وتكىزىلگەن ءباسپاسوز ءماسليحاتىندا بۇۇ-نىڭ ادام قۇقىقتارى جونىندەگى كەڭەسىنىڭ 14-ءشى سەسسياسى اياسىندا قازاقستاننىڭ ۇلتتىق بايانداماسىن قورعاۋىنىڭ قورىتىندىسى شىعارىلدى. ءباسپاسوز ءماسليحاتىنا مادە­نيەت ۆيتسە-ءمينيسترى ع.تەلەباەۆ, پرەزيدەنت جانىنداعى ادام قۇ­قىق­تارى جونىندەگى كوميسسيانىڭ حات­شىسى ت.ابىشەۆ, اقپارات جانە مۇراعات كوميتەتىنىڭ توراعاسى ب.بەر­سەباەۆ, سونداي-اق پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ, قازاقستان رەسپۋبليكاسىنىڭ ادام قۇقىقتارى جونىندەگى ۇلتتىق ورتا­لىعىنىڭ وكىلدەرى, ت.ب. قاتىستى. ادىلەت مينيسترلىگىنىڭ جاۋاپتى حاتشىسى م.بەكەتاەۆتىڭ سوزىندە اتاپ وتىلگەنىندەي, بۇعان دەيىن, ۇستىمىزدەگى جىلدىڭ 12 اقپانىندا پرەمەر-ءمينيستردىڭ ورىنباسارى ەربول ورىنباەۆ باستاعان قازاق­ستان­دىق دەلەگاتسيا جەنەۆادا ۇلت­تىق باياندامانى تابىستى قورعاعان بولاتىن. قازاقستان بايانداماسىنا مۇنداي باعانى قورعاۋعا قاتىسقان بۇۇ-عا مۇشە مەملەكەتتەر دەلە­گا­تسيالارى, قازاقستاننىڭ ۇكىمەتتىك ەمەس ۇيىمدارى, سونداي-اق تاۋەلسىز ساراپشىلار بەرگەن-ءتىن. بۇۇ-عا ۇسىنىلعان ۇلتتىق بايان­داما قازاقستاننىڭ ادام قۇ­قىن قورعاۋ مەن ىنتالاندىرۋ سا­لا­سىندا قول جەتكىزگەن تابىستارىن ايعاقتاپ بەردى. مۇنداي تابىستار ەلىمىزدە جۇرگىزىلىپ كەلە جاتقان ۇلتارالىق جانە كونفەسسياارالىق كەلىسىمدى قامتاماسىز ەتۋ جونىندەگى ساياسات, انا مەن بالا جاعدايىن جاق­سارتۋ بويىنشا جاسالىپ جاتقان ناقتى قادامدار ناتيجەسىندە مۇمكىن بولدى. جەنەۆادا سونداي-اق وتانىمىزدا جۇزەگە اسىرىلۋ ءۇستىن­دەگى ادام قۇقى سالاسىنداعى 2009-2012 جىلدارعا ارنالعان ۇلتتىق ءىس-قيمىل جوسپارى مەن 2010-2020 جىل­دارعا ارنالعان قۇقىقتىق سايا­سات تۇجىرىمداماسى وڭ باعالاندى. ۇستىمىزدەگى جىلدىڭ 9 ماۋسى­مىن­دا قازاقستاننىڭ ادام قۇقىق­تارى جونىندەگى امبەباپ مەرزىمدىك شولۋى بەكىتىلدى. قازاقستان بويىنشا شولۋ ايا­سىندا بۇۇ-نىڭ 54 مەملەكەتى ۇستىمىزدەگى جىلدىڭ اقپانىنداعى ينتەراكتيۆتى ۇنقاتىسۋ بارىسىندا ەلىمىزدەگى ءتۇرلى ادام قۇقىن قورعاۋ جانە بوستاندىعى اسپەكتىلەرىنە قاتىستى 128 ۇسىنىمداما ۇسىندى, دەپ حابارلادى ادىلەت مينيستر­لىگىنىڭ ءباسپاسوز قىزمەتى.