مۇعالىمدەردىڭ ايتۋىنشا, «شۇعانىڭ بەلگىسىنە» 9-سىنىپتا 4 ساعات بەرىلىپتى. بالالار ءبىرىنشى ساباقتان-اق كوميكستىڭ كومەگىمەن شىعارما مازمۇنىن ءتۇسىنىپ, تولىق مەڭگەرىپ العان.
«قالعان ساباقتاردا شىعارمانى كەڭىرەك تالداپ, ايەل تەڭسىزدىگى تاقىرىبىن ارقاۋ ەتكەن باسقا دا تۋىندىلارمەن ساباقتاستىرا قاراستىرۋعا ۋاقىت تاپتىق», دەيدى تاجىريبەلى ۇستازدار.
مۇعالىمدەر سۋرەتتى اڭگىمەگە «Egov.kz» پورتالى ارقىلى اۆتورلىق قۇقىق الىپتى. اتالعان كوميكس بەيىمبەت شىعارماسىنىڭ قۇر كوشىرمەسى عانا ەمەس. اۆتورلار شىعارما ءتىلىن بالا جەڭىل تۇسىنەتىندەي ەتىپ قايتا وڭدەپ, تۇسىنىكتەمەمەن تولىقتىرىپ شىققان.
«قازىر بالالاردى كىتاپ وقۋعا قىزىقتىرۋ وتە قيىن. سوندىقتان وقۋشىلاردىڭ كوركەم ادەبيەتكە دەگەن ىنتاسىن ارتتىرۋ ماقساتىندا قازاق جانە ورىس تىلدەرىندە كوميكس جاساپ شىعارۋعا تۋرا كەلدى. سۋرەتتەردى تۇگەلدەي «QazGPT» جاساندى ينتەلەكتىسىنىڭ كومەگىمەن جاسادىق. توعىزىنشى سىنىپقا ءبىر ساعات وقىتىپ كوردىم. بالالار شىعارمانى باستان-اياق وقىپ شىققانداي تەز ءسىڭىرىپ الدى. ودان كەيىن حرەستوماتيامەن جۇمىس ىستەپ تولىق ءماتىندى وقىپ, تالداپ شىقتىق. ساباقتان سوڭ قايسىسى جەڭىلىرەك دەپ سۇراعانىمدا, ءبارى ءبىر اۋىزدان «كوميكستى وقۋ جەڭىل» دەپ جاۋاپ بەردى. بۇل – بالالاردى كىتاپ وقۋعا ىنتالاندىرۋ ءۇشىن اسا قاجەت قۇرال», دەيدى اقبوتا ەرماعانبەتوۆا.
وتكەن جىلى اقبوتا اتالعان جوباسىمەن رەسپۋبليكالىق پەداگوگيكالىق يدەيالار فەستيۆالىنە قاتىسىپ, جۇلدەلى ەكىنشى ورىن العان. قوستانايدا بەيىمبەت ءمايليننىڭ 130 جىلدىق مەرەيتويىنا ارنالعان عىلىمي كونفەرەنتسياعا دا قاتىسىپ, كوپشىلىككە كوركەم شىعارمانى وقىتۋدا كوميكس پايدالانۋدىڭ ءتيىمدى ەكەنىن دالەلدەپ شىققان. جيىننان كەيىن بۇعان سول كەزدەگى وبلىس اكىمىنىڭ ورىنباسارى رينات مۇحامەتقالي قىزىعۋشىلىق تانىتىپ, جاڭاشىل ۇستازعا ادىستەمەلىگىن جەكە ەڭبەك ەتىپ باستىرىپ شىعارۋ جونىندە كەڭەس بەرگەنىنە كۋا بولدىق. وسىلايشا, رينات زاكي ۇلىنىڭ باستاماسىمەن, بەيىمبەت مايلين اۋدانى اكىمدىگىنىڭ قولداۋىمەن الماتى قالاسىنان اتالعان كوميكستىڭ 200 داناسى جارىققا شىعىپ, تاياۋدا عانا اۆتورلاردىڭ قولىنا ءتيىپ وتىر.
اقبوتا ەرماعانبەتوۆانىڭ بۇدان وزگە دە كوميكس فورماتىنداعى ادىستەمەلىكتەرى بار. تاجىريبەلى ۇستاز وقۋ باعدارلاماسىنا ەنگەن «قورقىت اتا جىرى», مىرجاقىپ دۋلات ۇلىنىڭ «باقىتسىز جامال», تىنىمباي نۇرماعانبەتوۆتىڭ «اناسىن ساعىنعان بالا», تولەن ابدىكتىڭ «قوناقتار» شىعارماسىن بالانىڭ تانىمىنا بەيىمدەپ كوميكس جاساپ, ساباقتا پايدالانىپ ءجۇر.
قوستاناي وبلىسى
