بىرلىك – تىرلىك تىرەگى

ەلىمىزدەگى “بىرلىگىمىز جاراس­قان!” ناۋقانى اياسىندا سىر اي­ما­عىندا ايتۋلى شارالار جوس­پارلى جۇرگىزىلۋدە. وعان جەرگىلىكتى بيلىك پەن جاس­تار توبى, ۇكىمەتتىك ەمەس قو­عامدىق ۇيىمدار وكىل­دەرى, جال­پى, سىربويىلىقتاردىڭ ءبارى دەر­لىك بەل شەشە, بىلەك تۇرە كىرىسىپ-اق كەتكەن. مامىرا­جاي مامىر ايىنان باستاۋ العان بۇل يگىلىكتى ىستەردى ساۋساقپەن سانامالاپ ايتۋ دا مۇمكىن ەمەس. دەسە دە, “بىرلىگى بەكەم ەلدىڭ بەرەكەسى مول بولماق” دەگەن اتام قازاقتىڭ ايتۋلى ۇلاعاتىن تۋ ەتىپ ۇستانعان يگىلىكتى شارالاردىڭ ءبىرلى-جا­رىمى­نا نازار اۋدارا كەتكەن ءجون.اتاپ ايتقاندا, وسى اكتسيا ايا­سىنداعى ءىس-شا­را­لار مۇمكىندىگى شەك­تەۋلى جانە پاتروناتتىق ءتار­بيەدەگى مۇگەدەك بالالار اراسىن­داعى “مار­لام­قاش” ءبىلىم سايى­سى­نان باستاۋ الدى. سايىسقا ءار ەت­نوس­تان 30 مۇگەدەك بالا قاتىسىپ, جەڭىمپاز جاس­وسپىرىمدەر قوماقتى سىيلىقتارمەن مارا­پات­تالدى. سونداي-اق تۇركيا پرەزيدەنتى اب­دۋللا گۇلدىڭ قازاقستانعا كەلگەن ساپارىنا وراي قى­زىلوردا مەم­لە­كەتتىك ۋنيۆەرسيتەتىندە ءبىلىم الىپ جۇرگەن تۇرىك ازاماتتارىمەن كەز­دەسۋ وتكىزىلىپ, ەكى ەل اراسىنداعى دوستىق جايلى اڭگىمە ءوربىدى. ايتا كەتۋ كەرەك, قىزىلوردا قالاسىنىڭ ور­تا­لىق الاڭىندا 3 مىڭعا جۋىق ادامنىڭ قاتى­سۋى­مەن “بىرلىگىمىز جاراسقان!” اتتى ءوڭىر­لىك پات­ريوت­تار فورۋمى ەل بىرلىگىن نىعايتۋ, تاۋەلسىز قازاقستاننىڭ كەلبەتى مەن قۇندىلىقتارىن الەمگە ايگىلەۋ ۇدەرىستەرىنەن كەرەمەت قويىلىم كور­سەتىلدى. شەرۋگە “جاس وتان” جاستار قاناتى, “جاس ۇرپاق” وبلىستىق ستۋدەنت­تەر اليان­سى, جاستاردىڭ قوعام­دىق بىرلەستىكتەرى وكىلدەرى قاتى­سىپ, وتانعا دەگەن سۇيىسپەنشى­لىكتەرى مەن ماقتانىشتارىن پاش ەتتى. سىر بويىنداعى “بىرلىگىمىز جاراسقان” اك­تسيا­سى اياسىندا قايى­رىمدىلىق شارالارى ەرەك­شە قارقىن الۋدا. اتاپ ايتار بولساق, از قامتا­ما­سىز ەتىلگەن, بولماسا جە­تىم, اتا-انالارىنسىز قالعان, پاتروناتتىق تاربيەدەگى 150 بالا­نىڭ استانا قالاسىنا ساياحاتقا بارۋىنا, 435 بالانىڭ جازعى تىنىعۋ لاگەرىندە دەمالۋلارىنا جەرگىلىكتى بيلىكتىڭ قامقور قول­دارى سوزىلدى. سونداي-اق وبلىس اكىمدىگىنىڭ باستاماسىمەن از قام­تىلعان مۇقتاج جاندارعا الەۋ­مەت­تىك قولداۋ كورسەتۋ ماق­ساتىندا جىل بويى جۇرگىزىلەتىن “سىر مەيىرىمى” جوباسىنىڭ تۇساۋى كەسىلدى. بۇل جوبا بويىنشا 109 ادامعا ءدام­حا­نالاردا, ال جۇرە المايتىن 65 ادام­نىڭ ۇيىنە ىستىق تاماقتى كۇندەلىكتى جەت­كى­زىپ بەرۋ قولعا الىندى. جوباعا جىل سوڭىنا دەيىن جالپى سانى 2 مىڭنان استام ادام قام­تىل­ماق. مۇنداي يگىلىكتى ىستەر ايماقتىڭ بارلىق اۋداندارى مەن اۋىلدارىندا جوسپارلى جۇرگىزىلۋدە. كۇنى كەشە قىزىلوردا قالا­سىن­داعى وقۋشى­لار پاركىندە وسى ناۋقان اياسىندا “جاستاردىڭ تازا­لىق اكتسياسى” ۇتىمدى ۇيىم­داس­تىرىلدى. تازالىق اكتسياسىنا وبلىستىق ىشكى ساياسات باس­قار­ماسى, وبلىستىق “جاستار وداعى” قاۋىم­داس­تى­عى, “جاس وتان” جاستار قاناتى, “اۋىل جاس­تا­رى وداعى”, “بولاشاق جاستار”, “جاسىل ەل” ستۋدەنتتىك ەڭبەك جاساقتارى, “قازاقستان ستۋدەنتتەر اليانسى”, تاعى باسقا جاستاردىڭ قوعامدىق بىرلەستىكتەرى مۇرىندىق بولدى. وسى شارا بارىسىندا جالىندى دا جىگەرلى جاستار “بىرلىگى بەكەم ەلدىڭ بەرەكەسى مول بولماق” دەگەن تاتۋلىق ءسوزدى تۋ ەتىپ, جارىسا كوتەر­ىپ, قالا تازالىعىن ساقتاۋ­داعى ماقساتتارىن پاش ەتتى. اكتسيا سو­ڭىن­دا جاستار “بىرلىگىمىز جاراس­قان!” ۇرانىن فلەش-موب فور­ما­تىنا ورنالاستىرىپ, بىرلىك نى­شا­نىن ايشىقتادى. ەركىن ءابىل, قىزىلوردا. نازاردا – سالاماتتى ءومىر سالتى ع.مۇسىرەپوۆ اۋدانى وبلىس ور­تالىعىنان شالعاي ورنالاسقانىنا قاراماستان ءتۇرلى مادەني-سپورت­تىق شارالار جۇيەلى ۇيىمداس­تى­رىلىپ تۇرادى. سوڭعى جىلدارى اۋدان اكىمى مارات تاسماعام­بە­توۆ­تىڭ باس بولۋىمەن ەلدى مەكەن­دەر­دەگى سپورت ستاديوندارى مەن الاڭ­دارى جوندەۋدەن ءوتىپ, سپورتتىڭ بۇقارالىعىن ارتتىرىپ, سالامات­تى ءومىر سالتىن نىعايتۋدا ءبىرشا­ما جۇمىستار تىندىرىلدى. ال وبلىستىق “اقبيداي-2010” سپورت ويىندارى سپارتاكياداسى اياسىندا اۋدان سپورتشىلارىنىڭ نەجينكا اۋىلىندا باس قوسۋى كەزدەيسوق­تىق­قا جاتپايدى. جاستايىنان سپورتتى سەرىك ەتكەن “نەجينكا-ەركە” جشس باس ديرەكتورى مۇرات جۇمابەكوۆ اۋىلداستارى مەن جاستاردىڭ شىنىعىپ, شى­مىر بولىپ ءوسۋىن نازاردان تىس قالدىرعان ەمەس. ول بىلتىر ەسكى مادەنيەت ءۇيىن كۇردەلى جوندەۋدەن وتكىزىپ, سپورت كەشەنىنە اينال­دىر­دى. بۇل ماقسات ءۇشىن 10 ميلليون تەڭگە جۇمسادى. وندا ءتۇرلى ويىن, ترەناجەر, بيليارد, بوكس زالدارى ورنالاسقان. بيىل ۆولەيبول, باس­كەتبول, جەڭىل اتلەتيكا الاڭدارىن قالپىنا كەلتىرۋگە 2,7 ميلليون تەڭگە ءبولدى. سپارتاكياداعا 19 اۋىل­دىق ايماقتاردان سايدىڭ تاسىنداي ىرىكتەلگەن 670-كە جۋىق سپورتشى قاتىسىپ, ەكى كۇن بويى جارىس كورىگىن قىزدىردى. باعدار­لاماعا 11 سپورت ءتۇرى ەندى. اۋداندىق سپارتاكيادا سالتا­نات­تى تۇردە اشىلىپ, ۇلكەن مەرە­كەگە اينالدى. وندا ءسوز العان اۋدان اكىمى م. تاسماعامبەتوۆ 30 پايىزعا دەيىنگى قازاقستان­دىق­تار­دى بۇقارالىق سپورتقا تارتۋ, ءومىر ءسۇرۋدىڭ ۇزاقتىعىن 70 جاسقا دەيىن ۇلعايتۋ, قاتەرلى اۋرۋلاردىڭ الدىن الۋ ماسەلەلەرى مەملەكەتتىك سايا­ساتتىڭ ەڭ باستى كورىنىسىنە اي­نال­عانىن, بۇل تالاپتاردىڭ جولداۋدا جان-جاقتى كورىنىس تاپقانىن, الدا بۇقارالىق دەنە شىنىقتىرۋ-سپورت قوزعالىسىن جانداندىرۋ باستى مىندەت بولىپ قالا بەرەتىنىن اتاپ كورسەتتى. كوماندالار جۇرت­شىلىق الدىنان ساپ تۇزەپ وتكەن بويى بىردەن جاتتىعۋعا كىرىستى. جارىستىڭ باستالعانىن پاش ەت­كەن­دەي تورەشى ىسقىرىعى ەستىلۋى مۇڭ ەكەن, ۆولەيبول الاڭىنا بوي­لارى سىرىقتاي سپورتشىلار شىعا بەردى. نەجيندىكتەر قارسىلاس شى­داتپاي اقتىق سىندا بىرلىكتىكتەردى تىزە بۇكتىردى. ايەلدەر اراسىندا دا الاڭ يەلەرىنىڭ مەرەيى ۇستەم بول­دى. چەرۆوننىي اۋىلدىق ايماعى­نىڭ سپورتشىلارى فۋتبول مەن باسكەتبولدان نامىستى قولدان بەرمەسە, ەركىن كۇرەستەن, شاحمات پەن دويبىدان نوۆويشيمدىكتەردىڭ باعى جاندى. وسىلايشا كوماندا­لار الما-كەزەك جەڭىسكە جەتىپ, جالپى ەسەپ بويىنشا الاڭ يەلەرى بارىنەن وزدى. ودان نوۆوسەل جانە نوۆويشيم اۋىلدىق ايماعىنىڭ سپورتشىلارى ءسال كەيىندەۋ قالدى. سپارتاكيادانىڭ سالتاناتتى جابىلۋى تاياعان ساتتە سەرىكتەس­تىك­تىڭ يەلىگىندەگى “ان-2” ۇشاعى اس­پان­عا شارىقتاي كوتەرىلدى. كوپ­شىلىك وعان قىزىقتاي كوز سالىپ تۇرعاندا سەرگەي مەنگيلەۆ, سەر­گەي كوبەلەۆ, گەننادي ۆاسيلەۆ, ولەگ تارگۋناكوۆ, سەرگەي سولنتسەۆ سەكىلدى جەرگىلىكتى اۋە قىراندارى زاڭعار بيىكتىكتەن تومەن قاراي قۇلديلاي جونەلدى. سويتسەك, شا­رۋا­شىلىقتا جۇرەكجۇتقان جاس سايىپقىرانداردى باۋلۋ ماقسا­تى­مەن ارنايى پاراشيۋتيستەر كلۋبى جۇمىس ىستەيدى ەكەن. جارىس جەڭىمپازدارى مەن جۇلدەگەرلەرىنە قوماقتى سىيلىقتار تاپسىرىلدى. بايراقتى باسەكە وتشاشۋعا, كوڭىلدى ويىن-ساۋىققا ۇلاستى. كەلەسى جازعى سپارتاكيادا رۋ­زاەۆ اۋىلدىق ايماعىندا وتكىزىلە­تىن بولىپ بەلگىلەندى. ءومىر ەسقالي, سولتۇستىك قازاقستان وبلىسى, ع.مۇسىرەپوۆ اۋدانى. وتان وتباسىنان باستالادى دەسەك... قالالىق مادەنيەت جانە ءتىل­دەردى دامىتۋ ءبولىمى مەملەكەتتىك ءتىلدىڭ مارتەبەسىن ارتتىرۋ ماقسا­تى­مەن ءتۇرلى شارالاردى ءجيى وتكى­زىپ كەلەدى. جۋىرداعى ءبىر شارا “مەملەكەتتىك ءتىل جانە وتباسى” دەگەن تاقىرىپپەن وتكىزىلدى. اتالعان كونكۋرسقا مەشكوۆتار وتباسى ءۇش بالاسىمەن قاتىسسا, ال كليۆەنكو مەن شيل – سابيلەرى ەندى عانا شيراپ كەلە جاتقان جاس وتباسى. بىراق ءبىر قىزىعى, بۇلار­دىڭ سوڭعى ەكەۋى تىلدەردى دامىتۋ ءبولىمى ىشىنەن اشىلعان قازاق ءتىلى كۋرسىنا جازىلىپ, ءتىل ۇيرەنگەن­دە­رىنە نەبارى ءتورت-اق اي بولعان ەكەن. سولاي بولا تۇرعانمەن, بۇل جول­عى ءتىل كونكۋرسى دا قىزىقتى ءوتتى. كونكۋرسقا قاتىسۋشىلاردىڭ ارقايسىسى وتباسىندا مەملەكەتتىك ءتىلدى قالاي مەڭگەرىپ جاتقاندارى تۋرالى بەينەسيۋجەت ءتۇسىرىپ الىپ كەلىپتى. ال مۇنىڭ اسەرى ەرەكشە بولدى. ايتتى-ايتپادى, وتان وتبا­سىنان باستالادى دەمەكشى, مەم­لەكەتتىك ءتىلدى مەڭگەرۋ دە وتباسى­نان باستالعاندا عانا ءوز جەمىسىن بەرمەك. سونىڭ ءبىر ايعاعىنداي, ەرلى-زايىپتى شيل: “بارلىق­تارى­ڭىز قولدارىڭىزدى جۇرەك تۇسىنا قويىڭىزدار”, دەپ ەلى­مىز­دىڭ ءانۇرانىن شىرقاي جونەل­گەندە تەبىرەنبەگەن جان قالمادى. جۇيرىكتەن جۇيرىك وزار جارىس­قاندا دەمەكشى, سايىس سوڭىندا قازىلار القاسى باس جۇلدەنى كليۆەنكونىڭ وتباسىنا بەرۋ تۋرالى ءبىراۋىزدى شەشىمگە كەلدى. باسقا وتباسىلارى دا سىي-سيا­پاتتان قۇر قالعان جوق. وسىنداي ماعىنالى كونكۋرستاردان سوڭ ءالى دە ءوز ءۇيىرىن تابا الماي جۇرگەن كوگەنكوزدەرىمىز ويعا ءتۇسىپ, تولعاناتىن شىعار دەيمىز! داۋلەت سەيسەن ۇلى, سەمەي. بارىنەن دە الدامىز مەديتسينا قىزمەتكەرلەرىنىڭ كاسىپتىك مە­رە­كە­سى “جاستار” ستاديونىندا جىلداعىعا ۇقسا­ماي­تىن وزگەشە داستۇردە اتالىپ ءوتتى. وعان اۋدان­دار­دان كەلگەن دەنساۋلىق ساقتاۋ جانە ەمدەۋ مەكەمەلەرىنىڭ جەتەكشىلەرى, ءوز سالاسىنىڭ ۇزدىك ماماندارى قاتىستى. سالتاناتتى شارانى وبلىس اكىمى سەرىك ءبىلالوۆ اشىپ, دەنساۋلىق ساقتاۋ سالاسىندا اتقارىلىپ جاتقان يگى ىستەردى ايتىپ بەردى. ەلباسى ن.نازارباەۆتىڭ باستاماسىمەن قولعا الىنعان “100 مەكتەپ, 100 اۋرۋحانا” باع­دار­لاماسى بويىنشا 6 دەنساۋلىق ساقتاۋ نىسا­نىن سالۋ جوسپارلانسا, بيىل جىلىنا 10 مىڭ ليتر پلازما دايىندايتىن قان ورتالىعى ىسكە قوسىلدى. ول الەمدىك ستاندارت بويىنشا جۇمىس ىستەيدى. جىل اياعىنا دەيىن پەتروپاۆل قالاسىندا ءبىر اۋىسىمدا 500 ناۋقاس قابىلدايتىن ەمحانا مەن پرەسنوۆ جانە نوۆويشيم كەنتتەرىندە 90 ناۋقاس قابىلداۋعا ارنالعان 100 توسەكتىك اۋدان­ارا­لىق تۋبديسپانسەردى پايدالانۋعا بەرۋ كوزدەلگەن. ۇستىمىزدەگى جىلدان باستاپ بىرىڭعاي ۇلتتىق دەن­ساۋلىق ساقتاۋ جۇيەسى ەنگىزىلگەلى مەديتسينا­لىق قىزمەت كورسەتۋ تالاپتارى كۇشەيە ءتۇستى. باس­تى ماسەلەلەردىڭ ءبىرى— جوعارى ءبىلىمدى ءدارى­گەر­لەردىڭ جەتىسپەۋى. بۇل ورايدا جاس مامانداردى الەۋمەتتىك جاعداي جاساۋ ارقىلى عانا تۇراق­تاندىرىپ, پروبلەمانى شەشۋگە بولاتىنىن ءتا­جى­ريبە كورسەتىپ وتىر. وسى تۇرعىدان العاندا, وبلىس ورتالىعىندا 80 پاتەرلىك كوممۋنالدىق جاتاقحانانىڭ بوي كوتەرۋى—قۇپتارلىق قادام. بۇدان تىسقارى سولتۇستىك قازاقستان مەديتسي­نا­لىق كوللەدجىنىڭ ءجۇز تۇلەگىنە ەلىمىزدىڭ مەديتسي­نا­لىق جوعارى وقۋ ورىندارىندا بىلىمدەرىن جال­عاستىرۋ ءۇشىن وبلىس اكىمىنىڭ گرانتى تاعايىندالىپ وتىر. بۇدان كەيىن ءوز سالاسىنىڭ ۇزدىك ماماندارى ءتۇرلى ماراپاتتارعا يە بولدى. تايىنشا اۋداندىق سەس باسقارماسىنىڭ باستىعى مولداعالي كەن­جە­عارا, وبلىستىق اۋرۋحانانىڭ حيرۋرگيا ءبولىم­شە­سىنىڭ مەڭگەرۋشىسى قابدىراحمان ساقتاعانوۆ, وبلىستىق مەديتسينالىق قىزمەتتەر كورسەتۋگە اقى تولەۋ دەپارتامەنتىنىڭ ءبولىم باستىعى مەڭ­سۇلۋ كوشەكوۆا, پەتروپاۆل قالالىق №3 اۋرۋ­حا­نا­نىڭ باس دارىگەرى اناتولي كو “قازاقستان رەس­پۋبليكاسىنىڭ دەنساۋلىق ساقتاۋ ءىسىنىڭ ءۇز­دىگى” توسبەلگىسىن السا, ءبىر توپ دارىگەرگە دەن­ساۋ­لىق ساقتاۋ مينيسترلىگىنىڭ قۇرمەت گراموتالارى مەن العىس حاتتارى تاپسىرىلدى. دەنساۋلىق ساق­تاۋ سالاسىنىڭ ارداگەرى ۆالەنتينا پاۆلۋحينا جەر­گىلىكتى مەديتسينالىق ارناۋلى وقۋ ورنىن ءبىتىر­گەن تۇلەكتەرگە اق جول ايتىپ, ءسات ساپار تىلەدى. كاسىپتىك بىلىكتىلىكتەرىمەن ەل قۇرمەتىنە ءبو­لە­نىپ جۇرگەن اق حالاتتى ابزال جاندار سپورتتىڭ بىرنەشە تۇرىنەن سايىسقا ءتۇسىپ, تاباندى قا­سيەت­تەرىمەن تانىلا ءبىلدى. ارقان تارتۋدا ع.مۇسىرەپوۆ اۋداندىق اۋرۋحاناسى مەن پەتروپاۆل قالالىق ەمحاناسىنىڭ كوماندالارى ۇزدىك دەپ تانىلسا, ەرلەر اراسىنداعى قول كۇرەسىندە ۆ.گولۋبينيتس­كي مەن ا.شۆەتسوۆ جەڭىمپاز اتاندى. ءبىر جاستاعى سابيلەر ەكى مەتر قاشىقتىققا ەڭبەكتەپ جارىسىپ, مارە سىزىعىن ا.شاميعانوۆ ءبىرىنشى بولىپ قيدى. وعان پلازمالىق تەلەديدار سىيعا تارتىلدى. 3-5 جاس ارالىعىندا بالاقانداردىڭ ۆەلوسيپەدپەن جارىسى دا قىزىقتى بولدى. جەڭىمپازدار مەن جۇلدەگەرلەرگە وبلىستىق كاسىپوداق مەديتسينا قىزمەتكەرلەرى كوميتەتىنىڭ تارتۋ-تارالعىلارى تاپسىرىلىپ, ونىڭ سوڭى اسەم ءان كەشىنە جالعاستى. ءومىر ەسقالي, سولتۇستىك قازاقستان وبلىسى. جاس جۋرناليستەر سلەتى قوعام دامۋىنا قالام قارىمىمەن ۇلەس قو­سىپ جۇرگەن جاستار سلەتىن وبلىستىق ىشكى ساياسات باسقارماسى “بىرلىگىمىز جاراسقان!” ۇرانىمەن جالعاستىردى. “جىگەرلى, ۇشقىر, جاس قالام” V وبلىستىق سلەتكە وڭىردەگى اۋداندىق جانە قا­لالىق, وبلىستىق بۇقارالىق اقپارات قۇرال­دا­رىندا قالام تەربەپ جۇرگەن جاس جۋرناليستەر قاتىسىپ, ەگەمەن ەلىمىزدەگى مەملەكەتتىك ساياساتتى جۇرگىزۋمەن قاتار قوعامدىق پىكىردى قالىپتاس­تىرۋ­داعى تاجىريبەلەرىن ورتاعا سالدى. سونداي-اق, ولار مەملەكەتتىك ءتىلدى ناسيحاتتاۋ, باسپا­سوزدىڭ مارتەبەسىن كوتەرۋ, شىعارماشىلىقتى شىڭداۋ جايلى تىڭ پىكىرلەرىن ورتاعا سالىپ, جاسقا ءتان جالىندارىن تانىتا ءبىلدى. بۇگىنگى وركەنيەتكە بەتتەگەن تۇستا ساياساتپەن اينالىسپاساڭ, ساياسات سەنىمەن اينالىسادى دەگەن ءسوز بار. دەمەك, ءومىر كوشىنەن قالماي حالىققا ونى ءتۇسىندىرۋ, جاقسى مەن جاماننىڭ اراجىگىن اشۋ پارىز ەكەنى انىق. ءوڭىر ومىرىندەگى بۇگىنگى يگىلىكتى ىستەردى وقىرمانعا جەتكىزۋدە جۋرنا­ليس­تي­كا سالاسىنىڭ مايتالمانى اتالعان اعا بۋىن­نىڭ اقىل-كەڭەسى مەن كاسىبي تاجىريبەسى دە جاس­تار­عا اسا قاجەتتىگى بەلگىلى. سوندىقتان دا “دوس­تىق ۇيىندەگى” جاس جۋرناليستەر سلەتىندە ولار دا شاقىرىلىپ, ۇرپاق ۇندەستىگى ورنىعا ءتۇستى. جينالعاندار الدىندا وبلىستىق ىشكى ساياسات باسقارماسىنىڭ باستىعى گۇلجيان سۇلەيمەنوۆا سويلەپ, ءومىر بولعان سوڭ جاقسى مەن كەلەڭسىزدىك قاتار جۇرەتىنى دە بار. جاقسىسىن جارقىراتسا, كەلەڭسىزدىكتى نازارعا ۇسىنۋدا  بۇقارالىق اق­پا­رات قۇرالدارىنا جۇكتەلەتىن مىندەت اۋقىمدى ەكە­نى داۋسىز. ءوڭىردىڭ تىنىس-تىرشىلىگىن تالداپ, جەتكىزە ءبىلۋ, مويىنداتۋ دا قۇرمەتكە لايىق ەكەنىنە توقتالدى. قازىرگى كەزدە ءبىزدىڭ وڭىردە بارلىعى 62 بۇقارالىق اقپارات قۇرالى بار بولسا, ولاردىڭ ساپىندا 1200-دەن استام جۋرناليست قىزمەت ەتەدى ەكەن. بۇلاردىڭ اراسىندا جاستىعىنا قاراماستان قالامىنىڭ ۇشقىرلىعىمەن كوزگە ءتۇسىپ, وقىر­مان جازعانىن ىزدەپ ءجۇرىپ وقيتىن جاس جۋر­نا­ليستەر بار. ولاردىڭ بۇگىن باسىن قوسىپ, ءوزارا تاجىريبە الماسۋلارىنا, شىعارماشىلىقتارىن شىڭداۋعا جاعداي جاسالعانى قۋانارلىق. جاستار الدىندا وبلىستىق “جەتىسۋ” تەلە­كوم­پانياسىنىڭ باس ديرەكتورى بەيسەن قۇران­بەك سويلەپ, جاس جۋرناليستەرگە اتالعان مامان­دىق­تىڭ جۇگى تەلەجۋرناليستيكانىڭ قىر-سىرى جاي­ىندا اڭگىمەلەدى. جالپى جۋرناليستيكا سالا­سىندا تابىستى جۇمىس ىستەۋدىڭ كۇردەلىلىگى مەن جۋرناليستەرگە قويىلاتىن تالاپ پەن مىندەتتىڭ ماڭىزدىلىعىنا توقتالدى. الماتى وبلىستىق ءتىل­دەردى دامىتۋ جونىندەگى باسقارما باستىعى تاڭىربەرگەن قاسىمبەركەباەۆ قالام ۇستاعان قاۋىمنىڭ مەملەكەتتىك ءتىلدىڭ قولدانىس اياسىن بارىنشا كەڭەيتۋگە جانە بەدەلىن ارتتىرۋعا قاتىستى اتقارىپ وتىرعان مىندەتتەردىڭ اسا مارتەبەلى ەكەندىگىن اتاپ كورسەتتى. جاس جۋر­نا­ليستەر دە سوزدەن قۇر قالمادى. كوڭىلدەرىن مازا­لا­عان ساۋالدارعا جاۋاپ الۋعا تىرىسقان ولار جا­ھاندانۋعا  بەتتەگەن بۇگىنگى تاڭداعى  مەملەكەتتىك ءتىل, قوعامدىق پىكىردى قالىپتاستىرۋداعى جاۋاپ­كەر­شىلىك جايلى وي قوزعاپ, پىكىر ايتتى. وبلىس­تىق ىشكى ساياسات باسقارماسى مەن بۇقارالىق اقپارات قۇرالدارىنداعى كاسىبي مامان اعا ۇرپاق وكىلدەرى ولاردىڭ ءار سۇراعىنا جاۋاپ قايتارىپ, جول سىلتەدى. جاس جۋرناليستەرگە اق جول تىلەگەن سلەتتە ولار سىيلىقتان دا قۇر قالمادى. كۇمىسجان بايجان, الماتى وبلىسى.