قاسىم-جومارت توقاەۆ قاسيەتتى سارايشىقتا وتكەن ۇلتتىق قۇرىلتايدىڭ ءۇشىنشى وتىرىسىنداعى سويلەگەن سوزىندە: «باسقا جۇرت قازاقتى كيىمىنەن تانيتىن بولۋى كەرەك. كەيبىر ءىرى كومپانيالار مەن وقۋ ورىندارى ۇلتتىق ناقىشتا كيىنۋ ءۇردىسىن ەنگىزىپ جاتىر. بۇل – وتە ورىندى باستاما, ونى قولداپ, اۋقىمىن كەڭەيتە تۇسكەن ءجون», دەگەن ەدى.
85 جىلدىق تاريحى بار اتىراۋ ۋنيۆەرسيتەتى سوڭعى جىلدارى اپتانىڭ ءاربىر جۇما كۇنىندە ۇلتتىق كيىم كيۋدى داعدىعا اينالدىرعان.
«ۋنيۆەرسيتەتىمىزدە ۇلتتىق ناقىشتاعى كيىمدەردى كيۋ ترەندكە اينالىپ كەلە جاتىر. قازاقتىڭ ۇلتتىق كيىمى مەن اشەكەي بۇيىمدارىندا ءتول مادەنيەتىمىز بەن تاريحىمىز, سالت-ءداستۇرىمىزدىڭ عاسىرلار تەزىنەن وتكەن ءىزى بار. بۇل – ۇرپاقتان ۇرپاققا جەتكەن ۇلتتىق بولمىسىمىز. ۇلتتىق كيىمدى ۇلىقتاۋ ماقساتىندا ەلىمىزدەگى جوعارى وقۋ ورىندارىنا وسى چەللەندجدى جولدايمىز. جاستار ءسانى مەن سالتاناتى كەلىسكەن كيىمدى كيىپ, ونىڭ رۋحاني ماڭىزىن, ۇلتتىق ەرەكشەلىگىن پاش ەتىپ جاتىر. قازاقى ويۋ-ورنەكپەن كومكەرىلگەن ۇلتتىق كيىم كۇندەلىكتى ومىردە سانگە اينالعانى ءجون دەپ بىلەمىن», دەدى ۋنيۆەرسيتەتتىڭ باسقارما توراعاسى-رەكتور سالامات يدريسوۆ.
ايتا كەتسەك, وقىتۋشى-پروفەسسورلار مەن ءبىلىم الۋشىلار اتالعان چەللەندجبەن عانا شەكتەلمەي, ۇلتتىق سپورت تۇرلەرىنەن, اتاپ ايتقاندا, توعىز قۇمالاق, اسىق اتۋ, لاڭگى تەبۋ, ارقان تارتۋ, بەس تاس ويناۋ, كىرتاسىن كوتەرۋ, قول كۇرەس سياقتى ويىندار بويىنشا «جايىق» سپورت كەشەنىندە ءوزارا سايىستى.
اتالعان ىزگى چەللەندج س.امانجولوۆ اتىنداعى شىعىس قازاقستان, م.وتەمىسوۆ اتىنداعى باتىس قازاقستان, م.اۋەزوۆ اتىنداعى وڭتۇستىك قازاقستان ۋنيۆەرسيتەتتەرىنە جانە م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى مەن ە.بوكەتوۆ اتىنداعى قاراعاندى ۋنيۆەرسيتەتىنىڭ وقىتۋشى-پروفەسسورلارى مەن ستۋدەنتتەرىنە, اتىراۋ وبلىسىنىڭ بارلىق مەملەكەتتىك قىزمەتكەرى جانە ءبىلىم باسقارماسىنا قاراستى كوللەدجدەر مەن مەكتەپ ۇجىمدارىنا جولداندى.
