“شابىت” شىعارماشىلىق سارايى اشىلدى

وتكەن سارسەنبى كۇنى ەلباسى نۇرسۇلتان نازارباەۆتىڭ قاتىسۋىمەن ەلوردادا تاعى ءبىر رۋحاني ورتالىقتىڭ اشىلۋ ءراسىمى ءوتتى. ول قازاق ەلى مونۋمەنتىمەن, تاۋەلسىزدىك سارايىمەن ىرگەلەس ورنالاسقان “شابىت” شىعارماشىلىق سارايى ەدى. كۇن ساناپ كوركەيىپ كەلە جات­قان ەلوردامىز العاشقى كەزدە شە­نەۋنىكتەر قالاسى دەلىنىپ كەلسە, ەن­دىگى جەردە ەل داۋلەتىنە ساي ساۋلەتى جاراسقان رۋحاني ورتالىقتار ءبىرى­نەن كەيىن ءبىرى بوي كوتەرىپ, وتا­نى­مىزدىڭ ءتورت بۇرىشىنان جينالعان حالىققا قىزمەت ەتىپ جاتىر. اتشاپتىرىم اۋماققا ورنالاس­قان شىعارماشىلىق سارايىنىڭ ءتورت قۇبىلاسى تۇگەل دەۋگە بولادى. وتكەن جىلى پرەزيدەنت نۇرسۇلتان نازارباەۆتىڭ جارلىعىمەن, ۇكى­مەت­تىڭ ارنايى قاۋلىسىمەن بۇرىن­عى قازاق ۇلتتىق مۋزىكا اكادەميا­سى­نىڭ بازاسىندا قازاق ۇلتتىق ونەر ۋنيۆەرسيتەتى قۇرىلعانى بەل­گىلى. ەندىگى جەردە بۇل اسەم عيمارات سول ءبىلىم وشاعىنا قىزمەت ەتەدى. استاناداعى بۇل ونەر ورداسىن سا­لۋعا 8,5 ميلليارد تەڭگەدەن استام ارتىق قار­جى جۇمسالىپتى. مۇندا تەك مۋزىكا عانا ەمەس, ونەردىڭ سان-سا­لالى تۇرلەرىمەن قاتار تەاتر, كي­نو, تەلەۆيزياعا قاجەت كاسىبي ما­مان­دار دايارلانادى. ال وقيتىن ستۋ­دەنت­تەر­دىڭ سانىنا كەلەتىن بول­ساق, 3 مىڭ ادامنان اسادى ەكەن. ورتا جانە باس­تاۋىش مەكتەپتىڭ بي, سول سەكىلدى سۋرەتشىلەر مەن ءمۇسىن­شىلەر توبىنا 180 تالاپكەر قازىردىڭ وزىندە قابىل­دانىپ قويىپتى. مۇنىمەن قاتار, 500 ورىندى ۇلكەن جانە 140 ورىن­دى كىشى كونتسەرت زال­دارى زامان تا­لا­بىنا ساي جاراق­تا­لىپتى. وقۋ سىنىپتارىنىڭ ىشىندە دە تەحني­كا­لىق قۇرالدار مەن ما­مان­دىققا قاجەت اسپاپتاردىڭ ءار الۋان ءتۇرى جيناقتالعان. بۇرىن­عى­داي ەمەس, ۋنيۆەرسيتەت اياسىنىڭ كەڭەيۋىنە بايلانىستى ماماندىقتار سانى دا ارتقان. ستۋدەنتتەردىڭ وقي ءجۇرىپ پراكتيكالىق جۇمىستاردى جۇرگىزۋگە لايىقتالعان بىرنەشە ستۋديالار اشىلعانىن دا ايتا كەتكەنىمىز ءجون. ولاردىڭ ىشىندە كينو, تەلەۆيزيا ستۋديالارىندا شاعىن دۇنيەلەر جاساۋعا مۇمكىندىك مولىنان قاراستىرىلعان. سول سەكىلدى, تەاتر بولىمىندە وقيتىن جاستاردىڭ ساحنالىق شىعارمالاردى ازىرلەۋىنە دە جاعداي جاسالىپتى. بيىلدان باستاپ مۇندا ستسەنو­گرافيا, ونەرتانۋشى, حورەوگرافيا, بەينەلەۋ, ساۋلەت ونەرى, وپەراتور­لىق ونەر جانە وزگە دە مامان­دىق­تار وقىتىلادى. بۇرىن سوڭدى ونەر­دىڭ بارلىق ءتۇرىن وقىتاتىن, وسىن­داي ۋاقىت تالابىنا تولىق جاۋاپ بەرە­تىن ونەر وشاعى ەلىمىزدە بول­ما­عان ەدى. جاس تالانتتاردىڭ تالابىن ۇشتاپ, بولاشاعىنا جول اشاتىن ۋنيۆەرسيتەتتى سالۋعا قولۇشىن سوزعان ەلباسى نۇرسۇلتان ءابىش­ ۇلى­نا دەگەن العىسىمىز بەن ريزا­شى­لىعىمىز شەكسىز. الداعى ۋاقىت­تا وسىنداي ءبىلىم ورداسىندا وقي­تىن تالاپكەرلەر دە, ولارعا ساباق بەرەتىن وقىتۋشىلار دا ءبىلىمدى دە بىلىكتى بولۋى ءتيىس. ءبىز قازىر قازاق ونەرىنىڭ ايتۋلى وكىلدەرىن شاقى­رىپ, جاستارعا ءبىلىم بەرىپ, تاربيە ۇيرەتىڭىزدەر دەپ جاتىرمىز, ىرىكتەۋ جۇمىستارى باستالىپ كەتتى, – دەيدى ۋنيۆەرسيتەت رەكتورى, قازاقستان­نىڭ حالىق ءارتىسى ايمان مۇسا­قوجاەۆا. “شابىت” شىعارماشىلىق سا­رايى­نا ارنايى كەلگەن ەلباسى نۇر­سۇلتان نازارباەۆتى سكريپكا­شى ۇل مەن قىز ادەمى اۋەزمەن قارسى الىپ, ءىلتيپات تانىتتى. ءوز كەزەگىندە پرەزيدەنت ونەرلى جاستاردىڭ اسەم اۋەزدى سازىنا شىن جۇرەكتەن العىسىن ءبىلدىردى. بۇدان كەيىن كەڭ زال ىشىندەگى ونەر جۇل­دىزدارىنىڭ ءان-كۇيىن تاماشالادى. اسىرەسە, ەۆگەني برۋسيلوۆسكيدىڭ “دۋدار-اي” وپەراسىنان ورىندال­عان ۋۆەرتيۋرا, قازاق كۇيلەرىنەن قۇ­رالعان پاپۋري, حالىقارالىق پيانيستەر كونكۋرسىنىڭ گران-پري لاۋرەاتى ابدىاحمەت ورازباقوۆتىڭ ورىنداۋىنداعى دۇنيە جۇرتشى­لىق­تىڭ كوڭىلىنەن شىقتى. ال قازاق­ستاننىڭ حالىق ءارتىسى تىلەكتەس مەي­راموۆ ەلباسىنا ارناعان ولەڭ­دى ناقىشىنا كەلتىرىپ ورىندادى. بۇدان كەيىن ەلباسى باس قالا­مىز استانانىڭ كۇن ساناپ كوركەيىپ كەلە جاتقانىن, ەكونوميكامىزدىڭ ورلەپ, وسىنداي ونەر وشاقتارىنىڭ اشىلا بەرەتىنىن تىلگە تيەك ەتىپ, بۇل ونەر ورداسىنان بولاشاقتا قازاق ەلىنىڭ ابىرويىن اسىرىپ, بەدەلىن كوتەرەتىن تالانتتى ۇل-قىز قانات­تانا بەرسىن دەگەن تىلەگىن جەتكىزىپ, عي­ماراتتى شىعارماشىلىق شابىت تەر­بەپ, شارتاراپتى شارلايتىن جاس­تار شىعاتىنىنا سەنىم ءبىلدىرىپ, ۋنيۆەر­سيتەتتىڭ قادامىنا ءسات ساپار تىلەدى. مەملەكەت باسشىسى عيمارات ءىشىن­دەگى ءدارىسحانالار مەن كينوتە­لەس­تۋديانى, كوركەم جانە حورەو­گرا­فيالىق زالدى, بالەت كلاستارىن ارا­لاپ كوردى. وقۋ ورنىندا ءبىلىم الىپ جاتقان جاس دارىندار وندا دا ءوز ونەرلەرىن كورسەتتى. ءسويتىپ, ەلوردا­مىزدا ءارى ءبىلىم بەرەتىن, ءارى كۇنى ەرتەڭ مەملەكەتىمىزدى وزىق ونەرلە­رى­مەن دۇنيەجۇزىنە تانىتىپ, الدىڭعى تولقىننىڭ ءىزىن باساتىن ۇرپاقتىڭ التىن ۇياسى شاڭىراق كوتەردى. سۇلەيمەن مامەت.