فوتو: polisia.kz
جەدەل-ىزدەستىرۋ ءىس-شارالارى كەشەنى ناتيجەسىندە ون كيلوگرامعا دەيىنگى ماريحۋانانى اقتاۋ قالاسىندا ساتۋدىڭ كەزەڭدىك سىزباسى قۇجاتتاندىرىلدى. ىزدەۋ ءىس-شارالارى قالانىڭ ءارتۇرلى جەرلەرىندە, پاتەرلەردە جانە ادام تۇرمايتىن ءۇي-جايلاردا جۇرگىزىلدى. تاركىلەنگەن ەسىرتكىنىڭ جالپى سالماعى 200 كەلىدەن استى. كورسەتىلگەن قالانىڭ ءتورت تۇرعىنى جانە ەلىمىزدىڭ وڭتۇستىك ءوڭىرىنىڭ ءبىر تۇرعىنى قاماۋعا الىندى.
«وسىنداي ادىسپەن الماتى قالاسى پد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى دە جەدەل ازىرلەمە جۇرگىزدى. ناتيجەسىندە وڭتۇستىك استانانىڭ تۇرعىنى ۇستالىپ, ونىڭ تۇرعىلىقتى جەرىنەن اسا ءىرى كولەمدە مەفەدرون جانە ماريحۋانا تاركىلەندى», دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
ودان ءارى جۇرگىزىلگەن ءىس-شارالار بارىسىندا الماتى وبلىسىندا ەسىرتكى زەرتحاناسى قىزمەتىنىڭ جولى كەسىلدى. وندا سينتەتيكالىق ەسىرتكى وندىرىسىندە پايدالانىلاتىن 600 ليتردەن جانە 100 كگ استام ءارتۇرلى پرەكۋرسورلار تاركىلەندى. وسىلايشا 100 كگ استام سينتەتيكالىق ەسىرتكىنى دايىنداۋعا جانە ساتۋعا جول بەرىلگەن جوق.
«جەدەل ءىس-شارالار جالعاسۋدا, اتالعان فاكتىلەرگە قاتىسى بار باسقا دا ادامدار انىقتالىپ جاتىر. وسى باعىتتاعى جۇمىس ىشكى ىستەر مينيسترلىگىنىڭ ەرەكشە باقىلاۋىندا», دەدى قۋاندىق الپىس.
