بۇل تۋرالى قالامگەردىڭ ۇلى ەدىگە ماعاۋين Facebook-تەگى پاراقشاسىندا جازدى.
«ارىستان اكەم فانيدەن باقيعا اتتانىپ كەتتى, اقش-تىڭ مەريلەند شتاتىنداعى ۇيىندە, بالا-شاعاسىنىڭ ورتاسىندا, 2025 جىلعى قاڭتاردىڭ 9-ى, جەرگىلىكتى ۋاقىت بويىنشا ساعات 19:55–تە (قازاقستان ۋاقىتى بويىنشا قاڭتاردىڭ 10-ى, ساعات تاڭعى 5:55)», دەپ جازدى ول.
ايتا كەتەيىك, مۇحتار ماعاۋين - تاريحشى, جازۋشى, قازاقتىڭ اۋىز ادەبيەتىن زەرتتەۋشى عالىم. فيلولوگيا عىلىمدارىنىڭ دوكتورى, قازاق كسر مەملەكەتتىك سىيلىعىنىڭ لاۋرەاتى (1984), قازاقستاننىڭ حالىق جازۋشىسى (1996).
مۇحتار مۇقان ۇلى ماعاۋين 1940 جىلى 2 اقپاندا سول كەزدەگى سەمەي وبلىسىنىڭ شۇبارتاۋ اۋدانىندا تۋعان. 1962 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن, 1965 جىلى اسپيرانتۋراسىن بىتىرگەن.
«قازاق ادەبيەتى» گازەتىنىڭ ءبولىم مەڭگەرۋشىسى, «جازۋشى» باسپاسىندا باس رەداكتوردىڭ ورىنباسارى, قازاق كسر عىلىم اكادەمياسىنىڭ م.اۋەزوۆ اتىنداعى ادەبيەت جانە ونەر ينستيتۋتىندا اعا عىلىمي قىزمەتكەر بولىپ جۇمىس ىستەگەن.
ماسكەۋدە م.گوركي اتىنداعى ادەبيەت ينستيتۋتىندا قازاق فولكلورى مەن قازاق ادەبيەتى تاريحى بويىنشا ارنايى لەكتسيالىق كۋرستار جۇرگىزگەن.
1984-86 جىلدارى «جازۋشى» باسپاسىنىڭ باس رەداكتورى, 1988-2006 جىلدارى «جۇلدىز» جۋرنالىنىڭ باس رەداكتورى بولعان.
ءباسپاسوز بەتىندە العاش رەت 1959 جىلى كورىنگەن. 60-جىلدارى نەگىزىنەن ادەبيەت زەرتتەۋشىسى رەتىندە تانىلعان. شىعارمالارى ورىس تىلىنە اۋدارىلعان, شەتەل تىلدەرىندە باسىلعان. فيلولوگيا عىلىمىنىڭ كانديداتى (1967) دەگەن عىلىمي اتاعى بار. قازاقستان جازۋشىلار وداعى باسقارماسىنىڭ حاتشىسى بولىپ قىزمەت اتقارعان.
«الاساپىران» تاريحي رومان-ديلوگياسى ءۇشىن قازاق كسر-ءىنىڭ اباي اتىنداعى مەملەكەتتىك سىيلىعىن العان. قازاقستاننىڭ حالىق جازۋشىسى (1984) اتاعىنىڭ, تۇركيانىڭ حالىقارالىق «تۇرىك دۇنيەسىنە قىزمەت» سىيلىعىنىڭ يەگەرى (1997), «تارلان» سىيلىعىنىڭ لاۋرەاتى (2002), قازاقستاننىڭ قۇرمەتتى جازۋشىسى (2019) بولعان.
2006 جىلدىڭ جەلتوقسانىندا قازاقستاننان چەح رەسپۋبليكاسىنا قونىستانعان. سودان بەرى چەحيا, اقش, تۇركيا ەلدەرىندە تۇرىپ, شىعارماشىلىقپەن, عىلىمي زەرتتەۋلەرمەن اينالىسقان.
