فوتو: اقوردا
«ارينە, پارلامەنتتىك باسقارۋ جۇيەسى دە جۇمىس جۇرگىزۋگە قۇقىلى. بۇل جۇيە ەۋروپاداعى, ءتىپتى ازياداعى بىرقاتار ەلدە ابدەن ورنىعىپ, تامىرىن تەرەڭگە جايعان. بىراق بيلىكتىڭ امبەباپ فورمۋلاسى جوق. ءار مەملەكەت ساياسي جۇيەسىن تاڭداعان كەزدە ءتول تاريحىنا, ۇلتتىق بولمىسىنا, ساياسي تاجىريبەسىنە سۇيەنەدى. مەنىڭ اپپاراتىم الەمدىك تاجىريبەنى مۇقيات زەردەلەپ جاتىر. پوستكەڭەستىك ەلدەردە پارلامەنتتىك باسقارۋ جۇيەسى جاقسى قىرىنان كورىنە العان جوق دەگەن پىكىرگە كەلىسەسىز دەپ ويلايمىن. گرۋزياداعى سوڭعى وقيعالار وسى پايىمعا ناقتى دالەل بولا الادى», دەدى پرەزيدەنت.
پرەزيدەنت مەملەكەتتىك بيلىكتىڭ ساياسي جۇيەءسىن تاڭداۋ – ايرىقشا جاۋاپتى شەشىم ەكەنىن اتاپ ءوتتى.
«مۇنداي شەشىمدەر ۇركەردەي توپتىڭ وڭاشا باسقوسۋىندا ەمەس, تەك قانا جالپىحالىقتىق رەفەرەندۋمدا قابىلدانۋى كەرەك. مەنىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» اتتى تۇجىرىمدامام قازاقستاننىڭ ساياسي جۇيەسىنە ەڭ قولايلى تۇجىرىمداما ەكەنىنە سەنىمدىمىن. بىراق ونى تولىعىمەن جۇزەگە اسىرۋ ءۇشىن ءبىز ءالى تالاي جۇمىس ىستەۋىمىز كەرەك. پرەزيدەنتتىك باسقارۋ ءتاسىلى قازاقستان ءۇشىن قازىر دە, تاياۋ كەزەڭدە دە ەڭ ۇتىمدى ءتاسىل دەپ سەنەمىن.
مەملەكەتىمىزدىڭ تۇراقتى ءارى ورنىقتى دامۋىنا زيانى تيەتىن شەشىم قابىلداۋعا مەنىڭ دە, ءسىز بەن ءبىزدىڭ دە ەش قاقىمىز جوق. مۇنداي ماسەلەگە بايلانىستى قاتەلىككە جول بەرۋگە بولمايدى. تۇپتەپ كەلگەندە, كونستيتۋتسياعا ەنگىزىلگەن وزگەرىستىڭ ءبارى – پارلامەنتتىڭ رەفورمالانۋى, اۋىل, اۋدان جانە قالا اكىمدەرىنىڭ سايلانۋى, ۇلتتىق قۇرىلتايدىڭ قۇرىلۋى جانە, ەڭ باستىسى, زاڭ ۇستەمدىگىنىڭ باسىمدىققا اينالۋى – وسىنىڭ بارلىعى ساياسي توقىراۋعا ۇشىراماۋعا سەنىمدى كەپىلدىك بەرەدى», دەدى قاسىم-جومارت توقاەۆ.
