تويدىڭ ۇلكەنى «قازاق گازەتتەرى» شاڭىراعىنداعى «كازاحستانسكايا پراۆدا», «اق جەلكەن», «ۇلان», «مىسل», «انا ءتىلى» باسىلىمدارىندا وتپەك. وسىدان 100 جىل بۇرىن, ياعني 1925 جىلى قازىرگى «اق جەلكەننىڭ» العاشقى سانى, سول كەزدەگى قازاق اۆتونوميالىق رەسپۋبليكاسىنىڭ استاناسى ورىنبوردا «پيونەر» دەگەن اتاۋمەن جارىق كورگەن بولاتىن. ادەبيەت الىپتارىنىڭ قالامىنىڭ ءىزى قالعان باسىلىم ءبىر عاسىر ۋاقىت ىشىندە ۇلت رۋحانياتىنىڭ دامۋىنا ولشەۋسىز ۇلەس قوسىپ كەلەدى.
سونىڭ ىشىندە اقىن فاريزا وڭعارسىنوۆا باسقارعان كەزەڭىنىڭ ورنى بولەك.
2025 جىلى قازاق جۇرتشىلىعى «ۇلان» گازەتىنىڭ 95 جىلدىعىن دا اتاپ وتەدى. العاشىندا «جاس الاش» گازەتىنىڭ قوسىمشاسى رەتىندە جارىق كورگەن باسىلىم 1930 جىلدىڭ 5 قاراشاسىندا ءوز الدىنا جەكە وتاۋ تىگىپ, بالالاردىڭ سۇيىكتى گازەتىنە اينالدى. وسىلايشا, «ۇلان» 95 جىل بويى قازاقتىڭ بولاشاق قالامگەرلەرىنىڭ قالامىن ۇشتاپ كەلەدى.
سونداي-اق 1990 جىلدىڭ 22 ناۋرىزىندا قازاق ءتىلىنىڭ قۇتحاناسىنا اينالعان «انا ءتىلى» گازەتىنىڭ العاشقى سانى وقىرمانعا جول تارتقانى بەلگىلى. ياعني ۇلت باسىلىمىنىڭ 35 جىلدىق مەرەيتويى دا تابالدىرىعىمىزدى اتتادى.
بيىل قازاقستاننىڭ ورىس ءتىلدى جۋرناليستيكاسىندا دا اتاۋلى مەرەكەلەر از ەمەس. بيىل بۇقارا «مىسل» جۋرنالى مەن «كازاحستانسكايا پراۆدا» گازەتتەرىنىڭ دە 105 جىلدىعىن تويلايدى.
«قازاق گازەتتەرى» اتتى ءبىر شاڭىراقتىڭ استىندا بىرىككەن جوعارىداعى تاريحي باسىلىمداردىڭ ءبارىن ««Egemen Qazaqstan» ۇجىمى مەرەيتويلارىمەن شىن جۇرەكتەن قۇتتىقتايدى. سونىمەن بىرگە 2025 جىلى 25 جىلدىق مەرەيتويىن اتاپ ءوتىپ جاتقان بالالارعا ارنالعان «ايگولەك» جۋرنالى مەن «قازاق ءۇنى» گازەتتەرىنە دە شىعارماشىلىق تابىس تىلەيمىز!
