سپورتشىلار قىستىڭ ايازدى كۇندەرىنە قاراماستان شىرت ۇيقىدا جاتقان ەلدەن الدەقايدا ەرتە ويانىپ, قالا تازالىعىنا جۇمىلاتىن جۇمىسشىلارعا دەگەن ءىلتيپاتىن, العىسىن وسىلاي ءبىلدىرۋدى ۇيعارىپتى. «تازا قازاقستان» ەكولوگيالىق اكتسياسى اياسىندا ۇيىمداستىرىلعان ءىس-شاراعا ۇلەس قوسۋدى ويلاعان سپورتشىلار تاڭسارىدەن قالاداعى ەمەندەر اللەياسىنا جيىلدى. اللەيانىڭ قارىن كۇرەپ, مۇزىن ويىپ, تۇرعىندارعا جايلى جاعداي جاساۋدىڭ قامىمەن جۇرگەن تازالىقشىلار دا سول ماڭنان تابىلدى. جۇمىسشىلارعا شاي, باۋىرساق ۇسىنعان سپورتشىلار تازالىقشىلار الدەنىپ, جىلىنىپ العانشا سول ماڭنىڭ قارىن كۇرەدى. قىتىمىر قىستىڭ ايازىنا, كوكتەمنىڭ جاڭبىرىنا, جازدىڭ اپتاپ ىستىعىنا, كۇزدىڭ داۋىلدى كۇندەرىنە قاراماي, قالا تازالىعىن ساقتاۋعا جاردەمدەسەتىن ەڭبەكقور جاندارعا ماقتاۋ-ماداق جاۋدىردى. ەلىشىلىك, جاھاندىق جارىستاردا اتوي سالىپ جۇرگەن وعلاندارمەن اڭگىمەلەسكەن مەكەمە جۇمىسشىلارى كۇندەلىكتى قاۋىرت تىرشىلىكتەن ءبىر ءسات دامىلداپ, سەرگىپ قالدى. سپورتشىلار جاعى بولسا تازالىقشىلاردىڭ اق ادال ەڭبەگىن كوزبەن كورىپ, از-ماز جاردەمدەسكەن سوڭ, جۇمىسشىلارعا دەگەن سىي-قۇرمەتى بۇرىنعىدان دا ارتا تۇسكەنىن جاسىرمادى.
ەمەندەر اللەياسىنا كەلگەن سپورتشىلاردىڭ اراسىندا دزيۋدو, گرەك-ريم, دجيۋ-دجيتسۋ سىندى وزگە دە سپورت تۇرلەرىنەن ءبىراز بەلەستى باعىندىرىپ ۇلگەرگەن ماقسات سايلاۋ, مەرەي ماۋلىتقانوۆ, ايبەك ايتبەكوۆ, ءمادي امانگەلدى, نۇرجان باتىربەكوۆ, نۇربەك تالبۋدين, نۇرسۇلتان دۇيسەنقۇلوۆ, ناريمان سەكەن سىندى مىقتىلار بولدى. مانەرلەپ سىرعاناۋشى زەرە ساربالينا مەن ايزا مامبەكوۆا دا كوپتىڭ ورتاسىنان تابىلدى. ەكولوگيالىق اكتسيا جايىندا پىكىر ايتقان استانا قالاسىنىڭ مما بويىنشا اعا جاتتىقتىرۋشىسى نۇرلان قارابالين قالا تۇرعىندارىن تازالىق ساقتاۋعا, قالا تازالىعىنا جاۋاپتى جۇمىسشىلاردىڭ ەڭبەگىن باعالاۋعا شاقىردى.
«بۇگىن ءبىز «تازا قازاقستان» ەكولوگيالىق اكتسياسى اياسىندا قالا تازالىعىنا از-كەم بولسا دا ءوز ۇلەسىمىزدى قوسىپ, تازالىقشىلارعا قولداۋ كورسەتۋگە شىقتىق. شىن مانىندە كوممۋنالدىق قىزمەتكەرلەردىڭ ەڭبەگى ۇلكەن. بىراق ءبىز ارقايسىمىز كۇندەلىكتى تىرشىلىكتىڭ قامىمەن جۇرگەندە ولاردى ەلەپ-ەسكەرە بەرمەيمىز. ءبىز بۇگىن قالا تازالىعىنا قۇرال-سايماندارىن سايلاپ, تاڭ اتپاي كوشە تازالاۋعا شىعاتىن ازاماتتاردىڭ جۇمىسىن كوزبەن كورىپ, ءوزىمىز دە قولعا كۇرەك الدىق. بۇل شارۋا اسىرەسە, ايازدى كۇندەرى ادامدى ابىگەرگە سالادى ەكەن. قالانىڭ سۋىعى ءوز الدىنا, ايازدى جەل بەتتى قارىعاندا تىنىستى تارىلتىپ جىبەرەدى. ءبىز قالا تازالىعىن ساقتاۋعا اتسالىسقان جانداردى قۇرمەتتەيمىز. قۇرمەتتەگەن سوڭ, ەكولوگيالىق اكتسياعا جيىلدىق. تۇرعىنداردىڭ كورىنگەن جەرگە كۇل-قوقىس تاستاماي, تازالىق ساقتاۋى – قالا تازالىعىنا جاۋاپتى مامانداردىڭ ەڭبەگىن قۇرمەتتەگەنى دەپ تۇسىنەمىز. سوندىقتان قالا تۇرعىندارىن تازالىق ساقتاۋعا شاقىرامىز. قالا تازالىعىنا كوممۋنالدىق قىزمەتكەرلەر عانا ەمەس, قالا تۇرعىندارى دا جاناشىر بولسا ەكەن دەيمىز», دەيدى نۇرلان قارابالين.
بيىل «تازا قازاقستان» ەكولوگيالىق اكتسياسى اياسىندا استانا قالاسىنىڭ عانا ەمەس, ەلىمىزدىڭ بارلىق ايماعىنداعى تۇرعىندار ءوزىنىڭ قالاسىن, اۋىلىن, اۋلاسىن كۇل-قوقىستان تازالاۋعا شىققانىن اقپارات قۇرالدارىندا جاريالاپ, كورسەتىلىپ جاتىر. مۇنىڭ ءمان-ماڭىزى «تازالىق تازا جەردە ەمەس, تازالىق ساقتاعان جەردە بولادى» دەگەن ءبىراۋىز سوزبەن ۇندەسەدى.
