فوتو:
كەزدەسۋدە قازاقستان مەن Euronews تەلەارناسى اراسىنداعى ىنتىماقتاستىق ماسەلەلەرى تالقىلاندى. بۇل – كوپتەگەن تىلدە حابار تاراتاتىن الەمدەگى كوشباسشى باق-تىڭ ءبىرى.
قاسىم-جومارت توقاەۆ Euronews ارناسىنىڭ ەلىمىزدە ايماقتىق حابى اشىلۋىن وتە ماڭىزدى وقيعا دەپ باعالادى. وسى ارقىلى دۇنيە ءجۇزىنىڭ تۇكپىر-تۇكپىرىندەگى كورەرمەن قازاقستاننىڭ عانا ەمەس, ورتالىق ازيانىڭ ەكونوميكالىق, مادەني جانە تۋريستىك الەۋەتىمەن جاقىن تانىسۋعا مۇمكىندىك الادى.
پرەزيدەنت اتالعان مەديا الاڭى ايماقتاعى ەلدەر مەن ەۋروپا وداعى اراسىنداعى ديالوگ پەن ءوزارا تۇسىنىستىكتى ىلگەرىلەتۋگە سەپتىگىن تيگىزەتىنىنە نازار اۋداردى.
ءوز كەزەگىندە پەدرو ۆارگاس داۆيد Euronews Academy جوباسىنىڭ جوسپارىمەن تانىستىردى. اتالعان باستاما قازاقستان جۋرناليستەرىنىڭ زاماناۋي تەحنولوگيالاردى مەڭگەرۋى مەن جوعارى كاسىبي ستاندارتتاردى يگەرۋىنە باعىتتالعان. بۇل وتاندىق مەديانىڭ باسەكەگە قابىلەتتىلىگىن ارتتىرۋعا ىقپال ەتەدى.
مەملەكەت باسشىسىنىڭ ايتۋىنشا, ەلىمىز جاھاندانۋ جاعدايىنداعى اقپاراتتىق ورتادا ءتيىمدى جۇمىس ىستەي الاتىن بىلىكتى ماماندار دايارلاۋعا قىزىعۋشىلىق تانىتىپ وتىر.
پەدرو ۆارگاس داۆيد پرەزيدەنت قاسىم-جومارت توقاەۆتىڭ باسشىلىعىمەن قازاقستاننىڭ ورنىقتى دامۋىن قامتاماسىز ەتۋ جانە قوعامنىڭ اشىقتىعىن ارتتىرۋ ماقساتىندا جۇرگىزىلىپ جاتقان رەفورمالاردىڭ ماڭىزىنا توقتالدى.
بۇدان بولەك, اڭگىمەلەسۋ بارىسىندا الەمدەگى گەوساياسي احۋالعا قاتىستى وزەكتى ماسەلەلەر تالقىلاندى.
