كوللاج: نۇرسۇلتان جوراباەۆ
ەلىمىزدىڭ ءىرى مەگاپوليسىندە ايەلدەر قاۋىپسىزدىگى قانشالىقتى باقىلاۋعا الىنعان؟ بۇل سۇراقتىڭ جاۋابىن «Egemen Qazaqstan» گازەتىنىڭ ءتىلشىسى ايناش ەسالي ىزدەپ كوردى.
اۆتور «وتباسىنداعى وزبىرلىق: سەبەبى, سالدارى, ساباعى» اتتى ماقالاسىندا الىمجەتتىكتىڭ تاقسىرەتىن تارتىپ كەلە جاتقاندار جەتىپ ارتىلاتىنىن تىلگە تيەك ەتكەن. ماسەلەن, 2024 جىلدىڭ 10 ايىندا الماتىدا ايەلدەرگە قاتىستى 7705 قىلمىس تىركەلگەن, بۇل كورسەتكىش وتكەن جىلدىڭ وسى كەزەڭىمەن سالىستىرعاندا 8,1%-عا كەمىگەن. تۇرعىندار اراسىندا اقپاراتتىق-ءتۇسىندىرۋ جۇمىستارى جۇرگىزىلىپ, وقۋ ورىندارى مەن ۇيىمدارىندا 160 ءدارىس, ترەنينگ مەن كەزدەسۋ وتكىزىلدى. ايەلدەردى زورلىق-زومبىلىقتان قورعاۋ جونىندەگى ينسپەكتورلار 776 ايەلگە كەڭەس بەرسە, 150 ايەل داعدارىس ورتالىقتارىنا ورنالاستىرىلىپ, 9 ايەل «انالار ءۇيى» باسپاناسىنان قولداۋ تاپتى.
المالى اۋداندىق پوليتسيا باسقارماسىنىڭ ايەلدەردى زورلىق-زومبىلىقتان قورعاۋ بولىمشەسىنىڭ اعا ينسپەكتورى, پوليتسيا مايورى ايگەرىم قۇلاسبەكوۆانىڭ ايتۋىنشا, بيىل وتباسىلىق-تۇرمىستىق زورلىق-زومبىلىقتىڭ الدىن الۋ امالدارى ەداۋىر كۇشەيتىلدى. پروفيلاكتيكالىق ەسەپكە 6800-دەن استام ادام قويىلدى, 6200-دەن استام قورعانىس ۇيعارىمى شىعارىلدى. «سەرىكتەستىك – تۇرمىستىق زورلىق-زومبىلىقتىڭ الدىن الۋ قۇرالى» جوباسى اياسىندا 105 وزبىر پسيحوكوررەكتسيالىق باعدارلامالارعا جىبەرىلدى.
ەسكە سالا كەتەيىك, وسى جىلدىڭ ءساۋىرى ايىنان باستاپ قازاقستاندا ۇيدەگى زورلىق-زومبىلىق قىلمىس ساناتىنا جاتقىزىلدى, ەندىگى جەردە وتباسى مۇشەسىن ۇرىپ-سوققان, دەنساۋلىعىنا جەڭىل, ورتاشا, ياكي اۋىر زاقىم كەلتىرگەن ادام قىلمىستىق جاۋاپكەرشىلىككە تارتىلادى.
ماقالانىڭ تولىق نۇسقاسىن گازەتىمىزدىڭ №244 (30973) سانىنان وقي الاسىزدار.
