فوتو: اقوردا
مەملەكەتتىك كەڭەسشى ەرلان قارين قازاقستان جازۋشىلار وداعىنىڭ قۇرىلعانىنا 90 جىل تولۋىنا وراي ۇيىمداستىرىلعان سالتاناتتى جيىنعا قاتىسىپ, مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى.
«قادىرلى قاۋىم!
سىزدەردى قازاقستان جازۋشىلار وداعىنىڭ قۇرىلعانىنا 90 جىل تولۋىمەن قۇتتىقتايمىن!
جازۋشىلار وداعى – رۋحانياتىمىزدىڭ التىن دىڭگەگى.
بۇل ۇيىم قالامگەرلەرىمىزدىڭ كاسىبي قاۋىمداستىعى رەتىندە ءتول ادەبيەتىمىز بەن مادەنيەتىمىزدى وركەندەتۋگە جانە ونى الەمگە تانىتۋعا زور ىقپال ەتەدى. ءسوز ونەرىنىڭ قاراشاڭىراعىن ۇلتتىق بىرەگەيلىگىمىزدىڭ بەرىك تۇعىرى دەۋگە بولادى. اقىن-جازۋشىلارىمىز ۇلتتى ۇيىستىرۋ جولىندا قالتقىسىز قىزمەت ەتىپ ءجۇر. اعا بۋىن نەگىزىن قالاعان وسى ۇلاعاتتى ءداستۇر ۇزدىكسىز جالعاسىپ كەلەدى.
ادەبيەت – ويىمىزدىڭ تەرەڭدىگى مەن رۋحىمىزدىڭ اسقاقتىعىن ايعاقتايتىن ۇلى قازىنا. ونى زامان تالابىنا ساي دامىتۋ – قالامگەر قاۋىمنىڭ عانا ەمەس, مەملەكەتىمىزدىڭ الدىندا تۇرعان ماڭىزدى مىندەتتىڭ ءبىرى.
قازىر ءبىز ۇلتتىڭ جاڭا ساپاسىن قالىپتاستىرىپ جاتىرمىز. وزىق ويلى ۇرپاق تاربيەلەۋ ىسىندە زيالى قاۋىم ايرىقشا ءرول اتقارۋى كەرەك. وسى جاۋاپكەرشىلىكتى تەرەڭ سەزىنىپ, ادامگەرشىلىك قۇندىلىقتاردى كەڭىنەن دارىپتەپ جۇرگەن بارشا قالامگەرلەرگە شىنايى ريزاشىلىعىمدى بىلدىرەمىن.
سىزدەرگە باق-بەرەكە, تولايىم تابىس تىلەيمىن!
حالقىمىزدىڭ رۋحىن كوتەرىپ, تانىمىن ۇلعايتاتىن تۋىندىلارىڭىز كوپ بولسىن!», دەلىنگەن حاتتا.
