پەتروپاۆلدا جالعان اقشا جاساۋشىلار ۇستالدى

پەتروپاۆل. 17 ماۋسىم. وبلىس ورتالىعىندا 2000 تەڭگە كۋپيۋرالارىن قولدان جاساپ, پايدالانۋمەن اينالىسقان قىلمىستىق توپ قۇرىقتالدى.بۇل تۋرالى BNews.kz حابارلادى. وبلىستىق مەملەكەتتىك كىرىستەر دەپارتامەنتى قىزمەتكەرلەرىنىڭ جەدەل-الدىن الۋ شارالارى بارىسىندا 2000 تەڭگەلىك جالعان كۋپيۋرالاردى ازىرلەگەن ءۇش ادام ەكەنى انىقتالدى. «كۇنىبۇرىن كەلىسۋ ارقىلى ءبىر توپ ادامنىڭ قولدان جاسالعان اقشا كۋپيۋرالارىن وتكىزۋ ماقساتىندا باسىپ شىعارۋ وقيعاسىنا قاتىستى سوتقا دەيىنگى تەكسەرۋ جۇمىستارى باستالدى.جەدەل-الدىن الۋ شاراسىن وتكىزۋ بارىسىندا كۇدىكتى ادام سەرياسى بي 3763232 بولاتىن نومينالى 2000 تەڭگەلىك كۋپيۋرانىڭ 31 داناسىن تاپسىردى», دەدى دەپارتامەنتتىڭ باس مامانى رەنات ساحاتوۆ. قىلمىستىق ىسكە  تىكەلەي قاتىستى  كۇدىكتىلەردىڭ ءبىرىنىڭ  ۇيىن ءتىنتۋ  كەزىندە DVD ديسكىلەر, فلەش كارتا مەن جۇيەلىك بلوك جانە پلانشەت تاركىلەندى. ونىڭ ايتۋىنشا, كۋپيۋرالار نومينالى 2000 تەڭگەلىك شىنايى اقشا كۋپيۋراسىن سكانەرلەپ, ا4 فورماتتى قاعازعا ءتۇرلى-ءتۇستى پرينتەرمەن باسىپ شىعارۋ ارقىلى جاسالعان. اقشالار پەتروپاۆل اۋماعىندا پايدالانىلعان. قازىر قر قىلمىستىق كودەكستىڭ 231-ءشى بابى بويىنشا قىلمىستىق ءىس قوزعالىپ, تەرگەۋ امالدارى جۇرگىزىلۋدە. ءومىر ەسقالي. دەرەك: BNews.kz سۋرەت: egemen.kz