قاراعاندىداعى كرەمني زاۋىتىنا 258 ملن. تەڭگە ايىپپۇل سالىندى

قاراعاندى. 17 ماۋسىم. تابيعاتتى قورعاۋ پروكۋراتۋراسى قاراعاندىداعى مەتاللۋرگيالىق كرەمني شىعاراتىن زاۋىتتى شومىشتەن قىستى. وبلىستىق ەكولوگيا دەپارتامەنتى قىزمەتكەرلەرىنىڭ تەكسەرۋى بارىسىندا اتالعان كاسىپورىننىڭ تابيعاتتى لاستاعانى انىقتالىپ, سوت شەشىمىمەن وعان 258 ميلليون تەڭگە ايىپپۇل سالىندى. بۇل تۋرالى قاراعاندى وبلىستىق ەكولوگيا دەپارتامەنتى حابارلادى. زاۋىتتا 2011 جانە 2012 جىلدارى ەكى بىردەي كەن تەرميالىق پەش جۇمىس ىستەگەن. بۇل پەشتەردىڭ مۇرجاسىنا ورناتىلعان تازارتۋ قوندىرعىلارى بولعانىمەن, ارا-تۇرا ۋلى گاز اۋاعا جايىلىپ تۇرىپتى. ناقتىراق ايتار بولساق, 2011 جىلى اتالعان قوندىرعى ىستەن شىعىپ, 29,5 ساعاتتاي, ال 2012 جىلى 253 ساعات شاماسىندا ءوشىپ تۇرعان. سونىڭ كەسىرىنەن ۋلى گاز اۋاعا ەمىن-ەركىن جايىلعان. ماماندار قورشاعان ورتاعا كەلتىرىلگەن زالالدى شوتقا قاعىپ, تابيعات 258,8 ميلليون تەڭگە شاماسىندا زيان شەكتى دەگەن قورىتىندىعا كەلدى. ماۋسىم ايىنىڭ 9-ىندا بولعان ەكونوميكالىق سوت كرەمني زاۋىتىنا 258,8 ميلليون تەڭگە ايىپپۇل كەسىپ, كاسىپورىننان 7,7 ميلليون تەڭگە كولەمىندە مەملەكەتتىك باج سالىعىن الۋ جونىندە شەشىم شىعاردى. قايرات ءابىلدينوۆ. دەرەك: قاراعاندى وبلىستىق ەكولوگيا دەپارتامەنتى. سۋرەت: egemen.kz.