سپورتشىلاردىڭ وتكەن اپتاداعى جەڭىستەرى

شاحمات: يتاليانىڭ مونتەسيلۆانو قالاسىندا كادەتتەر اراسىنداعى (U8-U12) الەم چەمپيوناتىندا قازاقستان قۇراماسى وكىلدەرى 2 التىن, 1 كۇمىس جۇلدە ولجالاپ, جالپىكوماندالىق ەسەپتە 1-ورىنعا يە بولدى.

كونكيمەن جۇگىرۋ: پولشانىڭ توماشۋۆ-مازوۆەتسكي قالاسىندا ۇيىمداستىرىلعان الەم كۋبوگى كەزەڭىندە قازاقستان جاسوسپىرىمدەر قۇراماسى قولا مەدال جەڭىپ الدى.

بادمينتون: Bahrain International Series II 2024 (باحرەين) تۋرنيرىندە دميتري پانارين – ايشا جۇمابەك جۇبى ۇزدىك شىقتى. وعان قوسا, د.پانارين جەكەلەي سىندا قولا مەدال يەلەندى.

تەننيس: مەكسيكانىڭ مەريدا قالاسىندا جاسوسپىرىمدەر اراسىنداعى ITF J500 تۋرنيرىندە ءامىر ومارحانوۆ جەڭىمپاز اتاندى. ول رەسەيلىك تيموفەي دەريپاسكومەن جۇپ قۇراپ, فينالدا چەحيالىق پەتر برۋنليك پەن ۇلىبريتانيالىق چارلي روبەرتسوندى تىزە بۇكتىردى – 6:4, 6:1.

فۋتزال: حورۆاتيانىڭ زاگرەب قالاسىندا فۋتزالدان چەمپيوندار ليگاسىنىڭ ەليتالىق كەزەڭىندە «قايرات» كومانداسى B توبىندا ءبىرىنشى ورىنعا يە بولىپ, «تورتتىك فينالعا» جولداما الدى.