استانا بازارىنداعى بۇزاقىلىققا بايلانىستى 18 ادام تۇتقىندالدى

استانا. 17 ماۋسىم. استانانىڭ پوليتسيا قىزمەتكەرلەرى «استانالىق» بازارى ماڭىنداعى بۇزاقىلىققا قاتىستىلىعىن تەكسەرۋ ماقساتىندا 18 ادامدى ۇستادى. اتالعان بازار حالىق اراسىندا «ارتەم» ساۋدا ءۇيى دەگەن اتپەن بەلگىلى. بۇل تۋرالى قالالىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. كەشە, ساعات 20:10 شاماسىندا دەپارتامەنتتىڭ جەدەل باسقارۋ ورتالىعىنا ساۋدا ءۇيىنىڭ قاۋىپسىزدىك قىزمەتكەرلەرى قايىرشى ايەلدى ۇستاعانى تۋرالى حابار كەلىپ تۇسكەن. ءتارتىپ ساقشىلارى 30 جاستاعى ايەلدىڭ ءىى توپتاعى مۇگەدەك جانە مەكتەپ جاسىنا دەيىنگى ءۇش بالاسىمەن قايىر سۇراۋ ماقساتىمەن الماتىدان استاناعا ارنايى كەلگەنىن انىقتادى. ول بۇعان دەيىن دە وسىنداي قۇقىق بۇزۋشىلىعى ءۇشىن اكىمشىلىك جاۋاپكەرشىلىككە تارتىلعان. ايتا كەتەيىك, كەشە كەشكىسىن قايىر سۇراعان ازاماتشا ب. مەن ساۋدا ءۇيىنىڭ قاۋىپسىزدىك قىزمەتكەرلەرى سوزگە كەلىپ, سوڭى جانجالعا ۇلاسادى. ولاردىڭ جانىنا سول جەردەگى ادامدار جينالىپ, كوبەيە تۇسكەن. وسى وقيعاعا بايلانىستى 18 ادام قولعا ءتۇستى. ولاردىڭ اراسىندا ماس ادامداردىڭ دا بار ەكەنى بەلگىلى بولىپ وتىر. زارداپ شەككەندەر مەن م ۇلىككە زاقىم كەلۋ دەرەكتەرى انىقتالعان جوق. بۇگىندە بۇل فاكت سوتقا دەيىنگى تەرگەۋدىڭ بىرىڭعاي تىزىلىمىنە تىركەلدى. ازاماتشا ب.-نىڭ ارىزىمەن قازاقستان رەسپۋبليكاسى قىلمىستىق كودەكسىنىڭ 252-بابى بويىنشا (جەكە كۇزەت قىزمەتتەرى قىزمەتشىلەرىنىڭ ءوز وكىلەتتىكتەرىن اسىرا پايدالانۋى) سوتقا دەيىنگى ءوندىرىس باستالدى. سونداي-اق, ساۋدا ءۇيى قاۋىپسىزدىك قىزمەتكەرلەرىنىڭ ارىزىمەن قىلمىستىق كودەكستىڭ 293-بابى بويىنشا (بۇزاقىلىق) ماتەريال تىركەلدى. قازىر وسى ىسكە قاتىستى تەرگەۋ امالدارى جۇرگىزىلۋدە. ەلامان قوڭىر. دەرەك: استانا قالالىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: today.kz.