كەندى التايدا

فۋتبول اكادەمياسى اشىلادى, حوككەي قايتا تۇلەيدى شىعىس قازاقستان – سايىپ­قىران سپورتشىلار تۋعان, وليم­پيادا مەن الەمدىك دودا­لاردىڭ جەڭىمپازدارىن سىيلاعان وڭىرلەردىڭ ءبىرى. كەندى التايدىڭ بولمىسى شىعار, بۇل ولكەدەن تۇلەپ ۇشقان جاس سپورتشىلار زاۋدە ءبىر بيىكتى باعىندىرماي قايتپايدى. بۇگىندە ءوڭىر جۇرتشىلىعىنىڭ سپورتپەن شۇعىلدانۋىنا, سالاماتتى ءومىر سالتىنا كوڭىل بولۋىنە مەملەكەت تاراپىنان بارلىق جاعداي جاسالۋدا. الدا شىعىسقازاقستاندىق سپورتسۇيەر قاۋىمدى تىڭ جاڭالىقتار كۇ­تىپ تۇر. تاياۋدا وبلىس اكىمى دا­نيال احمەتوۆ سپورتشىلار قاۋىمداستىعىمەن جۇزدەسۋىندە بۇل تۋرالى تارقاتىپ ايتتى. وبلىس سپورتىنىڭ دامۋ ماسەلەلەرىن تالقىلاعان جيىندا حالىقارالىق جارىستاردا جەڭىمپاز اتانىپ, جۇلدەگە يە بولىپ جۇرگەن شى­عىسقازاقستاندىق سپورتشىلار ماراپاتتالدى. وسكەمەندەگى مە­تاللۋرگتەردىڭ مادەنيەت سارايىندا وتكەن جيىندا سپورتشىلار 150 مىڭ تەڭگەدەن 1 ميلليون تەڭگەگە دەيىنگى وبلىس اكىمىنىڭ ستيپەندياسىنا يە بولدى. ستيپەنديا يەگەرلەرى قاتارىندا وليمپيادا چەمپيونى ولگا رىپاكوۆا, شاڭعى جارىسى بويىنشا الەم كۋبوگى كەزەڭىنىڭ جەڭىمپازى, 2015 جىلعى الەم چەمپيوناتىنىڭ قولا جۇلدەگەرى الەكسەي پولتورانين, فريس­تايلدان بۇكىلالەمدىك قىسقى ۋنيۆەرسيادا جەڭىمپازى يۋليا گالىشەۆا, فريستايلدان الەم چەمپيوناتىنىڭ كۇمىس جۇلدەگەرى, ۋنيۆەرسيادانىڭ كۇمىس جۇلدەگەرى دميتري رەيحەرد, ەركىن كۇرەستەن ازيا چەمپيونى راسۋل قاليەۆ جانە تاعى باسقا بەلگىلى سپورتشىلار بار. ەلىمىزدىڭ ۇلتتىق قۇراماسى ساپىندا ونەر كورسەتىپ, ولجالى قايتىپ جۇرگەن قايسار ۇل-قىزداردى قۇتتىقتاعان وبلىس باسشىسى شىعىس قازاقستاندا سپورتتى دامىتۋ سالاسىندا اتقارىلار جۇمىستارعا توقتالدى. ءوڭىر باسشىسىنىڭ ايتۋىنشا, جاقىندا وسكەمەندە فۋتبول اكادەمياسى قۇرىلادى. جۇمىستى ۇيىمداستىرۋ ءۇشىن شەتەلدەردەن ماماندار شاقىرىلادى. قازىرگى ۋاقىتتا اتالعان اكادەمياعا نەمىس, يسپان فۋتبول مەكتەپتەرىنىڭ تاجىريبەلەرىن پايدالانۋ ماسە­لەلەرى قاراستىرىلۋدا. بۇل ورايدا بەس جىل بويى ءوڭىردىڭ تالانتتى سپورتشىلارىن ءتار­بيەلەۋمەن شۇعىلداناتىن ءجا­نە ءوز تاجىريبەسىن جەرگىلىكتى جاتتىقتىرۋشىلارمەن بولىسەتىن جوعارى كاسىبي بىلىكتى ماماندار شاقىرۋ كوزدەلىپ وتىر. – ءبىز ەگەر الەمدىك فۋتبول دەرجا­ۆالا­رىنداعىداي بالالار فۋتبولىن دامىتۋدى قولعا الماساق, جاقسى ناتيجەگە ەشقاشان قول جەتكىزە المايمىز. ال فۋتبول اكادەمياسىن قۇرۋدىڭ ناتيجەسىندە بالالارىمىزدا جوعارى كاسىپقويلىق پايدا بولادى, لايىقتى ءبىلىم الادى, ساپالى مەديتسينالىق قىزمەتكە قول جەتكىزەدى. ارينە, ءبىرىنشى كەزەكتە ءبىز تەك سپورتتىق جارىستاردىڭ جەڭىمپازدارىن عانا ەمەس, ءوز ەلىمىزدىڭ لايىقتى ازاماتتارىن تاربيەلەيتىنىمىزدى ەستە ۇستاۋىمىز قاجەت, – دەدى ءوڭىر باسشىسى. ەندى سەمەي مەن وسكەمەن قالالارىنداعى فۋتبول كلۋبتارىنىڭ ورنىنا ءبىر عانا «التاي» كلۋبى جۇمىس ىستەيدى. تەڭبىل دوپ تەبۋدى ۇيرەتەتىن مەكتەپتەر مەن جاڭا اكادەميا اتالعان كلۋبتى ويىنشىلارمەن قامتاماسىز ەتەدى. وبلىس اكىمى ۇزدىك سپورتتىق الاڭدار جانە سۋ باسسەيندەرى ءوڭىرىمىزدىڭ نەگىزگى بايلىعى سانالاتىن بالالارعا بەرىلگەنىن اتاپ ءوتتى. ياعني ولاردىڭ اراسىنان كەلەشەكتە بيىكتى باعىندىراتىن مىقتى سپورتشىلار شىعاتىن بولادى. – ءبىز وسكەمەندىك «تورپەدو» كومانداسىنىڭ داڭقىن قايتارۋى­مىز ءتيىس. سوندىقتان جاس حوككەي­شىلەردى ءوز ءىسىنىڭ شەبەرى ەتىپ تاربيە­لەۋ كەرەك. بۇل ءۇشىن ەۋروپا مەن سولتۇستىك امەريكا, رەسەي ەلدەرىنەن بەلگىلى باپكەرلەردى شاقىرۋىمىز, جاڭا مۇز الاڭ­دارىن سالۋىمىز قاجەت, – دەدى وبلىس اكىمى – شايبالى حوككەيدى شىڭعا شىعارۋ ءۇشىن «تورپەدو» كلۋبىنىڭ بۇرىنعى اتاۋى قايتارىلىپ, ونىڭ لايىقتى ونەر كورسەتۋىنە قولايلى جاعداي جاسالۋدا. اتاپ ايتقاندا, ءۇش ۇلكەن بازالىق كلۋب, ەكى فارم-كلۋب قۇرىلدى. وسكەمەندە ءۇش حوككەي ءمودۋلى بار. جىل سوڭىنا دەيىن ريددەر مەن زىرياندا حوككەي مودۋلدەرى اشىلادى. حوككەيدى دامىتۋعا ءۇرجار مەن اياگوز اۋداندارى دا قاتىسادى. اتالعان اۋدانداردا كەلەر جىلى جاڭا مۇز ايدىنى كەشەنى بوي كوتەرمەك. – سەمەي قالاسىندا 200 ادام­دىق سپورت ينتەرناتىن سالىپ, وعان سپورتتىق الەۋەتى مىقتى بالالاردى ورنالاستىرامىز. پان­سيوناتتىڭ جانىنا جاڭا مەديتسينالىق جابدىقتارمەن جاراق­تاندىرىلعان زاماناۋي وڭالتۋ ورتالىعى پايدالانۋعا بەرىلەدى, – دەدى د.احمەتوۆ. ءدال وسى ىسپەتتى جۇمىستار سامبو, بوكس, دزيۋدو سالالارىن دامىتۋ بويىنشا دا جۇرگىزىلەتىن بولادى. ال ريددەر قالاسىندا اۋىر اتلەتيكا بويىنشا مامانداندىرىلعان مەكتەپ قۇرىلىسىن جۇرگىزۋ جوسپارلانىپ وتىر. قازىرگى كەزدە شىعىس قازاقستان وبلىسىندا سپورتتىڭ 88 تۇرىمەن شۇعىلدانۋعا ارنالعان 3232 سپورت نىساندارى قىزمەت ەتەدى. دۋمان اناش, «ەگەمەن قازاقستان». وسكەمەن.