ارداگەر مۇراسىنىڭ تۇساۋكەسەرى

جاقىندا استاناداعى ق.قۋانىشباەۆ اتىنداعى قازاق دراما تەاترىن­دا قورعالجىن ءوڭىرىنىڭ ارداقتى ازاماتى, كەڭەس-پارتيا قىزمەتىنىڭ ارداگەرى, ارتىندا شىعارماشىلىق مول مۇرا قالدىرعان ەرمەك بىجكەنوۆتى ەسكە الۋ جانە ونىڭ «ارمان اسۋىندا», «جان تىنىسى» اتتى كىتاپتارىنىڭ تۇساۋكەسەرى بولىپ ءوتتى. كەشتى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, فيلولوگيا عىلىمدارىنىڭ دوكتورى, پروفەسسور ديقان قام­زابەك ۇلى مودەراتور رەتىندە ءجۇر­گىزىپ وتىردى. «قازاق دالاسى ءسوز قادىرىن بىلەتىن ازاماتتاردان كەندە بولعان ەمەس. ءتىپتى, تاڭداعان ماماندىعى ءتىل-ادەبيەتتەن بولەك ازاماتتار دا كوركەمسوز ونەرىنە حال-قادەرىنشە اتسالىستى. كەڭەس-پارتيا قىزمەتىندە بولعان تالاي قايراتكەرلەردىڭ حالقىمىزدىڭ رۋحاني مۇراسىن تولىقتىرعانى دا وقىرمان قاۋىمعا بەلگىلى. وسى ورايدا, اقمولا جانە قورعالجىن وڭىرىنە بەلگىلى ازامات, وسى ايماق­تاعى تالاي شارۋاشىلىقتى ۇيىم­داستىرىپ, ءبىلىم جانە اعارتۋ سالاسىن دامىتقان قايراتكەر, حال-قادەرىنشە ادەبيەت پەن ونەرگە اتسالىسقان قالامگەر ءھام اۋدارماشى ەرمەك بالتاباي ۇلى بىجكەنوۆتىڭ تۋعانىنا 80 جىل تولعان جانە ونىڭ قالامىنان شىققان تۋىندىلارىنىڭ وقىرمان قاۋىمعا جول تارتقان تۇساۋكەسەر كەشىنە جينالىپ وتىرمىز», دەدى ول ءوزىنىڭ كىرىسپە سوزىندە. «ءال-فارابي اتىنداعى قازاق ۇلتتىق ۋنيۆەرسيتەتىنىڭ قارا شا­ڭىراعىندا ءبىلىم نارىمەن سۋ­سىنداعان ەرمەك بالتاباي ۇلى قالادا قالىپ, قالامگەرلەردىڭ ءدۇبىرلى توبىنىڭ بەل ورتاسىندا جۇرمەسە دە ەل اراسىندا تۇ­رىپ شىعارماشىلىقپەن اينالىستى. ارتىندا قالعان «كۇيەۋ بالاعا قۇرىلعان تور», «ءومىر وتكەلىندە», «ارمان اسۋىندا» اتتى تۋىندىلارىمەن ۆ.دروزدان اۋدا­رعان «سلاستيوننىڭ باس كيىمى» پوۆەسى كاسىبي جازۋشى ەمەس, ادە­بيەتتىڭ كيەسىن تۇسىنگەن ازامات­تىڭ قالامىنان تۋعان قۇندى ءدۇ­نيەلەر», دەدى تۇساۋكەسەر كەشىندە ەرمەك بىجكەنوۆتىڭ ءومىرى مەن شى­عارماشىلىق ەڭبەگى حاقىندا بايانداما جاساعان ەۋرازيا ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى سەرىك نەگيموۆ. ءيا, بىلىكتى دە ءبىلىمدى ەرمەك بىجكەنوۆ ءوزىنىڭ بۇكىل سانالى عۇمىرىن قورعالجىن ءوڭىرىنىڭ ەكونوميكالىق-الەۋمەتتىك جاع­دايىن جاقسارتۋعا, وقۋ-اعارتۋ سالاسىن دامىتۋعا ارنادى. ول 1956 جىلى قازمۋ-دى ۇزدىك ءبىتىرىپ, ارنايى جولدامامەن قورعالجىن اۋداندىق وقۋ بولىمىندە مەكتەپ ينس­پەكتورى بولىپ ەڭبەك جولىن باستايدى. مىنە, وسىدان باستاپ ءومىرىنىڭ سوڭىنا دەيىن وسى وڭىردە تاپجىلماي ەڭبەك ەتىپ, قورعالجىن اۋداندىق پارتيا كوميتەتىنىڭ يدەولوگيا جونىندەگى حاتشىسى لاۋازىمىنا دەيىنگى ءوسۋ جولىنان وتەدى. وكىنىشكە قاراي, ەرمەك بالتاباي ۇلىنىڭ ءومىرى اققان جۇلدىزداي قىسقا بولدى. الايدا, ول وسى جارتى عاسىر قىسقا عۇمىرىندا ادال ەڭبەگىمەن تۋعان ەلىنىڭ ۇلكەن قۇرمەتىنە بولەنىپ, ارتىندا وشپەس ءىز قالدىردى. تۇساۋكەسەر راسىمىندە ەرمەك ءبىج­كەنوۆتىڭ ۋنيۆەرسيتەتتە ءبىر كۋرس­تا وقىعان دوسى, قازاقستاننىڭ ەڭ­بەك سىڭىرگەن قايراتكەرى, اقىن نۇرعوجا وراز, قورعالجىن ءوڭىرىنىڭ ارداگەرلەرى, اۋىل شارۋاشىلىعى عىلىمدارىنىڭ كانديداتى, زەينەتكەر بوستان شاحمانوۆ, تەحنيكا عىلىمدارىنىڭ كانديداتى,  زەينەتكەر جاڭبىرشى نۇركەنوۆ, قورعالجىن اۋدانى اكىمىنىڭ ورىنباسارى ساعدات اققوجينا, قورعالجىن اۋدانى №1 مەكتەپ-ليتسەيىنىڭ ديرەكتورى نۇرلان ءتاجين جانە وسى جولداردىڭ اۆتورى ءسوز سويلەپ, ەرمەك بال­تاباي ۇلىنىڭ ءومىرى مەن ەڭبەك جولىنا قاتىستى ەستەلىكتەرىن ورتاعا سالدى. كەشتى ق.قۋانىشباەۆ اتىن­داعى قازاق دراما تەاترىنىڭ ارتىستەرى قالامگەر تۋىندىلارى نەگىزىندە جاسالعان ساحنالىق قويى­لىمدارمەن ورنەكتەپ وتىردى. جىلقىباي جاعىپار ۇلى, «ەگەمەن قازاقستان».