قازىرگى كەزدە كەڭقياق ەلدى مەكەنىندەگى قۇرىلىس جۇمىستارى «Samruk-Kazyna Construction» جۇمىس كوميسسياسى جۇرگىزگەن تەكسەرىستەن كەيىن ۋاقىتشا توقتاتىلعان. كوميسسيا جۇمىسىنىڭ قورىتىندىسى بويىنشا مەكتەپتىڭ ىرگەتاس كونسترۋكتسيالارىندا جارىقتار پايدا بولعان, تىرەك قابىرعالار مەن اراقابىرعالاردا سىزاتتار بايقالعان. سونىمەن قاتار بەتون ءمونوليتتى بەلبەۋلەر مەن تىرەك تاباندارىندا قۇرىلىس ستاندارتتارىنا سايكەس كەلمەيتىن كەمشىلىكتەر انىقتالعان.
ماۋلەن ايمانبەتوۆتىڭ ايتۋىنشا, مەردىگەر كومپانيا بەتون بەرىكتىگىن قامتاماسىز ەتۋگە قاجەتتى شارالاردى قابىلداماعان, ال تەحنيكالىق قاداعالاۋ, قىزمەتكەرلەرى ولقىلىقتاردى ۋاقتىلى حابارلاماعان. بۇعان قوسا, ماسەلەنىڭ تۋىنداۋىنا ەلىمىزدىڭ باتىس وڭىرلەرىندە قۇرىلىس كومپانيالارى مەن بىلىكتى ماماندار تاپشىلىعى دا اسەر ەتكەن كورىنەدى. كەڭقياقتاعى مەكتەپتىڭ تەحنيكالىق قاداعالاۋىن جۇزەگە اسىرۋ ءۇشىن ۇيىمداستىرىلعان كونكۋرستارعا ەشبىر كومپانيا قاتىسپاعاندىقتان, بۇل مىندەت «سامۇرىق-قازىنا دەۆەلوپمەنت» جشس-عا جۇكتەلگەن.
«قازاقستاننىڭ باتىس وڭىرلەرىندە قۇرىلىس كومپانيالارى مەن بىلىكتى مامانداردىڭ تاپشىلىعى بار ەكەنىن اتاپ وتكىم كەلەدى. كەڭقياق اۋىلىنداعى مەكتەپتىڭ تەحنيكالىق قاداعالاۋىن جۇرگىزۋ ءۇشىن كونكۋرستىق پروتسەدۋرالار 2023 جىلدىڭ 3 قىركۇيەگىندە جانە 17 قازانىندا ۇيىمداستىرىلدى. الايدا ءوتىنىش ءبىلدىرىپ, قاتىسقان كومپانيالار بولمادى. سوندىقتان بيىلعى 15 ساۋىردە تەحنيكالىق قاداعالاۋشى رەتىندە ەرەكشە تارتىپپەن «سامۇرىق-قازىنا دەۆەلوپمەنت» جشس بەكىتىلدى», دەيدى م.ايمانبەتوۆ.
تەحنيكالىق قاداعالاۋدىڭ الدىن الا قورىتىندىسىنا سايكەس, ولقىلىقتار ىستىق اۋا رايىندا قۇيىلعان بەتونعا ءجۇردىم-باردىم قاراعاندىقتان تۋىنداعان. وندىرىستىك جۇمىس جۋرنالىنداعى جازبالارعا سايكەس, بەتون كونسترۋكتسياسىن قۇيۋ بارىسىندا اۋا تەمپەراتۋراسى +33°س قۇراعان. سونداي-اق بەتون قوسپاسى قۇرىلىس الاڭىنداعى كارميكس قوندىرعىلارىندا دايىندالعان, ال بۇل ءادىس قوسپانىڭ بەرىكتىگىنە كەرى اسەر ەتكەن.
جوعارىدا اتالعان فاكتىلەردى ەسكەرە وتىرىپ, «Samruk-Kazyna Construction» اق باسقارما توراعاسىنىڭ تاپسىرماسىنا سايكەس انىقتالعان اقاۋلار بويىنشا ەگجەي-تەگجەي تەكسەرىس جۇمىستارىن جۇرگىزەتىن ارنايى تاۋەلسىز ساراپشىلار كوميسسياسى قۇرىلدى. كوميسسيا نىساننىڭ تەحنيكالىق جاعدايىن انىقتاپ, كەلەسى قادامدار بويىنشا ءوز ۇسىنىستارىن بەرۋگە ءتيىس. ازىرگە كوميسسيا باس مەردىگەرگە بەتوننىڭ ءمونوليتتى بەلبەۋىنىڭ بەرىكتىگىن انىقتاۋ ماقساتىندا قوسىمشا زەرتحانالىق سىناقتاردى ۇيىمداستىرىپ, اككرەديتتەلگەن تاۋەلسىز زەرتحانانىڭ قۇرىلىس نىسانىنىڭ تەحنيكالىق زەرتتەۋى بويىنشا قورىتىندىسىن ۇسىنۋدى جۇكتەگەن. «Samruk-Kazyna Construction» اق كومپانياسىنىڭ ءباسپاسوز قىزمەتىنىڭ حابارلاۋىنشا, قازىرگى تاڭدا زەرتحانالىق سىناقتار جۇرگىزىلىپ جاتىر. تەكسەرىس قورىتىندىسى بويىنشا تىرەك ەلەمەنتتەرىن كۇشەيتىپ, اقاۋلاردى بىرجاقتى ەتۋ بويىنشا شارالار كەشەنى ازىرلەنەدى. شارۋانى اتقارۋعا استانالىق تاجىريبەلى كومپانيا تاڭدالىپ الىنعان. ماماندار تەكسەرىس اياقتالىسىمەن ىسكە كىرىسەدى.
ماۋلەن ايمانبەتوۆ بۇل كوميسسيانىڭ نەگىزگى مىندەتى تەك كەڭقياقتاعى مەكتەپتى عانا ەمەس, جالپى ۇلتتىق جوبا اياسىندا سالىنىپ جاتقان بارلىق نىساننىڭ ساپاسىن باقىلاۋ ەكەنىن ەرەكشە اتاپ ءوتتى.
«مەن ارنايى تاۋەلسىز ساراپشىلار كوميسسياسىن قۇرۋدى تاپسىردىم. ولار انىقتالعان اقاۋلار بويىنشا مۇقيات زەرتتەۋلەر جۇرگىزەدى. «سامۇرىق-قازىنا دەۆەلوپمەنت» كومپانياسىنىڭ كوشپەلى كوميسسياسى جۇمىسىن باستادى. ولار عيماراتتىڭ قازىرگى تەحنيكالىق جاعدايىن انىقتاپ, ءارى قارايعى ارەكەتتەر تۋرالى ۇسىنىستار بەرەدى. سونىمەن قاتار بۇل ىسكە قوسىمشا تاعى 2 تاۋەلسىز زەرتحانانى, سونىڭ ىشىندە قازاق كوپسالالى قايتا قۇرۋ جانە دامۋ ينستيتۋتىن تارتۋدى تاپسىردىم. ولاردىڭ قورىتىندىسى اقاۋلاردى جويۋ بويىنشا ناقتى شەشىم قابىلداۋعا نەگىز بولادى», دەيدى «Samruk-Kazyna Construction» اق باسقارما توراعاسى.
جوعارىدا اتاپ وتكەنىمىزدەي كەڭقياق اۋىلىنداعى قۇرىلىس جۇمىستارى ۋاقىتشا توقتاتىلدى. قۇرىلىس نىسانىنىڭ ينجەنەرلىك-تەحنيكالىق قۇرامى تولىعىمەن اۋىستىرىلىپ, جوبا جەتەكشىلەرى قىزمەتىنەن شەتتەتىلدى. بۇعان قوسا, مەردىگەر كومپانياعا اقاۋلاردى جويۋ مىندەتى جۇكتەلىپ, قۇرىلىسقا جاۋاپتى تاراپتار ارەكەتتەرىنىڭ زاڭدىلىعىنا تەكسەرىس جۇرگىزىلىپ جاتىر. ماۋلەن ايمانبەتوۆتىڭ ايتۋىنشا, جۇمىس اكتىلەرىنە قول قويىلماعاندىقتان جانە تولەم جۇرگىزىلمەگەندىكتەن, قاراجاتتى جىمقىرۋ فاكتىلەرى تىركەلمەگەن.
ايتا كەتەيىك, ەرس-شارتىنا سايكەس باس مەردىگەر نىساننىڭ قۇرىلىس كونسترۋكتسيالارىنا 5 جىل, ال تەحنيكالىق جابدىقتالۋىنا 3 جىل كەپىلدىك بەرەدى. مۇنداي جاعداي قايتالانباۋى ماقساتىندا كونسورتسيۋم قۇرامىنداعى مەردىگەر ۇيىم «Antarium Group» جشس سالىپ جاتقان باسقا دا نىساندار قوسىمشا تەكسەرىستەن وتەتىن بولدى. «Samruk-Kazyna Construction» اق كومپانياسىنىڭ ءباسپاسوز قىزمەتىنىڭ مالىمەتىنشە, «Antarium Group» جشس ديرەكتسيانىڭ كونكۋرس قۇجاتتاماسىنا قويىلاتىن قاتاڭ تالاپتارعا ساي كەلىپ, بايقاۋدان وتكەن. كومپانيانىڭ قاجەتتى ليتسەنزيالارى, قۇرىلىس سالاسىنداعى تاجىريبەسى بار, بىلىكتى ماماندارى, ارنايى تەحنيكالارى, ءبارى بار ءارى جاۋاپكەرشىلىككە دە تارتىلماعان, سالىقتى دا ۋاقتىلى تولەيدى. بىراق «جايلى مەكتەپ» جوباسىن ءجوندى تاپسىرا الماي وتىر.
كەڭقياقتاعى مەكتەپ قۇرىلىسىنىڭ ساپاسى بويىنشا تۋىنداعان ماسەلە جالپى «جايلى مەكتەپ» ۇلتتىق جوباسى اياسىنداعى قۇرىلىس ساپاسىن باقىلاۋدىڭ السىزدىگىن كورسەتىپ وتىر. ماۋلەن ايمانبەتوۆتىڭ ايتۋىنشا, «Samruk-Kazyna Construction» بارلىق قۇرىلىس قاتىسۋشىسىنىڭ جاۋاپكەرشىلىگىن كۇشەيتۋگە دايىن. كومپانيا ۇلتتىق جوبانى جۇزەگە اسىرۋ بارىسىندا انىقتالعان كەز كەلگەن كەمشىلىكتەردى جەدەل جويۋعا ۋادە بەردى.
