سەمەيگە جاڭا اكىم تاعايىندالدى

وسكەمەن. 16 ماۋسىم. ءوڭىر باسشىسى دانيال احمەتوۆتىڭ وكىمىمەن ەرماك ساليموۆ سەمەي قالاسىنىڭ اكىمى بولىپ تاعايىندالدى. قالا اكتيۆىنە جاڭا اكىمدى وبلىس اكىمى تانىستىردى. بۇل تۋرالى egemen.kz حابارلادى. «ءبىز شاھاردىڭ دامۋىنا وزگەشە رەڭ, تىڭ قارقىن بەرۋىمىز كەرەك. بۇل باعىتتا اۋقىمدى جوسپارلارىمىز بار. ەرماك بيداحمەت ۇلىنىڭ جۇمىس تاجىريبەسى مول, ىسكەر باسشى. سوندىقتان, قالا اكىمدىگى جاڭا باسشىمەن بىرگە تۇرعىندارعا قولايلى جاعداي جاسايدى دەپ سەنەمىن», – دەدى ايماق باسشىسى اكتيۆ جيىنىندا. ەرماك ساليموۆ 1957 جىلى شىعىس قازاقستان وبلىسىنىڭ كۇرشىم اۋدانىندا تۋعان. 1981 جىلى قازاق پوليتەحنيكالىق ينستيتۋتىن تاۋ-كەن ينجەنەرى-ماركشەيدەر ماماندىعى بويىنشا, 2001 جىلى قازاق مەملەكەتتىك زاڭ اكادەمياسىن زاڭگەر ماماندىعى بويىنشا تامامداعان. ەڭبەك جولىن شىعىس قازاقستان وبلىسى گلۋبوكوە اۋدانىنداعى ەرتىس پوليمەتالل كومبيناتىنىڭ بەرەزوۆسكي كەنىشىندەگى شاحتادا جەراستى تاۋ-كەن شەبەرى بولىپ باستاعان. 1994 جىلعا دەيىن ەرتىس پوليمەتالل كومبيناتىنىڭ ەرتىس كەنىشى پارتيالىق بيۋروسىنىڭ حاتشىسى, ۋچاسكە باستىعى, باس ينجەنەردىڭ ورىنباسارى بولىپ ەڭبەك ەتتى. 1994-2008 جىلدارى ازداعان ۇزىلىسپەن گلۋبوكوە اۋدانى اكىمىنىڭ ورىنباسارى بولدى. ودان كەيىن شىعىس قازاقستان وبلىسى كاسىپكەرلىك جانە ونەركاسىپ باسقارماسىنىڭ باستىعى, ريددەر قالاسىنىڭ اكىمى, شىعىس قازاقستان وبلىسى اكىمىنىڭ ورىنباسارى قىزمەتىن اتقاردى. 2010 جىلدىڭ شىلدە ايىنان بەرى زىريان اۋدانىنىڭ اكىمى قىزمەتىندە بولدى. دۋمان اناش. دەرەك, سۋرەت: egemen.kz.