اقتاۋدا سەرىكتەستىك ديرەكتورى تۇتقىندالدى

اقتاۋ. 16 ماۋسىم. اقتاۋدا پارا بەردى دەگەن كۇدىكپەن جاۋاپكەرشىلىگى شەكتەۋلى سەرىكتەستىكتىڭ ديرەكتورى تۇتقىندالدى. بۇل تۋرالى egemen.kz ءتىلشىسى حابارلادى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ماڭعىستاۋ وبلىستىق دەپارتامەنتىنىڭ قىزمەتكەرلەرى 2015 جىلدىڭ 8 ماۋسىمىندا «ALITOWN» جانە «سك «فاكەل» جاۋاپكەرشىلىگى شەكتەۋلى سەرىكتەستىكتەرىنىڭ ديرەكتورى 1987 جىلى تۋعان ك.تولەگەنوۆتى ۇستادى. قازىرگى تاڭدا وعان قاتىستى پارا بەرۋ فاكتىسى بويىنشا سوتقا دەيىنگى تەرگەۋ امالدارى جۇرگىزىلۋدە. اتالعان دەپارتامەنتتىڭ ءباسپاسوز قىزمەتى حابارلاعانداي, تۇتقىندالعان ازامات اقتاۋ قالالىق ىشكى ىستەر باسقارماسىنىڭ ۋاقىتشا قاماۋ يزولياتورىنا قامالدى. «تەرگەۋ امالدارىنىڭ جۇرگىزىلۋى سەبەپتى, بۇدان باسقا اقپارات جاريا ەتىلمەيدى», – دەلىنگەن حابارلامادا. گۇلايىم شىنتەمىرقىزى. دەرەك: egemen.kz. سۋرەت: munara.kz.