«ارابيا تۇبەگىندەگى ءال-كايدا» لاڭكەستىك ۇيىمىنىڭ باسشىسى ءولتىرىلدى

استانا. 16 ماۋسىم. «ارابيا تۇبەگىندەگى ءال-كايدا» لاڭكەستىك ۇيىمىنىڭ كوشباسشىسى ناسەر ءال-ۆاحيشي ءولتىرىلدى. بۇل تۋرالى يەمەن قاۋىپسىزدىك قىزمەتى تاراتقان اقپاراتقا سىلتەمە جاساعان CNN تەلەارناسى حابارلادى. «ارابيا تۇبەگىندەگى ءال-كايدا» ۇيىمى يەمەندە ورنالاسقان. تەلەارنا تاراتقان مالىمەتتەرگە سۇيەنسەك, لاڭكەستىك ۇيىم باسشىسى اقش-تىڭ ۇشقىشسىز باسقارىلاتىن قارۋىمەن 12 ماۋسىم كۇنى ولتىرىلگەن. امەريكا بارلاۋشىلارىنىڭ دەرەكتەرىنە قاراعاندا, قازىرگى تاڭدا اقش بيلىگى ءال-ءۆاحيشيدىڭ ولىمىنە قاتىستى اقپاراتتىڭ راس-وتىرىگىن تەكسەرۋدە. ال يەمەندە پرەزيدەنت ابد راببۋ مانسۋر حادي اسكەرى مەن «انسار اللا» شيتتىك قوزعالىسىنان شىققان كوتەرىلىس جاساقتارىنىڭ اراسىنداعى قارۋلى قاقتىعىس ءالى دە جالعاسۋدا. ب ۇلىكشىل جاۋىنگەرلەردىڭ ءبىراز بولىگى بۇرىنعى پرەزيدەنت الي ابداللا سالەحتىڭ جاقتاستارى. «ارابيا تۇبەگىندەگى ءال-كايدا» قولداۋشىلارى اسكەري قاقتىعىستارعا بەلسەندى قاتىسىپ, ەلدىڭ وڭتۇستىگىندە سوعىس جۇرگىزىپ كەلەدى. ايبەك مولداباەۆ. دەرەك: CNN. سۋرەت: ريا «نوۆوستي».