استانادا 28 جاستاعى جىگىت 11 كيلو گەروينمەن ۇستالدى

استانا. 16 ماۋسىم. استانا قالالىق ىشكى ىستەر دەپارتامەنتى ەسىرتكى بيزنەسىنە قارسى كۇرەس باسقارماسىنىڭ قىزمەتكەرلەرى ەلوردا اۋماعىندا زاڭسىز ەسىرتكى تاسىمالداعان 28 جاستاعى اقمولا وبلىسىنىڭ تۇرعىنىن قولعا ءتۇسىردى. بۇل تۋرالى قالالىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. پوليتسيا قىزمەتكەرلەرى اقمولالىق جىگىتتى جەدەل ىزدەستىرۋ ءىس-شارالارى كەزىندە قولعا ءتۇسىرىپ, ودان سالماعى 300 گرامم گەروين تاركىلەگەن. كەيىن ۇستالعان جىگىتتىڭ تۇرىپ جاتقان مەكەنجايى تەكسەرىلەدى. ءتىنتۋ كەزىندە شارۋاشىلىق قۇرىلىسىنان تاعى دا ەسىرتكى زاتتارى تابىلىپ, تاركىلەندى. ساراپتاما قورىتىندىسى بۇل زاتتاردىڭ گەروين ەكەنىن انىقتادى. تاركىلەنگەن ەسىرتكى زاتىنىڭ جالپى سالماعى – 11 كيلو. ونىڭ قارا بازارداعى قۇنى جارتى ميلليون اقش دوللارىنان اسادى. مۇنداي كولەمدەگى گەرويندى 55 مىڭ رەت مولشەردە (دوزا) قولدانۋعا بولادى. اتالعان دەرەك قىلمىستىق كودەكستىڭ 289-بابىمەن سوتقا دەيىنگى تەرگەۋدىڭ بىرىڭعاي تىزىمىنە تىركەلدى. كۇدىكتى استانا قالالىق ىشكى ىستەر دەپارتامەنتىنىڭ ۋاقىتشا ۇستاۋ يزولياتورىنا قامالىپ, سوتقا دەيىنگى تەرگەۋ جۇرگىزىلۋدە. قازىرگى تاڭدا اتالعان دەپارتامەنتتىڭ قىزمەتكەرلەرى ەسىرتكىنىڭ جەتكىزۋ مەن وتكىزۋ ارنالارىن انىقتاۋ ماقساتىندا كەشەندى جەدەل ىزدەستىرۋ ءىس-شارالارىن جۇرگىزۋدە. سونىمەن قاتار, ارنايى وپەراتسيا بارىسىندا ۇستالعان كۇدىكتىنىڭ استانا اۋماعىندا تىركەلگەن ەسىرتكى قىلمىستارىنا قاتىستىلىعى تەكسەرىلەدى. ەلامان قوڭىر. دەرەك: استانا قالالىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: lada.kz.