فوتو: قر ءسىم
سىرتقى ىستەر مينيسترلىگىنىڭ رەسمي وكىلى ايبەك سمادياروۆ تاياۋ شىعىستاعى شيەلەنىستەر سالدارىنان قازاقستان ازاماتتارى زارداپ شەكپەگەنىن ايتتى.
«يزرايل, يران جانە ليۆاندا زارداپ شەككەن نەمەسە قازا تاپقان وتانداستارىمىز تۋرالى اقپارات تۇسكەن جوق. وسى ورايدا قازاقستان ازاماتتارىن اتالعان ەلدەردە كونسۋلدىق ەسەپكە تۇرۋدى شاقىرامىز. قازىرگى ۋاقىتتا يزرايل, يران جانە ليۆاندا تۇراتىن قازاقستان ازاماتتارىنان تۇرىپ جاتقان جەرلەرىنەن شىقپاۋعا, قاۋىپسىزدىك شارالارىن بارىنشا كۇشەيتىپ, ساقتىق پەن قىراعىلىق تانىتۋدى سۇرايمىز», دەدى ايبەك سمادياروۆ.
مينيسترلىك ۇسىنعان دەرەكتەرگە سايكەس, قازاقستاننىڭ كونسۋلدىعى ەسەبىندە يزرايلدە - 120 ازامات, يراندا - 102 ازامات جانە ليۆاندا - 139 ازامات تۇرادى. ونىڭ ىشىندە ديپلوماتتار مەن ولاردىڭ وتباسى مۇشەلەرى دە بار.
«قايتالاپ ايتامىن, اتالعان ەلدەردەگى قازاقستان ەلشىلىگى وكىلدەرىمەن بايلانىس ورناتۋ اسا ماڭىزدى. سىرتقى ىستەر مينيسترلىگىندە, يزرايل, يران جانە ليۆاندا جەدەل جەلىلەر ىسكە قوسىلدى. تولىق اقپارات ءسىم-ءنىڭ جانە ەلشىلىكتەردىڭ رەسمي رەسۋرستارى مەن الەۋمەتتىك جەلىلەرىندە جاريالانادى», دەپ قوستى ايبەك سمادياروۆ.
