فوتو: pixabay
سەناتورلار كەزدەسۋلەر بارىسىندا اەس قۇرىلىسى ءوڭىردىڭ جانە تۇتاستاي العاندا بۇكىل ەلىمىزدىڭ ەكونوميكاسىنا قالاي وڭ اسەر ەتەتىنى جايىندا ەگجەي-تەگجەيلى ءتۇسىندىردى. جاڭا جۇمىس ورىندارىن اشۋ, ەنەرگەتيكالىق قاۋىپسىزدىكتى قامتاماسىز ەتۋ, سىرتتان كەلەتىن ەنەرگياعا تاۋەلدىلىكتى ازايتۋ جانە ەكولوگيالىق تازا ەنەرگەتيكاعا كوشۋ سياقتى ارتىقشىلىقتار اتاپ ءوتىلدى.
تۇرعىندار پىكىرتالاسقا بەلسەندى قاتىسىپ, اتوم ستانتسياسىنىڭ قاۋىپسىزدىگى, ولاردىڭ قورشاعان ورتاعا جانە ادامداردىڭ دەنساۋلىعىنا اسەرى تۋرالى سۇراقتار قويدى. دەپۋتاتتار قازاقستاندا اەس قۇرىلىسى حالىقارالىق قاۋىپسىزدىك ستاندارتتارىنا قاتاڭ سايكەس جۇزەگە اسىرىلاتىنىن اتاپ ءوتىپ, بارلىق سۇراقتارعا تولىق جاۋاپ بەردى.
«اتوم ەلەكتر ستانتسياسىن سالۋ – ءبىزدىڭ مەملەكەتىمىز ءۇشىن ستراتەگيالىق ماڭىزدى شەشىم. بۇل قازاقستاننىڭ ەنەرگەتيكالىق تاۋەلسىزدىگىن قامتاماسىز ەتىپ قانا قويماي, جاڭا تەحنولوگيانى دامىتۋعا جانە جوعارى تەحنولوگيالىق جۇمىس ورىندارىن اشۋعا سونى سەرپىن بەرەدى», دەپ اتاپ ءوتتى سەناتور ناۋتيەۆ.
