فوتو: kstnews.kz
بەكبولات ورىنبەكوۆ كەزدەسۋ بارىسىندا اەس قازاقستانعا ەنەرگيا تاپشىلىعى ماسەلەسىن شەشۋگە كومەكتەسەتىنىن اتاپ ءوتتى. ونىڭ ايتۋىنشا, اتوم ەلەكتر ستانتسياسى قورشاعان ورتاعا زيان كەلتىرمەي, حالىققا دا, ونەركاسىپكە دە جەتكىلىكتى ەلەكتر ەنەرگياسىن وندىرۋگە قاۋقارلى.
دەپۋتات قازاقستانعا ءوز ۋرانىن پايدالانۋ سىرتتان اكەلىنەتىن شيكىزاتقا تاۋەلدىلىكتى ازايتاتىنىنا توقتالدى. اتوم ەلەكتر ستانتسياسىنىڭ قۇرىلىسى جاڭا جۇمىس ورىندارىن اشىپ, جوعارى تەحنولوگيانى دامىتۋعا ىقپال ەتەتىنىن دە تىلگە تيەك ەتتى.
«اتوم ەنەرگەتيكاسى – قازاقستاننىڭ بولاشاعى ءۇشىن ستراتەگيالىق شەشىم. بۇل ءبىزدى تۇراقتى ەلەكتر قۋاتىمەن قامتاماسىز ەتەدى, بۇل ەكونوميكالىق ءوسۋ مەن ءال-اۋقات ءۇشىن اسا ماڭىزدى. مۇنداي جاعدايدا اتوم ەلەكتر ستانتسيالارى ءىس جۇزىندە كومىرقىشقىل گازىن شىعارمايدى. بۇل ولاردى ەكولوگيالىق تازا دەپ ەسەپتەۋگە مۇمكىندىك بەرەدى. اتوم ەلەكتر ستانتسياسىنىڭ قۇرىلىسى مىڭداعان جۇمىس ورىندارىن اشىپ, عىلىمي زەرتتەۋلەر مەن تەحنولوگيانىڭ جاڭا مۇمكىندىگىن اشادى. قازاقستان ەنەرگەتيكالىق تاۋەلسىز ەل بولۋ ءۇشىن ءوزىنىڭ ۋران قورىن پايدالانا الادى. بۇل بارلىق ازاماتتىڭ يگىلىگىنە جارايتىن تۇراقتى دامۋ مەن تازا ەنەرگياعا اپاراتىن جول», دەدى بەكبولات ورىنبەكوۆ.
سەناتور اەس جوبالاۋ جانە سالۋ كەزىندە تۇرعىنداردىڭ پىكىرلەرى ەسكەرىلەتىنىن جانە تسيفرلىق تەحنولوگيالار مەن جاساندى ينتەللەكتتى دامىتۋعا قاجەتتى قوسىمشا ەنەرگيانى تەك اتوم ستانتسياسىنىڭ قۇرىلىسى ارقىلى الۋعا بولاتىندىعىن جەتكىزدى.
