سۋرەتتى تۇسىرگەن – ەرلان ومار, «EQ»
كوكپار دوداسىنىڭ قولا جۇلدەسى ءۇشىن رەسەي قۇراماسى تۇركيادان كەلگەن كوكپارشىلارعا قارسى سايىسقا شىقتى. قۇراماسىن نەگىزىنەن قىرعىز كوكپارشىلارىنان جاساقتاعان رەسەي ويىنشىلارى جەڭىسكە جەتۋگە اسا كوپ كۇشىن سارقي قويمادى. 8:2 ناتيجەسىمەن ۇتىپ, قولا مەدال يەگەرى اتاندى.
نەگىزگى تارتىس قازاقستان ۇلتتىق قۇراماسى مەن قىرعىزستان ۇلتتىق قۇراماسى اراسىنداعى فينالدىق سايىستا ءوربىدى. تورەشىنىڭ ىسقىرىعىنان كەيىن الاڭعا لاپ قويعان شاباندوزدار «نە بەل, نە بەلبەۋ كەتەدى» دەپ شىققانىن ءا دەگەننەن ايگىلەدى. ۇلتتىق قۇرامانىڭ ۇزدىگى ەرنار ءالىمباي العاشقى مينۋتتا-اق اعىزىپ كەلىپ سەركەنى ءىلىپ اكەتتى دە, ارعىماعىمەن قۇيىنداپ كەلىپ ەسەپ اشقان. بىراق ماناس نيازوۆتاي تەگەۋرىندى كوكپارشىسى بار قىرعىز قۇراماسى دەرەۋ ەس جيىپ, تارازى باسىن تەڭەستىردى. 6-مينۋتتا قۇبانىشبەك شوقان ۇلى كەزەكتى سالىمدى ەنشىسىنە جازدى. وسىدان كەيىن-اق ولاردىڭ ويىنى ءجۇردى. ءتىپتى 1-تايمدا 1:3 ەسەبىمەن العا دا شىعىپ الدى. ابىلايحان نىشانبەكوۆ جەردەگى سەركەنى ءىلىپ الىپ تاقىمىنا باستى دا قارسىلاستىڭ شەڭبەرىنە قاراي قۇيىنداي اعىزا جونەلدى.
ەسەپ ايىرماسىن قىسقارتۋدىڭ ورايلى ءساتى تۋعان ەدى, بىراق قىرعىز قۇراماسىنىڭ قورعانىسىنداعى ويىنشىلاردىڭ اتتارىنىڭ ەستىلىگى سونداي, يەسىنىڭ ويىن ايتقىزباي ۇعاتىنداي كورىندى. جانىمىزعا جايعاسقان قىرعىزستاندىق ارىپتەسىمىز ء«بىز اتتاردى كوكپاردى نامىس ءۇشىن شابۋعا ۇيرەتەمىز» دەپ ماقتانىپ تا قويدى. ءالىپتىڭ ارتىن باعىپ, ءالى 2-تايم بار ەكەنىن ەسكەرتىپ ساباسىنا تۇسىردىك.
ۇلتتىق قۇرامانىڭ باس باپكەرى اقىلباي مانكەەۆ باستاعان, اعا جاتتىقتىرۋشى نۇرداۋلەت مومىنوۆ قوستاعان ماماندار ۇزىلىستە قايراۋ ءسوزىن قاداپ ايتىپ, نامىس دوداعا تۇسكەن شاقتا جاي وتىنداي جاسىن ويناتۋ قاجەتتىگىن جەتەسىنە جەتكىزە زەردەسىنە قۇيسا كەرەك, 2-تايمدى ساڭلاقتارىمىز شيراق باستادى. تاسقامال قورعانىستى بۇزىپ-جارىپ ايقىن باسىمدىقپەن العا شىققان قارسىلاستارىنىڭ جەڭىستى ەرتە تويلاۋىنا مۇرسات بەرگەن جوق. تارازى باسىن تەڭەستىرىپ قويماي, ءتىپتى 4:3 ەسەبىمەن العا شىققان. ويىننىڭ نەگىزگى ۋاقىتى تۇگەسىلۋىنە 30 سەكۋند قالعان ەدى. قۇرساعىنا بىتكەن شاراناسىنا قۇنداعىنا ۇل بولىپ ورالسا, ومىرگە ۋلاقشى (كوكپارشى) كەلدى دەپ قۋاناتىن قىرعىز ويىنشىلارى جانكەشتىنىڭ ءوزى ەكەن. تارازى باسىن تەڭەستىرىپ كەتتى.
وسىلايشا, دۇنيەجۇزىلىك كوشپەلىلەر ويىندارىنىڭ كوكپاردان چەمپيوندىق اتاعى قوسىمشا 10 مينۋتتىق ۋاقىتتا انىقتالدى. ياعني وسى ۋاقىت ىشىندە قاي كوماندا ءبىرىنشى سالىم سالادى, سول جەڭىسكە جەتەدى. قازاق سپورتىنىڭ باعىنا تۋعان قۇرمانبەك تۇرعانبەك ميداي ارالاسقان دودانىڭ ورتاسىنان سەركەنى سۋىرىپ اكەتتى دە, قىرعىز قۇراماسىنىڭ قورعانىسىن بۇزىپ-جارا جەڭىس سالىمىن سالدى. قازاقستان قۇراماسى – كوكپاردان ەتنوسپورت وليمپياداسىنىڭ چەمپيونى!
ەكى جىل بۇرىن تۇركيادا وتكەن كوشپەلىلەر الامانىندا كوكپاردان فينالدىق تارتىس قازاقستان مەن قىرعىزستان قۇرامالارى اراسىندا ءوتىپ ساڭلاقتارىمىز چەمپيون اتانعان بولاتىن. بۇل جولى دا سول بيىگىنەن كورىندى. ۇلتتىق قۇرامانىڭ باس باپكەرى لاۋازىمىنا كوكتەمدە تاعايىندالعان اقىلباي مانكەەۆ شاكىرتتەرىنىڭ جەڭىسكە جەتۋدە ايانىپ قالماعانىنا رازىلىعىن ءبىلدىردى.
ء«بىز و باستان-اق باستى قارسىلاس قىرعىز كوكپارشىلارى بولاتىنىن ايتتىق. سەبەبى بۇل ەلدە كوكپار ويىنىنان كوماندا اراسىنداعى سايىس جىلىنا بىرنەشە مارتە ۇيىمداستىرىلادى. جاستار قۇراماسى دا, ەرەسەكتەر كومانداسى دا وتە تەگەۋرىندى. اتتارى دا ابدەن بەيىمدەلگەن. فينالدىق سايىس اسا تارتىستى ءوتتى. ءتىپتى ءبىزدىڭ جىگىتتەر 4:3 ەسەبىمەن الدا تۇرعاندا قورعانىسىمىز سىر بەردى. بىراق قوسىمشا ۋاقىتتا جىگىتتەر نامىسقا باستى. بارشا قولداۋعا كەلگەن جانكۇيەرلەرگە العىسىمىز شەكسىز», دەدى باس باپكەر.
جەڭىس سالىمىن سالعان قۇرمانبەك تۇرعانبەك فينالدىق سايىسقا تەك جەڭىس ءۇشىن شىققانىن ايتتى. «ەكى مارتە سالىمدى بولعانىما قۋانىشتىمىن. ارينە, جەڭىسكە جەتۋگە سەبەپكەر بولعان سالىم مەنىڭ ەنشىمە جازىلعانى زور مارتەبە. قىرعىزستان قۇراماسىنىڭ مۇشەلەرىن كوكپاردان كۇمىس جۇلدە الۋىمەن قۇتتىقتايمىن. بۇل ەكى ەلگە دە ورتاق ۇلتتىق ويىن. جەڭىس بىردە ولارعا اۋسا, بىردە ءبىزدىڭ قانجىعامىزعا بايلانادى», دەدى كوكپارشى.
كوكپاردان V دۇنيەجۇزىلىك كوشپەلىلەر ويىندارىنىڭ چەمپيونى اتانعان ۇلتتىق قۇراما مۇشەلەرى 10 ميلليون تەڭگە سىياقىعا كەنەلسە, كۇمىس مەدال ەنشىلەگەن قىرعىزستان قۇراماسىنا 6 ميلليون, قولا جۇلدەگەر اتانعان رەسەي كوكپارشىلارى 4 ميلليون تەڭگە بەرىلدى. كوكپار سايىسىنىڭ ۇزدىك ويىنشىسى اتانعان ماناس نيازوۆ 2 ميلليون تەڭگە سىياقى الدى.
