قازاقستان اتلەتتەرى 1996 جىلدان بەرى جازعى پاراليمپيادا دوداسىنا تۇراقتى قاتىسىپ كەلەدى. پاريج تورىندەگى سايىسقا 44 سپورتشى اتتانىپ, پارادزيۋدو, پاراپاۋەرليفتينگ, پاراتاەكۆوندو, پاراجەڭىل اتلەتيكا, پارانىسانا كوزدەۋ, پاراۇستەل تەننيسى, ءپاراجۇزۋ, پاراكانوە جانە ۆولەيبولدى وتىرىپ ويناۋ سىندى سپورتتىڭ 9 ءتۇرى بويىنشا جۇلدە ءۇشىن تارتىسادى. ەلىمىزدىڭ سپورتشىلارى العاش رەت پاراۇستەل تەننيسىنەن, ايەلدەر اراسىندا پاراكانوەدەن جولداما يەلەنىپ, تورتجىلدىق الامانىندا باق سىناپ جاتىر.
وكىنىشكە قاراي, ەركىننىڭ جەڭىستى جولىن جالعايدى دەپ ءۇمىت ارتقان سەۆدا اليەۆا SH1 ساناتىندا 10 مەترگە پنەۆماتيكالىق تاپانشادان نىسانا كوزدەۋدەگى ۇپايى تومەن بولىپ, 13-ورىندى مىسە تۇتتى.
پاراجەڭىل اتلەتيكا سپورتىندا ءۇمىت ارتقان ساڭلاعىمىز گۇلباقىت قايىرجانوۆا نايزا لاقتىرۋدا (F13 ساناتى) 34.23 مەتر ناتيجەسىمەن بەسىنشى ورىنعا تۇراقتادى.
توپتان شىعۋعا مۇمكىندىك بار
ۆولەيبولدى وتىرىپ ويناۋ سايىسىنان ءبىزدىڭ قۇراماعا پاراليمپيادا جولداماسى ۇزاق جىلدان بەرى بۇيىرماي كەلگەن ەدى. بىلىكتى مامان باۋىرجان تاحاۋوۆ باپتايتىن ۇلتتىق قۇراما بىلتىر استانا قالاسىندا وتكەن ليتسەنزيالىق تۋرنيردە توپ جارىپ, پاريج پاراليمپياداسىنا جولداما ولجالاعان ەدى.
دوداعا سۋساپ الاڭعا شىققان جىگىتتەر توپتىق كەزەڭدەگى تارتىستى جەڭىسپەن باستاعان. فرانتسيا تورىندەگى پاراليمپيادانىڭ ۆولەيبولدى وتىرىپ ويناۋ سىنىنا الەمنىڭ ۇزدىك 8 قۇراماسى عانا قاتىسىپ جاتىر. قۇرلىقتىق ءھام الەمدىك ىرىكتەۋدەن وتكەن ۇزدىكتەردىڭ قاي-قايسىسى دا وسال ەمەس. ءبىزدىڭ جىگىتتەر العاشقى ويىندا ازۋلى فرانتسيا قۇراماسىن 3:0 ەسەبىمەن ءۇش سەتتە ەڭسەرگەن ەدى. بىراق ەكىنشى اينالىمدا جازعى پاراليمپيا ويىندارىنىڭ ءۇش دۇركىن چەمپيونى بوسنيا جانە گەرتسەگوۆينا قۇراماسىنىڭ ەكپىنىن تويتارا الماي, 2:3 ەسەبىمەن تىزە بۇكتى.
«ا» توبىندا قازاقستان, فرانتسيا, بوسنيا جانە مىسىر وينايدى. ال «B» توبىندا يران, ۋكراينا, برازيليا جانە گەرمانيا قۇرامالارى تارتىسقا تۇسەدى. باس باپكەر ۇلتتىق قۇراما مۇشەلەرىنىڭ جازعى پاراليمپيادا ويىندارىنا العاش قاتىسۋى دا ايتارلىقتاي سەزىلگەنىن جاسىرمادى.
«قوبالجۋ بولاتىنى انىق, ءبىرىنشى ويىندا فرانتسۋزداردى ۇتقانىمىز كادىمگىدەي سەرپىلىس اكەلدى, ساڭلاقتاردىڭ جەڭىسكە دەگەن سەنىمى نىعايدى. بىراق ەكىنشى اينالىمدا وتە تەگەۋرىندى قارسىلاسپەن جولىمىز ءتۇيىسىپ, جىگىتتەر بارىن سالدى. ءالى دە توپتان شىعاتىن مۇمكىندىگىمىز بار», دەدى ب.تاحاۋوۆ.
قولا دا بۇيىرمادى
پاريج تورىندە پاراتاەكۆوندودان تارتىسقا تۇسكەن ميلانا كراساۆتسەۆا توپتىق كەزەڭدى جەڭىسپەن باستاعان ەدى. 52 كگ (ك44 كلاسس) سالماقتا سەنىم ارتقان سپورتشىمىز دومينيكان رەسپۋبليكاسىنان قاتىسقان قارسىلاسى گەرالدو دياستى ايقىن ۇتقانىمەن, شيرەك فينالدا مەكسيكالىق دجەسسيكا گارسيا كۋيدجاننان جەڭىلدى.
پاراتاەكۆوندودان 80 كگ دەيىنگى سالماق دارەجەسىندە (ك44 كلاسس) نۇرلان دومباەۆ قولا مەدال ءۇشىن جەكپە-جەكتە وڭتۇستىككورەيالىق سپورتشى دجۋ دجونحۋنعا ەسە جىبەردى. +80 كگ سالماقتا سىنعا تۇسكەن نىشان ومىرالىگە (ك44 كلاسس) دە پاراليمپيادا مەدالىن ولجالايتىن مۇمكىندىك تۋعان. يراك سپورتشىسىن ەركىن ەڭسەرىپ, مەرەيىمىزدى تاسىتقان ساڭلاق شيرەك فينالدا امەريكالىق ەۆان مەدەلدەن اسا المادى. ال جۇبانىش سىنىندا حورۆاتيالىق قارسىلاسى يۆان ميكۋليچتى ۇتقانىمەن, قولا جۇلدە ءۇشىن وتكەن جەكپە-جەكتە يراندىق سپورتشى حامەد حاگشەناس نىشاننان باسىم ءتۇستى.
57 كگ سالماقتا پاراليمپيادا دوداسىنا قاتىسقان كاميلا دوسمالوۆا (ك44 كلاسس) شيرەك فينالدىق ايقاستا سەربيالىق ماريا ميتسەۆتەن جەڭىلدى. جۇبانىش سايىسىندا فيدجيلىك يرەن ماردى 12:6 ەسەبىمەن ايقىن ۇتقانىمەن, قولا مەدالعا تالاستا برازيليالىق سيلۆانا مايارا كاردوزوعا ەسە جىبەردى.
پاراجۇزۋدەن 2016 جىلى وتكەن ريو پاراليمپياداسىنىڭ چەمپيونى ءزۇلفيا عابيدۋللينا 150 مەتر قاشىقتىقتا باق سىناپ, 10-ورىنعا تۇراقتادى دا, فينالعا شىعا المادى. پاراۇستەل تەننيسىنەن تۇڭعىش رەت پاراليمپياداعا قاتىسقان ءالي ماقۇلبەكوۆ بەلگيالىق مارك لەدوعا جول بەرىپ, العاشقى اينالىمنان اسپادى.
