فوتو: kursiv.media
مەملەكەت باسشىسىنىڭ ايتۋىنشا, ەلىمىزگە سەنىمدى جانە ەكولوگيالىق تازا قۋات كوزدەرىن تارتۋ اسا ماڭىزدى. سوندىقتان, اتوم ەنەرگەتيكاسىن دامىتۋ ماسەلەسىنە باس ءمان بەرۋىمىز قاجەت.
«قازىر الەمدە ەنەرگيا تاپشىلىعى كۇشەيىپ بارادى. ەلىمىزگە سەنىمدى جانە ەكولوگيالىق تازا قۋات كوزدەرى اسا قاجەت. سوندىقتان ءبىز اتوم ەنەرگەتيكاسىن دامىتۋعا باسا ءمان بەرۋىمىز كەرەك دەپ ويلايمىن. سەبەبى ەكونوميكامىز كۇن وتكەن سايىن مول ەنەرگيانى قاجەت ەتۋدە. مۇنداي سۇرانىستى اتوم ەنەرگەتيكاسى قامتاماسىز ەتە الادى. قازىر دامىعان جانە دامۋشى 30 مەملەكەتتە 200-گە جۋىق اتوم ەلەكتر ستانساسى جۇمىس ىستەپ تۇر».
جولداۋدا پرەزيدەنت اتوم ەلەكتر ستانساسىن سالۋعا قاتىستى بارىنشا بايىپتى شەشىم قابىلداۋ قاجەتتىگىن, سونداي-اق ستراتەگيالىق جوسپارلاردى قوعامدا كەڭىنەن تالقىلاۋ كەرەك ەكەنىن اتاپ ءوتتى.
«ەل ومىرىندەگى ءاربىر ماڭىزدى قادام جۇرتشىلىقپەن بىرلەسىپ جاسالۋعا ءتيىس. اتوم ەلەكتر ستانساسى تۋرالى رەفەرەندۋمعا قاتىستى دا ءدال سولاي بولۋى كەرەك. بىلتىر مەن بۇل ماسەلە بويىنشا ءوز پىكىرىمدى ايتتىم, ياعني, رەفەرەندۋم تاقىرىبىنىڭ قوعام تالقىسىنا تۇسكەنىنە ءبىر جىل بولدى. بۇل ازاماتتارىمىزدىڭ جان-جاقتى ويلانىپ, سالماقتى شەشىم قابىلداۋىنا جەتكىلىكتى مەرزىم دەپ ويلايمىن. سوندىقتان مەن ۇكىمەتتىڭ ۇسىنىسىن قولدايمىن», دەدى مەملەكەت باسشىسى.
سونىمەن قاتار, بيىل 6 قازاندا اتوم ەلەكتر ستانساسىن سالۋ ماسەلەسىنە قاتىستى جالپىۇلتتىق رەفەرەندۋم وتەدى. بۇگىن, پرەزيدەنت قاسىم-جومارت توقاەۆ تيىستى جارلىققا قول قويادى.
«اتوم ەلەكتر ستانساسىن سالۋ ماسەلەسىنە قاتىستى جالپىۇلتتىق رەفەرەندۋم بيىلعى 6 قازاندا وتەدى. بۇگىن ءتيىستى جارلىققا قول قويامىن. الداعى رەفەرەندۋم كەڭ اۋقىمدى جالپىۇلتتىق ديالوگتىڭ تاعى ءبىر ايقىن كورىنىسى بولماق. شىن مانىندە, بۇل – «حالىق ۇنىنە قۇلاق اساتىن مەملەكەتكە» ءتان سيپات. ءبىز وسىنداي قادامدار ارقىلى جاڭا قوعامدىق-ساياسي مادەنيەتتىڭ نەگىزىن قالايمىز. ماڭىزدى مەملەكەتتىك شەشىمدەر قابىلداۋدىڭ جاڭا ۇلگىسىن جاسايمىز», دەدى مەملەكەت باسشىسى.
