فوتو: اقوردا
قاسىم-جومارت توقاەۆ ورتالىق ازيا ەلدەرىنە ءتان بەيبىتشىلىكتى ساقتاۋ ۇمتىلىسى مەن قۇرلىقتا وركەنيەتارالىق ديالوگ ورناتۋى حالىقتاردىڭ عاسىرلار بويعى ۇلەسى ەكەنىن اتاپ ءوتتى. سونداي-اق ورتالىق ازيا مەملەكەتتەرىنىڭ جاھاندىق ماڭىزدى بىرىككەن ۇلتتار ۇيىمى باس اسسامبلەياسىنىڭ ماڭىزدى قارارلارىنىڭ تەڭ اۆتورلارى اتانۋى دا, ايماقتاعى ىلگەرىلەۋدىڭ جارقىن مىسالى ەكەنىن ايعاقتادى. پرەزيدەنت ماقالاسىندا ورتالىق ازيا ساياسي تۇتاستىق پەن ىنتىماقتى بەكەمدەۋ باعىتىندا جاڭا فورمات تاۋىپ, ديالوگ الاڭىنا اينالعانىنا باسا نازار اۋدارعان.
«وا پليۋس» فورماتىنداعى جاڭا ديالوگ ورىندارىنىڭ پايدا بولۋى ورتالىق ازيانىڭ حالىقارالىق ساياسات سۋبەكتىسى رەتىندەگى ساياسي سالماعى ارتا تۇسكەنىن اڭعارتادى. وسىعان دەيىن مۇنداي فورماتتا 9 سامميت جانە جوعارى دەڭگەيدەگى كەزدەسۋ ءوتتى. كەيىنگى ەكى جىلدا «وا – رف» (استانا), «وا – قحر» (سيان), «وا – اقش» (نيۋ-يورك), «وا – گفر» (بەرلين) ءبىرىنشى سامميتتەرى, وا جانە ەۋروپالىق وداق مەملەكەتتەرى باسشىلارىنىڭ ەكى كەزدەسۋى (استانا, شولپان-اتا), «وا – پشامىك» (جيددا) ءبىرىنشى ءسامميتى, سونداي-اق «وا – ءۇندىستان» ءسامميتى (ونلاين فورماتتا) وتكىزىلدى. بيىل استانادا العاش رەت «وا – جاپونيا» ءسامميتى وتەدى. وسى فورماتتاعى ءوزارا ىقپالداستىققا باسقا دا ەلدەر, حالىقارالىق ۇيىمدار قىزىعۋشىلىق تانىتىپ وتىرعانىن اتاپ وتكەن ءجون. وسىلايشا, ءوڭىردىڭ الەمدىك ارەنا سۋبەكتىسى رەتىندەگى ورنىن بەكىتۋگە ماڭىزدى قادام جاسالىپ جاتىر», دەپ جازدى قاسىم-جومارت توقاەۆ.
مەملەكت باسشىسى ورتالىق ازيا ەلدەرىنىڭ سان سالاداعى تولايىم ءتابىستارىن داستۇرلى قۇندىلىقتاردى ۇستانۋ جولىمەن بايلانىستىرعان. قاسىم-جومارت توقاەۆ ورتالىق ازيا ەلدەرىنىڭ گەوگرافيالىق, ەكونوميكالىق, زياتكەرلىك مۇمكىندىكتەرى جاڭا بەلەستەردى باعىندىرۋعا قاۋقارلى ەكەنىن ەرەكشە اتاپ وتكەن.
ء«وڭىردىڭ ەكونوميكالىق سالماعىنىڭ ارتا ءتۇسۋى, يننوۆاتسيالار ءۇشىن اشىق بولۋى جانە زياتكەرلىك الەۋەتى ونىڭ قازىرگى زامانعى الەمدىك قۇرىلىمنىڭ نەگىزگى قوزعاۋشى كۇشتەرىنىڭ بىرىنە اينالۋىنا مۇمكىندىك بەرەتىن العىشارتتاردى قالىپتاستىرادى. ءبىزدىڭ مەملەكەتتەرىمىزدىڭ بۇعان قاجەتتى بارلىق رەسۋرسى مەن مۇمكىندىگى بار. سىرتقى ارىپتەستەرىمىزبەن بىرلەسىپ جۇرگىزەتىن وڭىرلىك جوبالار اياسىنداعى ورتاق ۇستانىمدارىمىزدى ديالوگ الاڭدارىندا جان-جاقتى ىلگەرىلەتۋ ءۇشىن كۇش بىرىكتىرۋ ماسەلەسى ەرەكشە نازار اۋدارۋعا لايىق. ورتالىق ازيانى ەۋروپا مەن ازيانىڭ اراسىنداعى كوپىر رەتىندە عانا ەمەس, حالىقارالىق قاتىناستار سالاسىندا جاھاندىق دەڭگەيدەگى جاڭا ورتالىققا اينالۋعا قابىلەتتى جەكە ويىنشى رەتىندە تانىتاتىن ۋاقىت كەلگەنىنە سەنىمدىمىن», دەپ جازدى پرەزيدەنت.
مەملەكەت باسشىسىنىڭ «Egemen Qazaqstan» گازەتىنىڭ بۇگىنگى سانىندا جاريالانعان ماقالاسىنىڭ تولىق نۇسقاسىن مىنا جەردەن وقي الاسىزدار.
