فوتو: primeminister.kz
«وزبەكستان 2023 جىلدىڭ قورىتىندىسى بويىنشا 7-ءشى ورىندا تۇرعان قازاقستاننىڭ ءىرى ساۋدا سەرىكتەسىنىڭ ءبىرى. قازاقستاننىڭ ورتالىق ازيا ەلدەرىمەن جالپى ساۋدا اينالىمىنىڭ 57%-دان استامى وزبەكستانعا تيەسىلى. سوڭعى 5 جىلدا ەكىجاقتى تاۋار اينالىمى 29%-عا ءوسىپ, 2022 جىلى $5 ملرد كولەمىنە جەتتى. بىزگە ساۋداداعى ماسەلەلەردى جۇيەلى شەشۋ جانە ساۋدا اينالىمىنىڭ جاڭا ءوسۋ نۇكتەلەرىن تابۋ قاجەت, وسىلايشا مەملەكەتتەرىمىزدىڭ باسشىلارى قويعان ماقسات – ورتا مەرزىمدى كەزەڭدە $10 ملرد-قا قول جەتكىزۋگە تالپىنۋىمىز كەرەك», دەدى سەرىك جۇمانعارين.
وزبەكستان پرەمەر-ءمينيسترىنىڭ ورىنباسارى دجامشيد حودجاەۆ مۇنداي ءىس-شارالار ەكىجاقتى ىنتىماقتاستىقتى نىعايتۋعا قۋاتتى سەرپىن بەرەتىنىن تىلگە تيەك ەتتى. ول قازاقستان وزبەكستاننىڭ نەگىزگى ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى.
«الەمدىك قاۋىمداستىق ءبىزدىڭ وڭىرلەرگە ءبىرتۇتاس نارىق پريزماسى ارقىلى قارايدى. سىزدەردى ءىرى جاھاندىق برەندتەردى ءتيىمدى تارتۋ ءۇشىن كۇش-جىگەرىمىزدى بىرىكتىرۋگە شاقىرامىن», دەدى ول.
ەكى ەل اراسىندا ونەركاسىپتىك كووپەراتسيا بەلسەندى تۇردە دامىپ كەلەدى, بۇل $3,1 ملرد سوماسىنا 69 جوبا, 14,7 مىڭنان استام جۇمىس ورنىن قۇرۋدى كوزدەيدى. قازىردىڭ وزىندە $217 ملن سوماسىنا 12 بىرلەسكەن جوبا ءساتتى جۇزەگە اسىرىلدى, بۇل تۇرمىستىق تەحنيكا, جۇك جانە جەڭىل اۆتوكولىكتەر, تراكتورلار ءوندىرىسى. بەلسەندى فازادا $178 ملن استام سوماعا ءۇش ينۆەستيتسيالىق جوبانى ىسكە اسىرۋ جۇرگىزىلۋدە. ولاردىڭ قاتارىندا تاراز قالاسىنداعى قۋاتى 500 مىڭ توننا بولات ءونىمىن شىعاراتىن ەلەكتر مەتاللۋرگيالىق زاۋىت پەن شىمكەنت قالاسىندا ينفۋزيالىق ەرىتىندىلەردى ءوندىرۋ بار.
وزبەكستان قازاقستانعا جەمىس-كوكونىس ونىمدەرىنىڭ نەگىزگى جەتكىزۋشىسى سانالادى. الەۋمەتتىك ماڭىزى بار اگروونەركاسىپتىك ونىمدەردى وزبەكستاننان جەتكىزۋدى دامىتۋ ءۇشىن تەز بۇزىلاتىن تاۋارلاردى تاسىمالداۋ كەزىندە «UZKAZTRADE» بىرلەسكەن كاسىپورنىنا قوزعالىس باسىمدىعىن بەرۋ مۇمكىندىگى قاراستىرىلادى.
«قازاقستان – وزبەكستان» بيزنەس فورۋمىنا ەكى ەلدىڭ ۇلتتىق كومپانيالارىنىڭ, ىسكەر توپتارى مەن مەملەكەتتىك ورگاندارىنىڭ 450-دەن استام وكىلى قاتىسىپ جاتىر.
