سۋرەتتى تۇسىرگەن – دميتري ەروفەەۆ
قوڭىرداعى قۋانىشتى كوزبەن كورىپ, كوڭىلگە توقىعان ادام تۇرعىنداردىڭ قۋانىشىن الىستان تۇسىنەدى. سەبەبى بۇعان دەيىن قاجەتتى مەديتسينالىق جابدىقتار بولماعان سوڭ اۋىل حالقى اۋدان ورتالىعىن جاعالايتىن. ءتىپتى قالا كەزىپ كەتەتىندەر دە بولعان. ەندى ولار جاڭادان سالىنعان بلوك-ءمودۋلدى مەديتسينالىق نىساندا قاجەتتى ەم-دومىن الا الادى. سوندىقتان قوڭىرلىقتار عيماراتتىڭ اشىلۋىن ءسان-سالتاناتپەن وتكىزدى. بيىل عانا قۇرىلىسى اياقتالعان مەكەمە ەندى حالىقتىڭ يگىلىگى ءۇشىن جۇمىس ىستەيدى.
قوڭىر اۋىلىنىڭ تۇرعىندارى بۇعان دەيىن شيرەك عاسىر بۇرىن سالىنعان ەسكى عيماراتتا قارالىپ, دەرتىنە داۋانى سول جەردەن ىزدەيتىن ەدى. توزىعى جەتكەن نىساننىڭ ورنىنا جاڭاسى سالىنسا دەگەن كوپتىڭ تىلەگى بۇل كۇنى قابىل بولدى. ەندى اۋدان ورتالىعىنان 78 شاقىرىمدا ورنالاسقان ەلدى مەكەننىڭ ءوز مەديتسينالىق مەكەمەسى بار. اۋىلداعى حالىق سانى 706 ادامدى قۇرايدى.
«باس اۋىرسا دا, بالتىر سىزداسا دا اۋدانعا اسىعىپ, كولىك ىزدەگەن اۋىل تۇرعىندارى بۇل ماسەلەنى كوپتەن ايتىپ ءجۇر. ءبىز بۇگىنگە دەيىن شاعىن بولمەسى بار ەسكى عيماراتتا دارىگەردىڭ قابىلداۋىندا بولىپ كەلدىك. وندا جاتىپ ەمدەلۋگە مۇمكىنشىلىك مۇلدەم بولمادى. ال قازىر زامان تالابىنا ساي مەدپۋنكت اشىلىپ جاتقانىنا ءدان ريزامىز. اسىرەسە زەينەتكەرلەرگە قولايلى بولدى. اۋىلىمىز كوركەيىپ جاتىر», دەدى اۋىل اقساقالى بايدولدا ەرمۋسين.
سالتاناتتى اشىلۋ راسىمىندە اۋدان اكىمىنىڭ ورىنباسارى ماۋلەن تولەۋجانوۆ اۋىل تۇرعىندارىن قۇتتىقتادى. مەدپۋنكتتىڭ لەنتاسى ەڭبەك ارداگەرى قاناپيا تاستانبەكوۆتىڭ باتاسىمەن قيىلىپ, مەكەمە ءوز جۇمىسىن باستادى.
ايتا كەتەيىك, بلوك-ءمودۋلدى مەديتسينالىق نىسان الاكول اۋدانى اكىمى اپپاراتىنىڭ تاپسىرىسى نەگىزىندە مەردىگەر «QazDamuConstruction» جشس 33 ملن تەڭگەگە سالعان. عيماراتتىڭ جالپى اۋماعى 103 شارشى مەتردى قۇرايدى. اتالعان عيماراتتا 6 بولمە بار. تولىقتاي زاماناۋي مەديتسينالىق قۇرال-جابدىقتارمەن قامتىلعان. ءبىر مەزەتتە 15 ەمدەلۋشىگە العاشقى مەديتسينالىق كومەك كورسەتە الادى. تۇرعىندارعا العاشقى مەديتسينالىق-سانيتارلىق كومەك, ەكپە ەگۋ, سكرينينگ, اكۋشەرلىك جانە ەكگ اپپاراتىنا جۇرەكقاعىسىن تەكسەرۋ, جەدەل جانە شۇعىل مەديتسينالىق كومەك قىزمەتتەرىن كورسەتەدى. مەكەمەدە شتاتتىق بىرلىككە سايكەس 3 قىزمەتكەر قىزمەت ەتەدى.
بىلتىردان بەرى الاكول اۋدانىنداعى ەلدى مەكەندەردە زاماناۋي ۇلگىدەگى 1 فەلدشەرلىك اكۋشەرلىك پۋنكت, 2 مەديتسينالىق پۋنكت, 3 بلوك-ءمودۋلدى كەشەن سالىنىپ, حالىق يگىلىگىنە بەرىلگەن ەدى. جەتىسۋ وبلىسىندا دەنساۋلىق ساقتاۋ سالاسىنداعى ينفراقۇرىلىمدى دامىتۋ ماقساتىندا بيىلدىڭ وزىندە 94 نىسان تۇرعىزىلادى. سونىڭ 59-ى «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە جۇزەگە استى. سول قاتاردا دارىگەرلىك امبۋلاتوريا, فەلدشەرلىك-اكۋشەرلىك پۋنكت, مەدپۋنكت بار. بۇل رەتتە نىسانداردىڭ 27-ءسى – بلوك-ءمودۋلدى.
جەتىسۋ وبلىسى
