2018 جىلى قۇرىلعان, اۋماعى 145 مىڭ گەكتاردى قۇرايتىن ۇلتتىق پاركتە 1 640 ءتۇرلى وسىمدىك وسەدى. ولاردىڭ ىشىندە 169 ەندەميالىق ءتۇرى بولسا, 35 ءتۇرى قازاقستاننىڭ «قىزىل كىتابىنا» ەنگەن.
تاياۋدا استانا حالىقارالىق ۋنيۆەرسيتەتىنىڭ باستاماسىمەن «تارباعاتاي» مەملەكەتتىك ۇلتتىق تابيعي پاركىندە دوكتورانتتاردىڭ ديسسەرتاتسيالىق جۇمىس تاقىرىپتارى مەن عىلىمي جوبالارى نەگىزىندە دالالىق عىلىمي زەرتتەۋ جۇمىستارى جۇرگىزىلىپ, باسقوسۋعا قازاقستاننىڭ بيولوگ عالىمدارىمەن قاتار پولشا, يزرايل, جاپونيا ەلدەرىنىڭ عالىمدارى كەلدى.
شەتەلدەردە عىلىمي تاعىلىمدامادان ءوتىپ, عالىمدارمەن تىعىز بايلانىس ورناتقان زەرتتەۋشىلەر جاڭا تىنىس تاپقان. ال اتالعان پارككە كەلگەن پولشا, يزرايل, جاپونيا ەلدەرىنىڭ عالىمدارى ۇلتتىق پارك اۋماعىنداعى وسىمدىكتەردىڭ ءوسۋ جيىلىگى مەن فلوراسىن زەرتتەۋدە ۇلكەن جاڭالىقتارعا كەنەلەرىنە زور سەنىم بىلدىرگەن ەكەن.
«تارباعاتاي» مەملەكەتتىك ۇلتتىق تابيعي پاركى مەن استانا حالىقارالىق ۋنيۆەرسيتەتى اراسىنداعى مەموراندۋم شەڭبەرىندە ورىندالىپ جاتقان اتالعان زەرتتەۋ ناتيجەسى الداعى ۋاقىتتا الەمدىك دەڭگەيدەگى وسىمدىكتەر مەن جانۋارلار الەمىنەن حابار بەرەتىن جۋرنالداردا, عىلىمي ەڭبەكتەردە جارياعا شىقپاق.
قازاقستاننىڭ «قىزىل كىتابىنا» ەنگەن ەرەكشە تىرشىلىكتىڭ جويىلىپ كەتۋ قاۋپىمەن كۇرەسۋگە باعىتتالعان ەكسپەديتسيالار – تارباعاتاي تاۋىنداعى وزگە دە تىرشىلىك يەلەرىنە الەم عالىمدارىنىڭ نازارىن بۇرۋ ماقساتىن كوزدەيدى.
بۇل تۋرالى تولىعىراق «Egemen Qazaqstan» گازەتىنىڭ بۇگىنگى سانىنا شىققان قۋات قيىقبايدىڭ «وزگەشە وسىمدىكتەر الەمى» ماقالاسىنان وقي الاسىز.
