فوتو: olympic.kz
الەم چەمپيونى, ريو وليمپياداسىنىڭ كۇمىس, توكيو وليمپياداسىنىڭ قولا جۇلدەگەرى ەلدوس سمەتوۆتىڭ بۇل – ءۇشىنشى الامانى. وتىزدان اسقان وعلانعا پاريجگە بارۋ جولداماسى وڭاي بۇيىرعان جوق. ماعجان شامشادين, نۇرعانات سەرىكباەۆ ۇشتىگى ءوزارا بەلدەسۋ وتكىزىپ, اراسىنان تاجىريبەسى تولىسقان سمەتوۆ قارا ءۇزىپ شىقتى. 60 كگ – الەمنىڭ جۇلدىزدى بالۋاندارىن جيناعان سالماق. «مەن وليمپيادا التىنىن ولجالاعاندا سپورتتى دوعارامىن» دەگەن ەلدوستىڭ ماقساتى ورىندالسا يگى. ويتكەنى ءتول كۇرەسىنەن جاپوندار جازعى وليمپيادانىڭ التىن مەدالىن جەڭىل سالماق دارەجەسىندە وڭايلىقپەن بەرە قويمايدى. وزگە ەلدەردىڭ دە وعلاندارى وڭاي ەمەس.
ايەلدەر اراسىندا الەم چەمپيوناتىنىڭ قولا جۇلدەگەرى ءابيبا ابۋجاقىنوۆا (48 كگ), ەسميگۋل كۋيۋلوۆا (63 كگ), كاميلا بەرلىقاش (+78 كگ) بەلدەسۋگە تۇسەدى.
ە.سمەتوۆتەن وزگە بالۋانداردىڭ بارلىعى دا جازعى وليمپيا ويىندارىنا العاش رەت قاتىسادى. قازاق سپورتىنىڭ تاريحىندا وليمپيادانىڭ مەدالىن ولجالاعان دزيۋدوشىلارىمىز – ازىرگە ەكەۋ عانا. 2008 جىلى اسحات جىتكەەۆ بەيجىڭ وليمپياداسىنىڭ كۇمىس مەدالىن قورجىنعا سالعان. ودان كەيىن ەلدوس ەكى وليمپيادانىڭ مەدالىن ەنشىلەدى.
بالۋاندار پاريجدەگى Champ de Mars Arena كەشەنىندە 27 شىلدە مەن 3 تامىز ارالىعىندا بەلدەسۋگە تۇسەدى.
